ယနေ့ကွယ်လွန်သွားသည့် စာရေးဆရာ/ဇါတ်ညွှန်းရေးဆရာပိုက်ထွေး(သရုပ်ဆောင် ညိုမင်းလွင်၏ဖခင် ) နှင့်ပတ်သက်၍ဆရာဟိန်းလတ်က အမှတ်တရများရေးသားရင်း အလွမ်းတို့ကို ဖြေသိမ့်လိုက်သည်ကို ပေါ်ပြူလာက မျှဝေလိုက်ပါသည်။
သူငယ်ချင်း ပိုက်တွေး နေ့လည်ကဆုံးပြီတဲ့။ သူကစာရေးဆရာ/ဇါတ်ညွှန်းရေးဆရာ။ သူ့ကိုသာလူသိနည်းမယ်။ သူ့သားကတော့နာမည်ကျော်ရုပ်ရှင်/ဗီဒီယိုဒါရိုက်တာ သရုပ်ဆောင် ညိုမင်းလွင်။
ပိုက်ထွေးနဲ့ကျွန်တော်သိတာ နှစ်ငါးဆယ်ကျော်ပြီ။ အလုံသားအချင်းချင်းမို့ခင်မင်ကြတယ်။ ၁၉၇၃/၇၄ ကတည်းက သူက ပိုက်ထွေးနာမည်နဲ့ သွေးသောက်မဂ္ဂဇင်းမှာဝတ္တုတွေရေးနေပြီ။ သူ့နာမည်ရင်းက ကိုအောင်ဝင်း။ လူပုံဟန်ဖြူဖြူနွဲ့နွံ့မင်းသားပုံ။
သူနဲ့ကိုယ်တို့တစ်စု ညတိုင်း စက်တွင်းလမ်းထိိပ်က ရွှေဘဏ္ဏာ လက်ဖက်ရည်ဆိုင်မှာ ထိုင်ကြ။ စာပေအနုပညာအကြောင်းပြောကြ။ ကိုယ်နဲ့ထိန်လင်း (လင်းသူ)ကမိုးဝေမှာရေးနေကြပြီ။ ပိုက်ထွေးက မောင်မောက်(ဥက္ကလာ) ၊နေဝင်းလှု(အဆိုတော်ကိုတင်လှိုင်ရဲ့ညီ)၊သမုဒ္ဒရာစာပေထွန်းညွန့်(ယခုထိုင်ဝမ်)တို့နဲ့ကအတွဲပေါ့။
ပိုက်ထွေးကအနေအေးတယ်။ အမြဲပြုံးနေတတ်တယ်။ ကျွန်တော်အလုံကပြောင်းလာပြီးနောက်မှာပြောင်းတဲ့နေရာတိုင်းလာလည်တယ်။ အိမ်ကမိသားစုနဲ့ပါခင်တယ်။ ကျွန်တော်ပေါ်ပြူလာဂျာနယ်မှာလုပ်တော့ အလာပိုစိတ်တယ်။ စာမူတွေလာပေးတယ်။ Skynetကိုပြောင်းတော့လည်းလာတာပဲ။
ငယ်ပေါင်းတွေဆိုတော့တစ်ယောက်နဲ့တစ်ယောက်တခါမှအပြစ်မမြင်ကြဘူးလေ။ ခင်မင်ချစ်ခင်သံယောဇဉ်ပဲရှ်ကြတာ။
ညိုမင်းလွင်ရိုက်တဲ့ကားတွေမှာအင်္ဂလိပ်ဘာသာပြန်subtitleတွေကိုသူပဲရေးတယ်။ ညိုမင်းလွင်ရုပ်ချောတာ၊စာပေအနုပညာဝါသနာပါတာက ပိုက်ထွေးရဲ့အမွေရတာပဲ။
ခုတော့နှစ်ငါးဆယ်ကြာမိတ်ဆွေကြီးခွဲခွါသွားပြီပေါ့။ သူငယ်ချင်းပိုက်ထွေးကောင်းရာသုဂတိလားပါစေ။
ဟိန်းလတ်
