ရန်ကုန်၌ ဖြစ်ပွားခဲ့သည့် ပြင်းထန်ဝမ်းပျက်ဝမ်းလျှောရောဂါ ၁၈ ရက်အတွင်း အောင်မြင်စွာ ထိန်းချုပ်နိုင်

ရန်ကုန်၊ စက်တင်ဘာ ၂

ရန်ကုန်တိုင်းဒေသကြီးအတွင်း ဖြစ်ပွားခဲ့သည့် ပြင်းထန်ဝမ်းပျက်ဝမ်းလျှောရောဂါကို ၁၈ ရက်အကြာတွင် အောင်မြင်စွာ ထိန်းချုပ်နိုင်ခဲ့ပြီး ဆေးရုံတက်ရောက်ကုသရသည့် လူနာဦးရေ သိသိသာသာ လျော့နည်းသွားပြီဖြစ်ကြောင်း တိုင်းဒေသကြီး ပြည်သူ့ကျန်းမာရေးနှင့် ကုသရေးဦးစီးဌာနမှ တာဝန်ရှိသူများ၏ ပြောကြားချက်အရ သိရသည်။

အဆိုပါ ပြင်းထန်ဝမ်းပျက်ဝမ်းလျှောရောဂါသည် ဩဂုတ် ၁၀ ရက်ခန့်မှစတင်၍ ပြည်သူလူထုအတွင်း ဖြစ်ပွားမှု များပြားလာခဲ့ခြင်းဖြစ်သည်။

ယင်းသို့ ရောဂါဖြစ်ပွားမှုများပြားလာချိန်တွင် တိုင်းဒေသကြီး ပြည်သူ့ကျန်းမာရေးနှင့် ကုသရေးဦးစီးဌာနအောက်ရှိ ဝန်ထမ်းများ၊ ခရိုင်အသီးသီးမှ ဝန်ထမ်းများနှင့် နေပြည်တော်မှ ကူညီပံ့ပိုးမှုများဖြင့် လျင်မြန်တုံ့ပြန်ဆောင်ရွက်ရေးအဖွဲ့ (Rapid Response Team – RRT) အဖြစ် စုဖွဲ့ကာ မြေပြင်ကွင်းဆင်း၍ ကာကွယ်ရေးနှင့် ကုသရေးလုပ်ငန်းများကို အရှိန်အဟုန်မြှင့် ဆောင်ရွက်ခဲ့ကြသည်။

ကျန်းမာရေးဝန်ထမ်းများသည် မြို့နယ်အလိုက် ရောဂါဖြစ်ပွားမှုများသည့် လမ်း၊ ရပ်ကွက်များနှင့် အိမ်ထောင်စုများထံ အိမ်တက်ဆင်း ကွင်းဆင်းကာ ရောဂါထိန်းချုပ်ရေး လုပ်ငန်းများကို ဆောင်ရွက်ခဲ့ရာ ဩဂုတ် ၂၈ ရက် (၁၈ ရက်အကြာ) တွင် ရောဂါဖြစ်ပွားမှုကို ကောင်းမွန်စွာ ထိန်းချုပ်နိုင်ခဲ့ကြောင်း သိရသည်။

ဒုတိယအဆင့်အနေဖြင့် ကုသရေးဦးစီးဌာနအောက်ရှိ ဆေးရုံများမှ သူနာပြုများနှင့် RRT အဖွဲ့ဝင် အယောက် ၈၀ ခန့်ဖြင့် ကူညီကုသမှုများ ဆက်လက်ဆောင်ရွက်ပေးလျက်ရှိပြီး ဆေးဘက်နှီးနွှယ်အဖွဲ့များ၊ မြို့နယ်အလိုက် RRT အဖွဲ့များကိုလည်း အဆင်သင့်ပြင်ဆင်ထားရှိကာ ရောဂါကာကွယ်စောင့်ရှောက်မှုများကို ဖိဖိစီးစီး ဆက်လက်ဆောင်ရွက်လျက်ရှိသည်။

ပြင်းထန်ဝမ်းပျက်ဝမ်းလျှောရောဂါသည် အလွယ်တကူ ကူးစက်နိုင်ပြီး အချိန်မီ မကုသပါက အသက်အန္တရာယ်ထိခိုက်နိုင်သဖြင့် မိုးရာသီကာလအတွင်း ရောဂါလက္ခဏာ ဖြစ်ပွားပါက နီးစပ်ရာ ကျန်းမာရေးဌာန သို့မဟုတ် ဆေးရုံ၊ ဆေးခန်းများသို့ ချက်ချင်းသွားရောက်၍ ထိရောက်သည့် ကုသမှု ခံယူကြရန် ကျန်းမာရေးဝန်ကြီးဌာနက အသိပေးနှိုးဆော်ထားသည်။