၂၀၂၄ -၂၀၂၅ မြန်မာနေရှင်နယ်လိဂ် ဘောလုံးရာသီ ပွဲစဉ် (၁၆)အပြီး၌ သွင်းဂိုးအများဆုံးရရှိထားသူ ကစားသမား (၆) ဦးထွက်ပေါ်လာကြောင်း မြန်မာနေရှင်နယ်လိဂ်ကော်မတီက ယနေ့ ဇန်နဝါရီ (၂၃) ရက်တွင် အသိပေးထုတ်ပြန်ထားသည်။
သွင်းဂိုးအများဆုံး ကစားသမားစာရင်းတွင် ဒဂုံပေါ့အက်ဖ်စီအသင်း တိုက်စစ်မှူး Mogou Constantin က သွင်းဂိုး (၁၁) ဂိုးဖြင့် ဦးဆောင်ထားပြီး ၎င်း၏နောက်တွင် မဟာယူနိုက်တက်တိုက်စစ်မှူး ပက်ထရစ်က သွင်းဂိုး (၁၀)ဂိုး ရရှိထားကြောင်း သိရသည်။
ထို့အတူ ဟံသာဝတီယူနိုက်တက်အသင်း မှ အောင်မြတ်သူ၊ ဒဂုံစတားယူနိုက်တက်အသင်းမှ ဆွမ်လမ်မန် ၊ ISPE အသင်းမှ သိန်းဇော်သီဟနှင့် ရန်ကုန်ယူနိုက်တက်အသင်းမှ ရန်ကျော်ထွေးတို့က (၉)ဂိုးစီဖြင့် အများဆုံး ဂိုးသွင်းယူထားနိုင်ခြင်းဖြစ်သည်။
Myanmar National League 2024-25 အမှတ်ပေးဘောလုံးပြိုင်ပွဲ -Week-16 အပြီး အသင်းအလိုက်အမှတ်ပေးဇယား ရပ်တည်မှုအရ ရှမ်းယူနိုက်တက်အသင်းက ရမှတ် (၄၆)မှတ်ဖြင့် ထိပ်ဆုံးတွင် ရပ်တည်နေပြီး၊ ဟံသာဝတီယူနိုက်တက်အသင်းက ရမှတ်(၃၇)မှတ် ဒုတိယ၊ ရန်ကုန်ယူနိုက်တက်အသင်းက ရမှတ် (၃၅) မှတ်ဖြင့် တတိယနေရာတို့ ရပ်တည်နေခြင်းဖြစ်သည်။
လာမည့် ဖေဖော်ဝါရီလ ဒုတိယပတ်အတွင်း ပြီး ဆုံးတော့မည်ဖြစ်သည့် အဆိုပါပြိုင်ပွဲအား ဇူလိုင် (၆)ရက်မှစတင်ခဲ့ကာ ဘောလုံးကလပ်အသင်း (၁၂)သင်း ပါဝင်ကစားနေကြခြင်းလည်းဖြစ်သည်။
ယခုနှစ် ကျင်းပနေသည့် မြန်မာနေရှင်နယ်လိဂ်ပြိုင်ပွဲသည် (၁၅)ကြိမ်မြောက် ရှိပြီဖြစ်ကာ ၂၀၂၄ ဇူလိုင်လ (၆) ရက်မှ ၂၀၂၅ ဖေဖော်ဝါရီလ (၁၆) ရက်ထိ (၈) လကြာ ကျင်းပပြု လုပ်ခဲ့ခြင်းဖြစ်သည်။