ရေကြီးမှုကြောင့် ပျက်စီးသွားသည့် ရထားလမ်းများ အမြန်ဆုံးမွမ်းမံပြင်ဆင်ပြီး ရထားခရီးစဥ်များ ပြန်လည်ပြေးဆွဲရာ ညောင်လေးပင်မြို့နယ်၊ ပိန်းဇလုပ်ဘူတာနှင့် တော်ဝိ ဘူတာအကြား မိုင်တိုင်အမှတ်၊ ၉၈/၄-၅ ကြား တံတားအမှတ်(၁၃၆)ရှိ ရထားလမ်း မိုင်းထောင် ဖောက်ခွဲဖျက်ဆီးခံရပြန်ကြောင်း သိရသည်။
ပဲခူးတိုင်းဒေသကြီး၊ ပဲခူးမြို့နယ်အတွင်း အောက်တိုဘာလ ၇ ရက်နေ့ မှစတင်၍ မိုးသည်းထန်စွာ ရွာသွန်းခဲ့ပြီး ရေကြီးမှုသဘာဝဘေးအန္တရာယ်ကြောင့် ရထားလမ်းများ ပျက်စီးခဲ့သည့်အတွက် မြန်မာ့မီးရထားအနေဖြင့် အမြန်ဆုံးမွမ်းမံပြင်ဆင်မှု ဆောင်ရွက်နိုင်ခဲ့သောကြောင့် အောက်တိုဘာလ ၁၄ ရက်မှစ၍ ရန်ကုန်-မန္တလေးနှင့် ရန်ကုန်-မော်လမြိုင် ရထားလမ်းပိုင်း လူစီးရထားများ၊ ကုန်ရထား ခရီးစဉ်များကို ပုံမှန်ပြန်လည်ပြေးဆွဲပေးလျက်ရှိကြောင်း ပို့ဆောင်ရေးနှင့် ဆက်သွယ်ရေး ဝန်ကြီးဌာန ထံမှ သိရသည်။
ထိုသို့ ပြေးဆွဲလျက်ရှိရာ အောက်တိုဘာလ ၁၆ ရက် ညနေပိုင်းတွင် မန္တလေးမှ ထွက်ခွာလာသော မန္တလေး-ရန်ကုန် အမှတ်(၆)အစုန်အမြန် ရထားသည် ယနေ့ အောက်တိုဘာ ၁၇ ရက် နံနက် ၃ နာရီ ၁၅ မိနစ်ခန့်တွင် ပဲခူးတိုင်းဒေသကြီး၊ ညောင်လေးပင်မြို့ နယ်၊ ပိန်းဇလုပ်ဘူတာနှင့် တော်ဝိ ဘူတာအကြား မိုင်တိုင်အမှတ်၊ ၉၈/၄-၅ ကြားရှိ တံတားအမှတ် (၁၃၆)အနီးသို့အရောက်၌ အမည်မသိလက်နက်ကိုင်များ၏ အစုန်နှင့် အဆန် ရထားလမ်း နှစ်ခုစလုံးအား မိုင်းထောင် ဖောက်ခွဲဖျက်ဆီးထားမှုကိုကြုံတွေ့ခဲ့ရသည်။
ထိုသို့မိုင်းခွဲခံရမှုဖြစ်စဥ်ကြောင့် ရထားပြေးဆွဲနေသော အဆန်ရထားလမ်းနှင့် ပြန်လည် တည်ဆောက်နေသော အစုန်ရထားလမ်းတို့တွင် တပ်ဆင်ထားသည့် သံလမ်းသစ်များ(၂)ပေခန့်စီ ပြတ်တောက် ကွေးကောက်ခြင်း၊ သံလမ်းသစ်(၆)ချောင်းပျက်စီးခြင်း၊ ကွန်ကရစ်ဇလီဖားတုံးများ ပျက်စီးခဲ့ကြောင်း သိရသည်။
အဆိုပါပျက်စီးမှုကြောင့် အမှတ်(၆)အစုန်အမြန်ရထားသည် ပိန်းဇလုပ်ဘူတာသို့ နောက်ပြန်ဆုတ်၍ ခေတ္တရပ်နားခဲ့ရပြီး မန္တလေး-ရန်ကုန် အမှတ်(၄)အစုန် ရထားကိုလည်း ကျောက်တံခါးဘူတာတွင် ခေတ္တရပ်နားထားခဲ့ရကြောင်းသိရသည်။
ပျက်စီးမှုများဖြစ်ပေါ်ခဲ့သည့် ရထားလမ်းများအား မြန်မာ့မီးရထား ဝန်ထမ်းများက အမြန်ဆုံး ပြန်လည်ပြုပြင်ဆောင်ရွက်ခဲ့ရာ ယနေ့ အောက်တိုဘာ ၁၇ ရက် နံနက် ၁၀ နာရီ ၅၀ မိနစ်ခန့်တွင် ပြီးစီးခဲ့သဖြင့် အဆိုပါရထားများ ပုံမှန်ပြန်လည်ပြေးဆွဲနိုင်ပြီဖြစ်ကြောင်း သိရသည်။
အမည်မသိလက်နက်ကိုင်များသည် ၂၀၂၁ ခုနှစ်၊ ဖေဖော်ဝါရီလ(၁)ရက်နေ့မှ စ၍ လက်ရှိအချိန်အထိ မြန်မာ့မီးရထားလမ်းကွန်ယက်တစ်ခုလုံးတွင် ရထားလမ်းနှင့် ရထားဘူတာ နယ်မြေအတွင်း ဗုံးထောင် မိုင်းခွဲ/ တွေ့ရှိခြင်း(၁၂၆)ကြိမ်၊ ရထားတံတားများအား မိုင်းခွဲဖျက်ဆီးခြင်း (၄၅) ကြိမ်၊ ဘူတာအဆောက်အဦနှင့် ဝန်ထမ်းနေအိမ်များအား မီးရှို့ဖျက်ဆီးခြင်း(၁၂)ကြိမ် ကျူးလွန်ခဲ့ကြပြီး ဖြစ်ကြောင်း နစက၏ စာရင်းအချက်အလက်များအရ သိရသည်။
