ပြည်ထောင်စုသမ္မတမြန်မာနိုင်ငံတော် ယာယီသမ္မတ နိုင်ငံတော်လုံခြုံရေးနှင့်အေးချမ်းသာယာရေးကော်မရှင် ဥက္ကဌ ဗိုလ်ချုပ်မှူးကြီး မင်းအောင်လှိုင်က ယနေ့ ကျင်းပနေသည့် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် NCA ဆယ်နှစ်ပြည့် နှစ်ပတ်လည်အခမ်းအနားတွင် ပြောကြားခဲ့ခြင်း ဖြစ်သည်။
ပြောကြားရာတွင် မြန်မာနိုင်ငံတော် ယာယီသမ္မတ နိုင်ငံတော်လုံခြုံရေးနှင့်အေးချမ်းသာယာရေးကော်မရှင် ဥက္ကဌ အနေဖြင့် နိုင်ငံတော်တာဝန်လွှဲပြောင်းယူစဉ်ကတည်းက အခက်အခဲပေါင်းများစွာကြားမှ ဦးစားပေးလုပ်ဆောင်ရမည့်တာဝန်များကို အဆင့်အလိုက်ချမှတ်ကာ ဆောင်ရွက်ခဲ့သည်ဟုပြောကြားသည်။
ရွေးကောက်ပွဲကာလများတွင် ဖြစ်ပေါ်လာနိုင်သည့် အခြေအနေများကိုလည်းတွက်ဆပြီး လုံခြုံရေးကောင်းမွန်အောင် တိုးမြှင့်ဆောင်ရွက်သွားမည်ဖြစ်သလို သက်ဆိုင်ရာတိုင်းရင်းသားအဖွဲ့အစည်းများကလည်း ပူးပေါင်းပါဝင် ပေးကြဖို့လည်း ပြောကြားသည်။
တိုင်းရင်းသားများ၏ လိုလားချက်ကို ဒီမိုကရေစီနည်းလမ်းကျ ဆောင်ရွက်ပေးနိုင်ရန် နိုင်ငံရေးအခင်းအကျင်းဖြစ်သည့် လွှတ်တော်ထဲတွင် တိုင်းရင်းသားကိုယ်စားလှယ်များ စုံစုံလင်လင်ရောက်ရှိလာရန်လိုကြောင်းလည်းပြောပြီး ထိုသို့ရောက်ရှိရန်အတွက် ရောနှောထားတဲ့ကိုယ်စားလှယ် အချိုးကျစနစ် (MMP) ကိုလည်း ရွေးကောက်ပွဲတွင် ကျင့်သုံးမည်ဖြစ်သည်ဟုလည်း ပြောကြားသည်။
ထို့အပြင် လွတ်လပ်ရေးရပြီးအချိန်မှစ ပယောဂအမျိုးမျိုးကြောင့် တိုင်းရင်းသားပြည်သူများ ဒုက္ခဆင်းရဲကြုံတွေ့နေရဆဲဖြစ်ပြီး တိုင်းရင်းသားပြည်သူတစ်ရပ်လုံးအနေဖြင့် တစ်ဦးနှင့်တစ်ဦး စိတ်ရှည်သည်းခံပြီး NCA လမ်းကြောင်းပေါ်တွင် စည်းလုံးညီညွတ်စွာဖြင့် အနာဂတ်တွင် တနိုင်ငံလုံးထာဝရငြိမ်းချမ်းရေးရရှိဖို အားသွန်ခွန်စိုက် အတူတကွ ဆောင်ရွက်ကြရန် တိုက်တွန်းပြောကြားခဲ့သည်။