သပိတ်မှောက်သူများလုပ်ငန်းခွင်ပြန်ဝင်ရန် ဘင်္ဂလားဒေ့ရှ်အစိုးရ အမိန့်ထုတ်

             
အခွန်ဌာနနှင့် အကောက်ခွန်ဌာနဝန်ထမ်းများအနေဖြင့် တနင်္ဂနွေနေ့တွင် ချက်ချင်လုပ်ငန်းခွင် ပြန်ဝင်ကြရန်နှင့် အဓိကကုန်သွယ်မှု အချက်အချာဖြစ်သော စစ်တကောင်းဆိပ်ကမ်းတွင် အကောက်ခွန်လုပ်ငန်းများ ရပ်ဆိုင်းသွားမှုအပါဝင် အခွန်လုပ်ငန်းဆောင်တာများ ရပ်တန့်သွားခဲ့သည့် နိုင်ငံလုံးဆိုင်ရာ သပိတ်မှောက်မှု နှစ်ရက်အကြာတွင် သပိတ်လှန်ရန် ဘင်္ဂလားဒေ့ရှ်အစိုးရက အမိန့်ထုတ်ခဲ့သည်။
             
“အရာရှိတွေနဲ့ဝန်ထမ်းတွေ အားလုံးအလုပ်ပြန်ဆင်းရမှာပါ။ နိုင်ငံတော်အကျိုးစီးပွားကို ထိခို-က်စေတဲ့ လုပ်ရပ်တွေကို ရှောင်ကြဉ်ရပါမယ်။ ဒီလိုမှမဟုတ်ရင် ပြည်သူလူထုနဲ့ နိုင်ငံတော်စီးပွားရေးကို ကာကွယ်ဖို့ရာ အစိုးရက တင်းကြပ်တွေ အစီအမံတွေ ချမှတ်ရပါလိမ့်မယ်” ဟု သတင်းထုတ်ပြန်ချက်တွင် ဖေါ်ပြထားသည်။ သို့ရာတွင် မည်ကဲ့သို့ သော အစီအမံများကို ချမှတ်မည်ဆိုသည်ကိုမူ အသေးစိတ်ထုတ်ပြောခဲ့ခြင်း မရှိပေ။
            
စီးပွားရေးမထိခိုက်စေရန် သွင်းကုန်-ပို့ကုန်လုပ်ငန်းများကို အနှောင့်အယှက်ကင်းကင်းဖြင့် ဆက်လက်လုပ်ဆောင်ရမည်ဖြစ်ကြောင်း မိုဟာမက်ယူနွတ်စ်၏ ယာယီအစိုးရက သတင်းထုတ်ပြန်ချက်တွင် ပြောကြားထားပြီး နိုင်ငံတော် အခွန်တော်ဘုတ်အဖွဲ့(NBR) ရှိ လုပ်ငန်းအားလုံးသည် မရှိမဖြစ်ဝန်ဆောင်မှုများဖြစ်ကြောင်း ဆက်လက် ပြောကြားခဲ့သည်။
        
အစိုးရက မေလ ၁၂ ရက်နေ့တွင် NBR ကို ဖျက်သိမ်း၍ အခွန်တော်ဌာနအသစ်များ ဖွဲ့စည်းသည့် အမိန့်ထုတ်ပြန်ခဲ့ပြီးနောက် ဆန္ဒပြမှုများ စတင်ခဲ့သည်။ ခေတ်မီစေရန်၊ အခွန်ကောက်ယူရာတွင် အဆင်ပြေချောမွေ့စေရန်၊ အခွန်ထပ်နေမှုများ လျှော့ချရန်နှင့် စွမ်းဆောင်ရည်မြှင့်တင်ရန်အတွင် အဆိုပါ ပြုပြင်ပြောင်းလဲမှုများသည် လိုအပ်ကြောင်း အစိုးရက ပြောကြားခဲ့သည်။
           
သို့သော်လည်း ဌာနတွင်းရှိ အရာရှိအများအပြားသည် အလုပ်အကိုင်မတည်မြဲမှုနှင့် အဖွဲ့အစည်းဆိုင်ရာ လွတ်လပ်မှု ဆုံးရှုံးမည်ကို စိုးရိမ်ကြပြီး ဖွဲ့စည်းပုံအသစ်တွင် ပြုပြင်ပြောင်းလဲရန်နှင့် NBR ဥက္ကဌ နုတ်ထွက်ပေးရန် တောင်းဆိုခဲ့ကြသည်။ ၎င်းတို့၏ တောင်းဆိုချက်များအတွက် ဖိအားပေးသည့်အနေဖြင့် စနေနေ့တွင် တစ်နိုင်ငံလုံးအတိုင်းအတာဖြင့် အလုပ်ပိတ်သပိတ်ကို စတင်ခဲ့ကြခြင်းဖြစ်သည်။

Ref: အေးရှားဝမ်း