မြန်မာ-လာအို ချစ်ကြည်ရေးအသင်းအနေဖြင့် မကြာမီ လာအိုသို့ သွားရောက်မည်ဖြစ်ရာ နှစ်နိုင်ငံကြား ပူးပေါင်း ဆောင်ရွက်နိုင်မည့် ကိစ္စရပ်များအတွက် သက်ဆိုင်ရာဝန်ကြီးဌာနများ၊ အသင်းအဖွဲ့များနှင့် တွေ့ဆုံလျှက်ရှိနေသည်။
မြန်မာ-လာအိုချစ်ကြည်ရေးအသင်းမှ ဥက္ကဌ ဦးဝင်းမောင်၊ ဒုဥက္ကဌ ဦးမျိုးအောင်၊ အထွေထွေအတွင်းရေးမှူး ဦးကောင်းဇံ၊ ဘဏ္ဍာရေးမှူး ဦးသာကောင်း၊ အဖွဲ့ဝင် ဦးကျော်လှဝင်း နှင့် ရုံးအဖွဲမှူး ဦးကျော်စံမိုးတို့သည် ယနေ့ ၂၉ရက် နံနက် ၁၀ နာရီတွင် အလုပ်သမားဝန်ကြီးဌာန ပြည်ထောင်စုဝန်ကြီး ဦးအောင်ကျော်ဟိုးနှင့်တွေ့ဆုံဆွေးနွေးကာ ရွေ့ပြောင်းလုပ်သားများ၏ အခွင့်အရေးအတွက် လုပ်ဆောင်ပေးနိုင်မှုများ ဆွေးနွေးခဲ့သည်။
ပြန်ကြားရေးဝန်ကြီးဌာန ပြည်ထောင်စုဝန်ကြီး ဦးမောင်မောင်အုန်းထံသို့ အောက်တိုဘာ ၂၈ ရက်ညနေကသွားရောက်၍ အသင်း၏ ဆောင်ရွက်နေမှုများတင်ပြကာ လာမည့် နိုဝင်ဘာလတွင်း လာအိုနိုင်ငံသို့ ချစ်ကြည်ရေးခရီးသွားရောက်ရာတွင် မီဒီယာကဏ္ဍ အပြန်အလှန်ဆောင်ရွက်နိုင်မည်များအား ညှိနှိုင်းဆွေးနွေးခဲ့ကြသည်။
ထိုနေ့နံနက်က ပြည်ထဲရေးဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီးထွန်းထွန်းနောင်ထံသို့ လည်းကောင်း၊ အောက်တိုဘာ ၂၄ နံနက်က လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးမြင့်ကြိုင်ထံသို့လည်းကောင်း အောက်တိုဘာ ၂၃ရက်နေ့ မွန်းလွဲက နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဦးသန်းဆွေထံသို့ လည်းကောင်း သွားရောက်ခဲ့ကြပြီး လာအိုနိုင်ငံနှင့် ပူးပေါင်းဆောင်ရွက်ရနိုင်မည့် ကိစ္စရပ်များအား ဆွေးနွေးခဲ့ကြသည်။