လာမည့် သီတင်းကျွတ်ရုံးပိတ်ရက်ကာလတွင် ပလင်းကမ်းသာယာဆင်စခန်းသို့ လာရောက်လည်ပတ် လေ့လာနိုင်မည်ဖြစ်ကြောင်း အဆိုပါဆင်စခန်းမှ သိရသည်။
ပုဂံရှေးဟောင်းယဉ်ကျေးမှုနယ်မြေသို့ ဘုရားဖူးလာရောက်ရင်း ညောင်ဦးမြို့မှ (၅)မိုင်အကွာ ညောင်ဦး-ပခုက္ကူ-မြင်းခြံကားလမ်းမကြီးဘေးအနောက် ပုလင်းကျေးရွာအနီး ဧရာဝတီမြစ်ကမ်းဘေးတွင် ဖွင့်လှစ်ထားရှိသည့် ပလင်းကမ်းသာယာ ဆင်စခန်းသို့ တဆက်တစပ်တည်း လာရောက်အပန်းဖြေလည်ပတ် လေ့လာနိုင်ကြောင်း သိရသည်။
မြန်မာပြည်အရပ်ရပ်တွင် ဖွင့်လှစ်ထားရှိသည့် ဆင်ထိန်းသိမ်းစောင့်ရှောက်ရေး အခြေပြုခရီးသွားလုပ်ငန်း ဆင်စခန်း (၂၂)ခု အနက် တစ်ခုအပါအဝင်ဖြစ်ပြီး ပလင်းကမ်းသာယာဆင်စခန်းအား ၂၀၁၈ ခုနှစ်၊ မတ်လ (၂၈) ရက်တွင် စတင်ဖွင့်လှစ်ခဲ့ကြောင်း သိရသည်။
ပလင်းကမ်းသာယာဆင်စခန်းသည် ဧရာဝတီမြစ်ကမ်းဘေးတွင် ဖွင့်လှစ်ထားသည့်ဆင်စခန်းဖြစ်ကာ ဆင်စီးလမ်းကြောင်းကိုလည်း မြစ်ကမ်းဘေး ကမ်းပါးကုန်းမြင့် တလျှောက်တောတွင်း ဆင်စီးသည့်ပုံစံ ဆောင်ရွက်ထားပြီး ဧရာဝတီမြစ်ရှုခင်းအလှအား ဆင်စီးရင်းကြည့်ရှုနိုင်ကြောင်းသိရသည်။
ဆင်စခန်း ဝင်ကြေးအနေဖြင့် နိုင်ငံသားတစ်ဦးလျှင် (၁,၀၀၀) ကျပ်နှင့် နိုင်ငံခြားသား တစ်ဦးလျှင် (၁၀,၀၀၀)ကျပ်သတ်မှတ်ထားပြီး အသက် (၁၀)နှစ်အောက် ကလေးငယ်များ၊ ရဟန်း၊ သံဃာ၊ သီလရှင်များအား ဆင်စခန်းဝင်ကြေး ကင်းလွတ်ခွင့်သတ်မှတ်ထားကြောင်းနှင့် ဆင်စီးခအနေဖြင့် နိုင်ငံသားတစ်ဦးလျှင် (၅,၀၀၀)ကျပ်နှင့် နိုင်ငံခြားသားတစ်ဦးလျှ င် (၁၀,၀၀၀)ကျပ်သတ် မှတ်ထား ကြောင်းသိရသည်။
ဆင်စခန်းတွင် ဆင်ခြောက်ကောင်ရှိပြီး ဆင်ထီး နှစ်ကောင်၊ဆင်မ (၄)ကောင်ရှိကာ အသက်အကြီးဆုံး အသက် (၃၃) နှစ် နှင့် အသက်အငယ်ဆုံး ဆင်မှာ (၂)နှစ် (၁၀)လသားဖြစ်ကြောင်း သိရသည်။
ဆင်စခန်းသို့ လာရောက်လည်ပတ်သူများ အပန်းဖြေနားနေနိုင်ရန် ဧရာဝတီမြစ်ကမ်းဘေးတွင် လုံးခြင်းနားနေတဲငယ်များဆောင်ရွက်ထားကြောင်း၊ သစ်ပင်ကြီးများကြားတွင် လင့်စင်သဖွယ်တည်ဆောက်ထားသည့် (Tree House) တွင်လည်းလေညှင်းခံရှုခင်းကြည့်ရင်း အပန်းဖြေနိုင်ကြောင်းသိရသည်။
အစားအသောက်များ မှာယူသုံးဆောင်နိုင်ရန်လည်း အညာဒေသထွက် အသုပ်စုံများ၊ အအေးအချိုရည်၊ ကော်ဖီ၊ ထမင်း/ဟင်းလျာများလည်း ရရှိအောင်ဆောင်ရွက်ထားပြီး တဲများတွင် နားနေရင်း အစားအစာများ စိတ်အေးချမ်းသာစွာ မှာယူသုံးဆောင်နိုင်ကြောင်းလည်း သိရသည်။