အာဆီယံခရီးသွားလုပ်ငန်းစံနှုန်းဆု စတင်ပေးအပ်ချီးမြှင့်ခဲ့သည့် ၂၀၀၈ ခုနှစ်မှ ၂၀၂၆ ခုနှစ် ဖေဖော်ဝါရီ ၉ ရက်နေ့အထိ ၁၈ နှစ်အတွင်း မြန်မာနိုင်ငံအနေဖြင့် ဆုပေါင်း ၁၅၈ ဆုကို နှစ်အလိုက် ရရှိထားကြောင်း အားကစားနှင့် လူငယ်ရေးရာဝန်ကြီးဌာနနှင့် ဟိုတယ်နှင့်ခရီးသွားလာရေးဝန်ကြီးဌာနတို့မှ သိရသည်။
လက်ရှိအချိန်အထိ စုစုပေါင်း စံနှုန်း(၁၁)ခုအထိ အတည်ပြုထားကာ သက်ဆိုင်ရာစံနှုန်းများအလိုက် ဆုပေးအပ်ခြင်းများကို အာဆီယံအဖွဲ့ဝင်နိုင်ငံများတွင် ကျင်းပပြုလုပ်ပေးခြင်းဖြစ်သည်။
၂၀၂၆ ခုနှစ်၊ ဇန်နဝါရီလ(၃၀)ရက်နေ့တွင် ဖိလစ်ပိုင်နိုင်ငံ၊ စီဘူးမြို့တွင် ကျင်းပပြုလုပ်ခဲ့သည့် အာဆီယံခရီးသွား လုပ်ငန်းဖိုရမ် ၂၀၂၆ တွင် မြန်မာနိုင်ငံဟိုတယ်နှင့်ခရီးသွားကဏ္ဍတို့မှ အာဆီယံခရီးသွားလုပ်ငန်း စံနှုန်းဆု(၂၄)ဆုကို ရရှိခဲ့ခြင်းဖြစ်ကြောင်း သိရသည်။
ထို့ပြင် မြန်မာနိုင်ငံအနေဖြင့် ယင်းခရီးသွားဈေးကွက်ကို ရရှိနိုင်ရန်သာမက အာဆီယံ၏ မိတ်ဖက်နိုင်ငံများ ဖြစ်သည့် တရုတ်၊ ဂျပန်၊ ကိုရီးယား၊ အိန္ဒိယနှင့် ရုရှားနိုင်ငံတို့မှ ခရီးသွားဈေးကွက်ကို ရရှိနိုင်အောင် အားလုံးဝိုင်းဝန်းပူးပေါင်းဆောင်ရွက်ကြရန်အားကစားနှင့် လူငယ်ရေးရာဝန်ကြီးဌာနနှင့် ဟိုတယ်နှင့်ခရီးသွားလာရေးဝန်ကြီးဌာနမှ ပြည်ထောင်စုဝန်ကြီးက တိုက်တွန်းထားသည်။