ဟော်မုဇ်ရေလက်ကြားအနီးရှိ အီရန်ကမ်းရိုးတန်းတစ်လျှောက်မှ ဒုံးကျည်စခန်းများကို အမေရိကန်တပ်ဖွဲ့များက တို-က်ခိုက်ခဲ့ကြောင်း အမေရိကန် ဗဟိုစစ်ဌာနချုပ် (စန့်ကွန်) က အင်္ဂါနေ့တွင် လူမှုကွန်ရက် အိတ်စ် မှတစ်ဆင့် သတင်းထုတ်ပြန်ခဲ့ကြောင်း သိရသည်။
“လွန်ခဲ့တဲ့ နာရီပိုင်းက အမေရိကန်တပ်ဖွဲ့တွေဟာ ဟော်မုဇ်ရေလက်ကြားအနီး အီရန်ကမ်းရိုးတန်းတစ်လျှောက်က ခိုင်ခံ့အောင် တည်ဆောက်ထားတဲ့ အီရန်ဒုံးကျည်စခန်းတွေကို ပေါင် ၅,၀၀၀ ရှိတဲ့ မြေအောက်ထိုးဖေ-ာက်ဗုံး အများအပြား အသုံးပြုပြီး အောင်မြင်စွာ တို-က်ခိုက်နိုင်ခဲ့ပါတယ်” ဟု စစ်ဌာနချုပ်က ဆိုသည်။
“အဆိုပါစခန်းတွေမှာရှိတဲ့ အီရန်ရဲ့ သင်္ဘောဖျ-က် ခရုဇ်ဒုံးကျည် တွေဟာ ရေလက်ကြားအတွင်းက နိုင်ငံတကာ သင်္ဘောသွားလာရေးအတွက် ခြိမ်းခြောက်မှုဖြစ်နေပါတယ်” ဟု ၎င်း သတင်းတွင် ဆက်လက် ဖေါ်ပြထားသည်။
အင်္ဂါနေ့အစောပိုင်းတွင် အမေရိကန်သမ္မတ ဒေါ်နယ်ထရမ့်ပ်က အမေရိကအနေဖြင့် ရက်သတ္တ သုံးပတ်မြောက်ထဲသို့ ရောက်ရှိလာပြီဖြစ်သော အီရန်ကို တို-က်ခိုက်မှုများကို ရပ်တန့်ရန် “အဆင်သင့်မဖြစ်သေး” ကြောင်း သတင်းထောက်များကို ပြောကြားခဲ့သည်။
ဟော်မုဇ်ရေလက်ကြားအတွင်း ပူးတွဲစောင့်ရှောက်ပေးရေး တာဝန်ဆောင်ရွက်ရန် ၎င်း၏တောင်းဆိုချက်ကို နေတိုးအဖွဲ့ဝင်အများစုနှင့် အမေရိက၏ မဟာမိတ်များက ငြင်းပယ်ခဲ့ကြသည့်အပေါ် “စိတ်ပျက်မိကြောင်း” ထရမ့်ပ်က ဝန်ခံခဲ့ပြီး၊ အမေရိက အနေဖြင့် “ဘယ်သူ့အကူအညီမှ မလိုအပ်ဘူး” ဟု အခိုင်အမာ ပြောဆိုခဲ့သည်။ ဂျပန်၊ သြစတြေးလျနှင့် တောင်ကိုရီးယားတို့ကလည်း ငြင်းပယ်ခဲ့ကြောင်း ၎င်း သတင်း၌ ဖေါ်ပြထားသည်။
အီရန်လွှတ်တော်ဥက္ကဋ္ဌ မိုဟာမက် ဘာဂါ ဂါလီဘတ်ဖ်ကမူ ဟော်မုဇ်ရေလက်ကြားသည် “စစ်မဖြစ်ခင်က အခြေအနေမျိုးကို ပြန်ရောက်မှာမဟုတ်ဘူး” ဟု အင်္ဂါနေ့တွင် အိတ်စ် ၌ ရေးသားခဲ့သော်လည်း အသေးစိတ်ကိုမူ ဖော်ပြခြင်းမရှိပေ။
ဂျေပီမော်ဂန်၏ မကြာသေးမီက ထုတ်ပြန်သော အစီရင်ခံစာတစ်ခုတွင် အကယ်၍ ဟော်မုဇ်ရေလက်ကြားသာ အလုံးစုံ ပိတ်ဆို့ခံရပါက အရှေ့အလယ်ပိုင်း ရေနံထုတ်လုပ်သည့်နိုင်ငံများသည် ထုတ်လုပ်မှုလုပ်ငန်းများကို “၂၅ ရက်ထက် ပိုမို” ဆက်လက်ဆောင်ရွက်နိုင်လိမ့်မည်မဟုတ်ကြောင်း လေ့လာသူများက သတိပေးထားသည်။
ဆော်ဒီအာရေဗျ၊ အီရတ်၊ ကာတာနှင့် အာရပ်စော်ဘွားများပြည်ထောင်စု(ယူအေအီး)တို့သည် အီရန်နိုင်ငံနည်းတူ ၎င်းတို့၏ ရေနံစိမ်းများ တင်ပို့ရန်အတွက် ဤကျဉ်းမြောင်းသော ရေလမ်းကြောင်းအပေါ်တွင် မှီခိုနေကြရပေသည်။
အီရန်နိုင်ငံခြားရေးဝန်ကြီး အဘတ်စ် အရတ်ချီကမူ အမေရိက၊ အစ္စရေးနှင့် ၎င်းတို့၏ မဟာမိတ်သင်္ဘောများမှလွဲ၍ ကျန်နိုင်ငံတကာ သင်္ဘောများအတွက် ရေလက်ကြားမှာ ဖွင့်လှစ်ထားဆဲဖြစ်ကြောင်း ပြီးခဲ့သည့်အပတ်က အမေရိကန်မီဒီယာများကို ပြောကြားခဲ့သည်။
အမေရိက နှင့် အစ္စရေးတို့သည် ဖေဖော်ဝါရီလ ၂၈ ရက် နေ့တွင် အီရန်ကို အကြီးအကျယ် စတင် တိုက်ခိုက်ခဲ့ရာ တိုက်ပွဲများကြောင့် ကမ္ဘာတစ်ဝန်း သင်္ဘောသွားလာရေးကို အနှောင့်အယှက်ဖြစ်စေကာ ရေနံဈေးနှုန်းများ ထိုးတက်ပြီး ကမ္ဘာ့စီးပွားရေးကို လှုပ်ခါစေခဲ့သည်။
Ref: ရှင်းဟွာ