ရန်ကုန်၊ စက်တင်ဘာ ၄
ဆန်အမျိုးအစားအလိုက် သတ်မှတ်ထားသည့် အခြေခံရည်ညွှန်းဈေးနှုန်းများဖြင့် စားသုံးသူများထံ အရည်အသွေးမှန်ကန်စွာ ရောင်းချပေးရန်နှင့် ဆန်ဈေးကွက်တည်ငြိမ်ရေးအတွက် ဝိုင်းဝန်းပူးပေါင်းဆောင်ရွက်ကြရန် မြန်မာနိုင်ငံဆန်စပါးကုန်သည်များအသင်းက စက်တင်ဘာ ၃ ရက်တွင် သတင်းထုတ်ပြန် မေတ္တာရပ်ခံလိုက်သည်။
အသင်း၏ ထုတ်ပြန်ချက်အရ လူဦးရေထူထပ်သည့် မြို့နယ်များရှိ ဈေးများနှင့် သင့်တင့်သည့်နေရာများတွင် ဆန်အရောင်းဆိုင်များ လိုအပ်သလို ဖွင့်လှစ်ကာ ပုံမှန်ရောင်းချပေးရန်နှင့် ဆန်များကို ဈေးနှိမ်သိုလှောင်ပြီး ဈေးနှုန်းမြင့်တက်ချိန်မှ ရောင်းချခြင်းမျိုး မပြုလုပ်ကြရန် တိုက်တွန်းထားသည်။
ထို့ပြင် ဆန်သိုလှောင်မှုမှတ်တမ်း (MyRo Registration) ကို ပုံမှန်စာရင်းသွင်းရန်၊ လစဉ် ကုန်လက်ကျန်စာရင်းများ တင်သွင်းရန်နှင့် ကုန်စည်ဒိုင်များနှင့် လက်ကားဆိုင်များအနေဖြင့် ဆန်စီးဝင်/စီးထွက် စာရင်းသတင်းပို့စနစ်ကို မပျက်မကွက် ဆောင်ရွက်ရန် အသိပေးထားသည်။
အလားတူ Facebook၊ TikTok အပါအဝင် Social Media Online Platform များတွင် ဆန်ရောင်းဝယ်သူများအနေဖြင့် သက်ဆိုင်ရာ ဥပဒေများကို တိကျစွာ လိုက်နာရန်နှင့် ပြည်သူများ ထင်ယောင်ထင်မှားဖြစ်စေမည့် ခန့်မှန်းဈေးနှုန်းများ၊ စိုးရိမ်ထိတ်လန့်စေသည့် သတင်းအချက်အလက်များ ရေးသားပြောဆိုရောင်းချခြင်း မပြုလုပ်ရန်လည်း မေတ္တာရပ်ခံထားသည်။