ရေဘေးအန္တရာယ်ကို တုံ့ပြန်ရုံသာမက ရေရှည်ကြိုတင်ကာကွယ်နိုင်ရေး စနစ်တကျဆောင်ရွက်ရန် နိုင်ငံတော်သမ္မတ ပြောကြား

ပုသိမ်၊ ဩဂုတ် ၈

သဘာဝဘေးအန္တရာယ်များကို ရှောင်လွှဲ၍မရနိုင်သော်လည်း လူတို့၏ စနစ်တကျကြိုတင်ပြင်ဆင်ဆောင်ရွက်မှုများဖြင့် ထိခိုက်ဆုံးရှုံးမှုများကို အတိုင်းအတာတစ်ခုအထိ လျှော့ချနိုင်သဖြင့် ဘေးအန္တရာယ်ကျရောက်ပြီးနောက် ကူညီကယ်ဆယ်ရေးနှင့် ပြန်လည်ထူထောင်ရေးလုပ်ငန်းများ ဆောင်ရွက်ရုံသာမက ရေရှည်ကြိုတင်ကာကွယ်ရေးအစီအမံများကိုပါ စနစ်တကျ လေ့လာဖော်ထုတ် အကောင်အထည်ဖော်သွားရန်လိုကြောင်း နိုင်ငံတော်သမ္မတ ဦးမင်းအောင်လှိုင်က ပြောကြားသည်။

နိုင်ငံတော်သမ္မတသည် ယနေ့ ဩဂုတ် ၈ ရက်တွင် ဧရာဝတီတိုင်းဒေသကြီး၊ ပုသိမ်မြို့၌ ပြုလုပ်သည့် ငဝန်မြစ်ရေကာတာ တာတမံနိမ့်ကျမှုကြောင့် ရေကျော်စီးဝင်၍ ရေကြီးရေလျှံမှုဖြစ်ပွားခဲ့ခြင်းနှင့်ပတ်သက်သည့် ကူညီကယ်ဆယ်ရေးနှင့် ပြန်လည်ထူထောင်ရေးလုပ်ငန်းများ ညှိနှိုင်းအစည်းအဝေးတွင် အထက်ပါအတိုင်း ပြောကြားခဲ့ခြင်းဖြစ်သည်။

“လူသားတွေအနေနဲ့ သဘာဝဘေးအန္တရာယ်ကို ရှောင်လွှဲလို့မရနိုင်ပေမယ့် လူတွေရဲ့လုပ်ဆောင်ချက်တွေနဲ့ ကြိုတင်ကာကွယ်တားဆီးရေးလုပ်ငန်းတွေကို အတိုင်းအတာတစ်ခုအထိ ဆောင်ရွက်နိုင်ပါတယ်။ သဘာဝဘေးအန္တရာယ်ကို မလွဲမသွေ ရင်ဆိုင်ကြုံတွေ့လာရရင်လည်း ကူညီကယ်ဆယ်ရေးနဲ့ ပြန်လည်ထူထောင်ရေးလုပ်ငန်းတွေကို ဘယ်လိုအဆင့်လိုက် ဆောင်ရွက်ရမယ်ဆိုတာ သိရှိနားလည်ကြဖို့လိုပါတယ်” ဟု နိုင်ငံတော်သမ္မတက ပြောကြားသည်။

ရေဘေးအန္တရာယ်များကို ရေရှည်ကာကွယ်နိုင်ရေးအတွက် မြစ်များ၊ မြစ်လက်တက်များနှင့် ချောင်းများ၏ ရေစီးရေလာနှင့် ရေဝင်ရေထွက်အခြေအနေများ၊ မြစ်ကြမ်းပြင်အမြင့် (Bed Level) ပြောင်းလဲမှုများကို စဉ်ဆက်မပြတ် သုတေသနပြုမှတ်တမ်းတင်၍ လေ့လာဆန်းစစ်နေရန်လိုကြောင်း နိုင်ငံတော်သမ္မတက ပြောကြားသည်။

ယင်းသို့ လေ့လာဆန်းစစ်မှုများအပေါ်အခြေခံ၍ လိုအပ်သည့် ရေလမ်းကြောင်းပြုပြင်ထိန်းသိမ်းခြင်း၊ နုန်းဆယ်ခြင်းနှင့် ရေစီးရေလာကောင်းမွန်စေရေးလုပ်ငန်းများကို ဆောင်ရွက်ခြင်းဖြင့် ရေကြီးရေလျှံမှုကြောင့် ဖြစ်ပေါ်လာနိုင်သည့် သဘာဝဘေးအန္တရာယ်နှင့် ထိခိုက်ဆုံးရှုံးမှုများကို လျှော့ချနိုင်မည်ဖြစ်ကြောင်း ပြောကြားသည်။

