ယခုရာသီသည် သရက်သီးမှည့်များ လှိုင်လှိုင်ပေါ်သည့် ရာသီသို့ ရောက်လာပြီဖြစ်ပြီး ယခုနှစ်သရက်ရာသီတွင် ဈေးကွက်အတွင်း၌ စိန်တလုံးသရက်သီးများ ဈေးကောင်းရနေကြောင်း သရက်သီးစိုက်တောင်သူများ၏ ပြောပြချက်အရ သိရသည်။
သရက်သီးကို မန္တလေးတိုင်းဒေသကြီးတွင် စိန်တလုံး၊ ရွှေဟင်္သာနှင့် ရင်ကွဲစသည့် သရက်သီးမျိုးကွဲများကို စီးပွားဖြစ်စိုက်ပျိုးပြီး အခြားဒေသများတွင်လည်း မျိုးကွဲအနည်းငယ်ကို ကိုယ်တိုင်စားသုံးရန်အတွက် အိမ်ခြံဝင်းများတွင် စိုက်ပျိုးကြရာ ကျောက်ဆည်ခရိုင်တွင် စိုက်ပျိုးမှုအများဆုံးဖြစ်ပြီး ပြင်ဦးလွင်ခရိုင်တွင် ဒုတိယအများဆုံးစိုက်ပျိုးလျက်ရှိသည်။
ကျောက်ဆည်ခရိုင်၊ ဟံမြင်မိုရ်နှင့် ပြင်ဦးလွင်ခရိုင် ၊ မတ္တရာမြို့နယ်မှထွက်ရှိသည့် အရည်အသွေးအကောင်းဆုံး စိန်တလုံးသရက်သီးများသည် ပြည်တွင်းဈေးကွက်အပြင် ပြည်ပဈေးကွက်သို့ ထိုးဖောက်၍ ဈေးကွက် နေရာရရှိထားပြီးဖြစ်သည်။
ယခုနှစ်သရက်သီးရာသီတွင် သရက်အိတ်စွပ်ဈေးမြင့်တက်လာခြင်း၊ သွင်းအားစုများဈေးမြင့်တက်လာခြင်းကြောင့် သဘာဝအတိုင်းထွက်ရှိမည့် သရက်သီးကိုသာ ခူးဆွတ်မည်ဖြစ်သည့်အတွက် အထွက်နှုန်းနည်းနိုင်ကြောင်း သိရသည်။
စိန်တလုံးသရက်သီးသည် ဧပြီလမှစတင်၍ မေလနှင့် ဇွန်လ အထိထွက်ရှိပြီး ရောင်းဝယ်မှုအနေဖြင့် ပွဲစားများကခြံအထိလာရောက်ဝယ်ယူပြီး မန္တလေးနှင့် ရန်ကုန်ပွဲရုံများသို့တင်ပို့မှုရှိကာ အချို့ခြံရှင်များက ကိုယ်တိုင်မန္တလေးပွဲရုံများသို့ တင်ပို့ရောင်းချမှုရှိကြောင်းလည်း သိရသည်။
သရက်သီးဈေးနှုန်းအနေဖြင့် လတ်တလောတွင် အရည်အသွေးအလိုက် တစ်လုံးလျှင် အနိမ့်ဆုံးဈေး ကျပ် (၃၅၀) မှ (၄၀၀)၊ အမြင့်ဆုံးဈေး ကျပ် (၁၀၀၀) မှ (၁၅၀၀)ကျပ်ခန့်ရှိကြောင်း သိရသည်။
သရက်သီးကို တန်ဖိုးမြှင့်ထုတ်ကုန်များအဖြစ် သရက်ပြင်၊ သရက်သီးဆားစိမ်(ဆီစိမ်)၊ သရက်သီးအနှစ်၊ သရက်သီးခြောက်၊ သရက်ယိုနှင့် သရက်သီးအချဉ်ပေါင်းတို့ကို ထုတ် လုပ်ရောင်းချနေသည့် MSME လုပ်ငန်းရှင်များလည်းရှိကြောင်း သိရသည်။