လျှပ်စစ်ပြတ်တောက်မှုများကြောင့် လှည်းကူးဓာတ်အားလိုင်းမှ ယာယီဓာတ်အားပေးကာ ရေတွန်းစက်ကြီးများ မောင်းနှင်ပေးလျက်ရှိ
ရန်ကုန်၊ဇူလိုင်-၂၂
ရန်ကုန်မြို့တွင်း ရေပေးဝေမှုလုပ်ငန်းစဉ်များ အမြန်ဆုံးပုံမှန်ပြန်ဖြစ်ရေး ကြိုးပမ်းဆောင်ရွက်နေကြောင်း ရန်ကုန်မြို့တော် စည်ပင်သာယာရေးကော်မတီမှ ထုတ်ပြန်ထားသည်။
ရန်ကုန်မြို့တော် စည်ပင်သာယာရေးကော်မတီ၊ အင်ဂျင်နီယာဌာန (ရေနှင့်သန့်ရှင်းမှု) က ရန်ကုန်မြို့နေပြည်သူများ သန့်ရှင်းသော သောက်သုံးရေ ရရှိစေရန် ရေအရင်းအမြစ် (၃) ခုဖြစ်သည့် လှော်ကားရေလှောင်ကန်၊ငမိုးရိပ်ရေသန့်သင်စက်ရုံ(ညောင်နှစ်ပင်) နှင့် လဂွန်းပြင်ရေသန့်စင်စက်ရုံတို့မှ အဓိကထား မောင်းနှင်ဖြန့်ဖြူးပေးလျက်ရှိကြောင်း သိရသည်။
အဆိုပါ ရေအရင်းအမြစ် (၃) ခုရှိ ရေတွန်းစက်ကြီးများ မောင်းနှင်ရန် လိုအပ်သော လျှပ်စစ်ဓာတ်အားကို လှော်ကားမဟာဓာတ်အားခွဲရုံခွဲမှ ရယူလျက်ရှိရာ ယခု ဇူလိုင်လဆန်းပိုင်းမှစ၍ စက်ပိုင်းဆိုင်ရာ ချို့ယွင်းမှုများနှင့် ဓာတ်အားလိုင်း ပြတ်တောက်မှုများ ဖြစ်ပွားခဲ့ကြောင်း အသိပေးထုတ်ပြန်ထားသည်။
အဆိုပါ လျှပ်စစ်ဓာတ်အား ပြတ်တောက်မှုများကြောင့် ရေတွန်းစက်ကြီးများ ပုံမှန်မောင်းနှင်နိုင်ခြင်း မရှိခဲ့ဘဲ၊ လက်ရှိတွင် လှည်းကူးဓာတ်အားလိုင်းမှတစ်ဆင့် ယာယီဓာတ်အား ရယူကာ ရေပေးဝေမှုလုပ်ငန်းများအား ပြန်လည်ပတ်နိုင်ရန် လျင်မြန်စွာ စီမံဆောင်ရွက်လျက်ရှိကြောင်း အသိပေးထုတ်ပြန်ထားသည်။
ရန်ကုန်မြို့တော် စည်ပင်သာယာရေးကော်မတီအနေဖြင့် ရေပေးဝေမှုလုပ်ငန်းများ ပုံမှန်အခြေအနေအတိုင်း အမြန်ဆုံးပြန်လည်ရောက်ရှိရေး ကြိုးပမ်းဆောင်ရွက်လျက်ရှိပြီး၊ မိဘပြည်သူများအနေဖြင့် ရေရရှိမှုနှင့် ပတ်သက်၍ အခက်အခဲတစ်စုံတစ်ရာ ရှိပါက သက်ဆိုင်ရာ ခရိုင်အလိုက် ဖုန်းနံပါတ်များသို့ ဆက်သွယ်အကြောင်းကြားနိုင်ကြောင်း အသိပေးထားသည်။