နိုင်ငံတစ်ဝှမ်းအရေးပေါ်အခြေအနေသတ်မှတ်ထားသည့် (၆)လသက်တမ်းကုန်ဆုံးသည့် ယနေ့ ဇန်နဝါရီ ၃၁ ရက်တွင် နိုင်ငံတော်အမျိုးသားကာကွယ်ရေးနှင့် လုံခြုံရေးကောင်စီအစည်းအဝေး (၁/၂၀၂၅)ကို နံနက် ၁၀ နာရီက နေပြည်တော်၌ ကျင်းပခဲ့ကြောင်း သိရသည်။
အစည်းအဝေးသို့ နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ယာယီသမ္မတ(တာဝန်)၊ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်၊ ပြည်သူ့လွှတ်တော်ဥက္ကဋ္ဌ ဦးတီခွန်မြတ်နှင့်တာဝန်ရှိသူများတက်ရောက်ခဲ့ကြကြောင်း သိရသည်။
အစည်းအဝေးတွင် ယာယီသမ္မတ(တာဝန်)၊ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်မှ ယခင် (၆)လအတွင်းဆောင်ရွက်ခဲ့မှုများကိုရှင်းလင်းပြောကြားပြီးနောက် မိမိတို့အားလုံးရည်မှန်းထားသည့် အထွေထွေ ရွေးကောက်ပွဲကြီးအောင်မြင်စွာကျင်းပနိုင်ရေးအတွက် ဆက်လက်လုပ်ဆောင်ရန်ကျန်ရှိနေသေးသည်ကိုတွေ့ရှိရသည်ဟု ပြောသည်။
” အဓိကအားဖြင့် လွတ်လပ်ပြီးတရားမျှတမှုအပြည့်နဲ့ကျင်းပနိုင်မယ့် အထွေထွေရွေးကောက်ပွဲတစ်ရပ်ဖြစ်စေဖို့အတွက် တည်ငြိမ်အေးချမ်းမှုလိုအပ်နေသေးတာရယ် လုပ်ဆောင်ဖို့လိုအပ်ချက်တွေကို အရှိန်အဟုန်မပျက်ဆက်လက်လုပ်ဆောင်နိုင်ဖို့ တာဝန်ထမ်းဆောင်ခွင့်ကိုထပ်မံပြီး ၆ လသက်တမ်းတိုးမြှင့်ပေးနိုင်ဖို့တင်ပြပါတယ်”ဟု ဗိုလ်ချုပ်မှူးကြီးမင်းအောင်လှိုင်က ရှင်းလင်းပြောကြားသည်။
ထိုသို့ ရှင်းလင်းပြောကြားမှုအား အမျိုးသားကာကွယ်ရေးနှင့် လုံခြုံရေးကောင်စီအဖွဲ့ဝင်များ၊ အထူးဖိတ်ကြားထားသူများက ဝိုင်းဝန်းသုံးသပ်ဆွေးနွေးခဲ့ကြပြီးနောက် ယာယီသမ္မတ(တာဝန်) တပ်မတော်ကာကွယ်ရေးဦးစီးချုပ်အပါအဝင်အမျိုးသားကာကွယ်ရေးနှင့် လုံခြုံရေးကောင်စီအဖွဲ့ဝင်များအားလုံးက ဖွဲ့စည်းပုံအခြေခံဥပဒေ (၂၀၀၈)ခုနှစ် ပုဒ်မ ၄၂၅ နှင့်အညီ “နိုင်ငံတစ်ဝန်းလုံးအရေးပေါ်အခြေအနေကြေညာထားသည့် ကာလကို နောက်ထပ် ၆ လတိုးမြှင့်သတ်မှတ်ကြောင်း”တစ်ညီတစ်ညွတ်တည်းဆုံးဖြတ်ခွင့်ပြုပေးခဲ့ကြကြောင်း သိရသည်။