ရန်ကုန်မြို့တွင်းကို နိုင်ငံတော်သမ္မတ ကြည့်ရှုစစ်ဆေး

ကားလမ်းများလမ်းနယ်နိမိတ်စနစ်တကျဖြစ်စေရေးဆောင်ရွက်ရန်မှာကြား

နိုင်ငံတော်သမ္မတ ဦးမင်းအောင်လှိုင်သည် ယနေ့ မေ ၂ ရက်နံနက်ပိုင်းက လှိုင်သာယာမြို့နယ်အပါအဝင် ရန်ကုန်မြို့တွင်း မြို့ပြဖွံ့ဖြိုးတိုးတက်ရေးလုပ်ငန်းများနှင့် မြို့သန့်ရှင်းသာယာလှပရေးလုပ်ငန်းများဆောင်ရွက်ထားမှုကို ကြည့်ရှုစစ်ဆေးခဲ့သည်။

လှိုင်သာယာမြို့နယ်အတွင်း သန့်ရှင်းသာယာလှပရေးနှင့် ရေစီးရေလာကောင်းမွန်စေရေးဆောင်ရွက်ထားမှုကိုကြည့်ရှုစစ်ဆေးပြီး ရန်ကုန်-ပုသိမ်လမ်းမကြီးဘေးရှိ ရေနုတ်မြောင်းနှင့် ပလက်ဖောင်းကြား၌ အရိပ်ရပင်များစိုက်ပျိုးရန်၊ ရေစီးရေလာကောင်းမွန်စေရေး စဉ်ဆက်မပြတ်ပြုပြင်ထိန်းသိမ်းဆောင်ရွက်ရန် မှာကြားခဲ့သည်။

ထို့ပြင် နိုင်ငံတော်သမ္မတသည် လှိုင်သာယာမြို့နယ်၊ ဗိုလ်အောင်ကျော်လမ်း၊ ညောင်တုန်းလမ်း၊ တပင်ရွှေ ထီးလမ်း၊ ကနောင်မင်းသားကြီးလမ်း၊ ခရေပင်လမ်းတစ်လျှောက် လမ်းအဆင့်မြှင့်တင်ခြင်းနှင့် လမ်းအင်္ဂါရပ်နှင့်အညီဖြစ်စေရေးဆောင်ရွက်ထားမှု၊ ရွှေပြည်သာမြို့နယ်၊ အမှတ်(၄)လမ်းတစ်လျှောက် ရေနုတ်မြောင်းများအဆင့်မြှင်တင်လျက်ရှိမှု၊ လမ်းနှင့်မလွတ်ကင်းသည့် ဓာတ်အားတိုင်များအားရွှေ့ပြောင်းထားမှုနှင့် လမ်းများအဆင့်မြှင့်တင်တိုးချဲ့ထားမှုတို့ကို ကြည့်ရှုစစ်ဆေးခဲ့သည်။

ထို့အတူ မင်္ဂလာဒုံမြို့နယ်၊ လှော်ကားလမ်း၊ ပြည်လမ်း၊ နွယ်ခွေလမ်းမှတဆင့် အမှတ်(၃)လမ်းမကြီး၊ မြောက်ဥက္ကလာပမြို့နယ် သုဓမ္မာလမ်းတစ်လျှောက် လမ်းနယ်အတွင်းကျူးကျော်ရောက်ရှိနေသည့် အခိုင်အမာအဖီအဆွယ်ဈေးဆိုင်ခန်းများအား စနစ်တကျဖြစ်စေရေးနှင့် လမ်းနယ်နိမိတ်ပြင်ပသို့ ပြန်လည်ရွှေ့ပြောင်းပြီးစီးမှုတို့ကိုလည်း ကြည့်ရှုစစ်ဆေးခဲ့သည်။

ထိုသို့ ကြည့်ရှုစစ်ဆေးပြီးနောက် နိုင်ငံတော်သမ္မတက ကားလမ်းများလမ်းနယ်နိမိတ်စနစ်တကျဖြစ်စေရေး၊ လမ်းအင်္ဂါရပ်နှင့်အညီဖြစ်စေရေးဆောင်ရွက်ရန် မှာ ကြားခဲ့သည်။