ရန်ကုန်မြို့တွင်း၌ ရှိသည့် ကေတီဗီ(KTV)၊ ဘားနှင့် ကလပ်များကို ယခု မေလကုန်ပိုင်းကစပြီး ည (၁၁) နာရီနောက်ဆုံးထား ပိတ်ခိုင်းနေကြောင်း စုံစမ်းသိရှိရသည်။
“အချိန်သတ်မှတ်ပြီး ဖွင့်ဖို့ စည်ပင်နဲ့ အုပ်ချုပ်ရေးမှူးတွေက လိုက်ပြောတာ” ဟု အချိန်ပြောင်းလဲ သတ်မှတ်ဖွင့်လိုက်သည့် ဆိုင်ရှင်တစ်ဦးက ပြောသည်။
လက်ရှိ၌ ရန်ကုန်မြို့တွင် ကလပ်အချို့သည် ညနေ ၅နာရီမှ ၁၁ နာရီထိသာ အချိန်ပြောင်းလဲ ဖွင့်လှစ်မည်ဟု ကြေညာထားကြသည်။
အလားတူ ဘားများရှိ ဖျော်ဖြေရေးတီးဝိုင်းများကိုလည်း ဆိုင်ပိတ်ချိန် ၁၁ နာရီမတိုင်ခင် ၁၀ နာရီကတည်းက တီးခတ်သီဆိုဖျော်ဖြေမှုများ ရပ်ရန် ဒေသန္တရအမိန့်ဟု ဆိုကာ ညွှန်ကြားမှုများ ရှိနေသည်ဟု သိရသည်။
ထိုနည်းတူ လူစည်ကားခဲ့သည့် ရန်ကုန်မြို့ ၁၉ လမ်း လမ်းမပေါ်ရှိ လမ်းဘေးဆိုင်များကိုလည်း အစိုးရ၏ ရက်၁၀၀ စီမံချက်အရ ရှင်းလင်းထားသည်မှာလည်း ရက်သတ္တပတ်နီးပါးရှိလာပြီ ဖြစ်သည်။