မြန်မာအမျိုးသမီးကော်ဖီကွန်ရက် (Myanmar Women Coffee Network – MWCN) က ပထမဆုံးအကြိမ် ကြီးမှူးကျင်းပမည့် MWCN Cup Tasters Championship 2026 ပြိုင်ပွဲကို ၂၀၂၆ ခုနှစ် ဇူလိုင် ၂ ရက်နှင့် ၃ ရက်တို့တွင် ရန်ကုန်မြို့ရှိ Yangon Specialty Coffee Hub၊ The Secretariat Yangon ၌ ကျင်းပသွားမည်ဖြစ်ကြောင်း သိရသည်။
အဆိုပါပြိုင်ပွဲသည် မြန်မာ့ကော်ဖီကဏ္ဍ ဖွံ့ဖြိုးတိုးတက်ရေးနှင့် ကော်ဖီဝါသနာရှင်များ၊ ကော်ဖီကျွမ်းကျင်သူများ၏ အရသာခံနိုင်စွမ်း (Sensory Skills) များကို မြှင့်တင်ဖော်ထုတ်ပေးနိုင်ရန် ရည်ရွယ်ကျင်းပခြင်းဖြစ်ကြောင်း MWCN ထံမှ သိရသည်။
ပြိုင်ပွဲတွင် ပါဝင်ယှဉ်ပြိုင်သူများအနေဖြင့် မြန်မာ့ကော်ဖီများ၏ ထူးခြားသည့် အနံ့အရသာများကို အလျင်မြန်ဆုံးနှင့် အမှန်ကန်ဆုံး ခွဲခြားသတ်မှတ်နိုင်စွမ်းကို ယှဉ်ပြိုင်ရမည်ဖြစ်ပြီး ထူးချွန်စွာ အနိုင်ရရှိသူများအား Champion၊ First Runner-Up နှင့် Second Runner-Up ဆုများ ချီးမြှင့်သွားမည်ဖြစ်သည်။
ထို့ပြင် ဂုဏ်ပြုဒိုင်းဆုများ၊ ဂုဏ်ပြုမှတ်တမ်းလွှာများနှင့် အမှတ်တရလက်ဆောင်များကိုလည်း ပေးအပ်သွားမည်ဖြစ်ကြောင်း သိရသည်။
ပြိုင်ပွဲဝင်လိုသူများအနေဖြင့် ၂၀၂၆ ခုနှစ် ဇွန် ၂၅ ရက် နောက်ဆုံးထား၍ သတ်မှတ်ထားသော Google Form မှတစ်ဆင့် စာရင်းပေးသွင်းနိုင်ပြီး ပြိုင်ပွဲဝင်ကြေးအဖြစ် ငွေကျပ် ၁၅၀,၀၀၀ ပေးသွင်းရမည်ဖြစ်သည်။ ပြိုင်ပွဲဝင်များအား အထိမ်းအမှတ် T-Shirt တစ်ထည်ကိုလည်း ပေးအပ်သွားမည်ဖြစ်ကြောင်း သိရသည်။
ထို့အပြင် ပြိုင်ပွဲစည်းမျဉ်းစည်းကမ်းများနှင့် လုပ်ထုံးလုပ်နည်းများကို ပိုမိုနားလည်သဘောပေါက်စေရန် Pre-Competition Workshop ကို ကြိုတင်ကျင်းပပေးသွားမည်ဖြစ်ပြီး Workshop ကျင်းပမည့် နေ့ရက်နှင့် အချိန်ကို မကြာမီ ထပ်မံကြေညာသွားမည်ဖြစ်ကြောင်း သိရသည်။