ဆည်မြောင်းနှင့် ရေအရင်းအမြစ်ထိန်းသိမ်းရေးဆိုင်ရာ တာဝန်ရှိသူများအနေဖြင့်လည်း ယင်းအခြေအနေများကို ဒေသတစ်ခုချင်းအလိုက်သာမက တစ်နိုင်ငံလုံးအတိုင်းအတာဖြင့် စနစ်တကျ စဉ်ဆက်မပြတ် လေ့လာသုံးသပ်စောင့်ကြည့်၍ လိုအပ်သည့် ကြိုတင်ကာကွယ်ရေးနှင့် ပြုပြင်ထိန်းသိမ်းရေးလုပ်ငန်းများ ဆောင်ရွက်နေရမည်ဖြစ်ကြောင်း မှာကြားသည်။

ထို့ပြင် ဧရာဝတီမြစ်ဝကျွန်းပေါ်ဒေသအတွင်း ပင်လယ်ရေငန်ဝင်ရောက်မှုကြောင့် စိုက်ပျိုးရေးလုပ်ငန်းများ ထိခိုက်မှုမရှိစေရေးကိုလည်း ရေရှည်အမြင်ဖြင့် စနစ်တကျဆောင်ရွက်ရန်လိုကြောင်း၊ မြစ်အထက်ပိုင်းမှ စီးဆင်းလာသည့်ရေများ လူနေထိုင်ရာဒေသများသို့ ဝင်ရောက်မှုမရှိဘဲ သတ်မှတ်ရေလမ်းကြောင်းအတိုင်း စီးဆင်းသွားနိုင်ရေးအတွက် မြစ်ချောင်းများ၏ ရေစီးရေလာနှင့် မြစ်ကြမ်းပြင်အခြေအနေများကို စနစ်တကျ သုတေသနပြုလေ့လာရန်လိုကြောင်း ပြောကြားသည်။

“ရေငံဝင်ရောက်ခြင်းကြောင့် စိုက်ပျိုးရေးလုပ်ငန်းတွေကို ထိခိုက်စေနိုင်ပါတယ်။ ဒါ့ကြောင့် ရေငံတားတာတွေ တည်ဆောက်ခြင်း၊ မြစ်ချောင်းတွေမှာ Low Head Dam တွေ တည်ဆောက်ခြင်းအားဖြင့်လည်း ရေငံဝင်ရောက်မှုကို လျှော့ချနိုင်ပါတယ်” ဟု နိုင်ငံတော်သမ္မတက ပြောကြားသည်။

ယင်းလုပ်ငန်းများကို ဒေသ၏ မြေမျက်နှာသွင်ပြင်နှင့် မြေအနိမ့်အမြင့်အခြေအနေများအလိုက် အပိုင်းလိုက်စီမံဆောင်ရွက်ရန်နှင့် လိုအပ်ပါက သက်ဆိုင်ရာပညာရှင်များ၊ ကျွမ်းကျင်သူများဖြင့် စနစ်တကျ လေ့လာတွက်ချက်၍ အကောင်အထည်ဖော်ရန်လိုကြောင်း နိုင်ငံတော်သမ္မတက မှာကြားသည်။

ရေဘေးကာကွယ်ရေးနှင့် ရေအရင်းအမြစ်စီမံခန့်ခွဲရေးလုပ်ငန်းများအတွက် ငွေကြေးကုန်ကျမှု များပြားနိုင်သော်လည်း ရေရှည်တွင် စိုက်ပျိုးရေးထုတ်လုပ်မှုတိုးတက်ခြင်း၊ ဒေသခံပြည်သူများ၏ ဝင်ငွေနှင့် လူမှုစီးပွားဘဝ တိုးတက်ခြင်းအပါအဝင် ရရှိလာမည့် အကျိုးကျေးဇူးများနှင့် ချိန်ဆတွက်ချက်၍ ရေရှည်အကျိုးရှိမည့် လုပ်ငန်းများကို စနစ်တကျ အကောင်အထည်ဖော်ဆောင်ရွက်သွားရန် နိုင်ငံတော်သမ္မတက မှာကြားခဲ့သည်။