ရှမ်းပြည်နယ်(မြောက်ပိုင်း)၊ နောင်ချိုမြို့နယ်၊ နောင်ချိုမြို့နှင့် ကျောက်မဲမြို့တို့ကို ဆက်သွယ်ထားသည့် မန္တလေး-လားရှိုးရထားလမ်းပေါ်တွင် ၁၈၉၉ ခုနှစ်၌တည်ဆောက်ပြီး ၁၉၀၀ ခုနှစ်တွင်ပြီးစီးခဲ့ကာ ၁၉၀၃ ခုနှစ်တွင်စတင်အသုံးပြုခဲ့သော အရှည် (၂၂၆၀)ပေရှိ နှစ်ပေါင်း(၁၂၅)နှစ်သက်တမ်းရှိ ကမ္ဘာကျော်ဂုတ်ထိပ်မီးရထားလမ်းတံတားအား TNLA အကြမ်းဖက်အဖွဲ့ဝင်များမှ သြဂုတ် ၂၄ ရက်နံနက်ပိုင်းကမိုင်းထောင်ဖောက်ခွဲဖျက်ဆီးခဲ့ကြသည်။
TNLA အကြမ်းဖက်အဖွဲ့သည် ကျောက်မဲမြို့နှင့်အနီးပတ်ဝန်းကျင်တစ်ဝိုက်ကိုအခြေပြု၍ ဂုတ်ထိပ်တံတားအား မိုင်းထောင်ဖောက်ခွဲဖျက်ဆီးခဲ့ကြသဖြင့် ကျောက်မဲမြို့ဘက်ခြမ်း တံတား၏ကမ်းကပ်ခုံ (AB 2)နှင့် တံတားတိုင်အမှတ်(P 16)နှင့် ကမ်းကပ်ခုံ (AB 2)နေရာတို့ကြား ပေ(၆၀)အရှည်ရှိတံတားသံပေါင်နေရာတို့ပျ-က်စီးခဲ့သည်။
ထို့ကြောင့် လုံခြုံရေးအဖွဲ့ဝင်များက သောင်းကျန်းသူများအမြစ်ပြတ်ချေမှုန်းရေးအတွက် နယ်မြေတည်ငြိမ်အေးချမ်းရေးနှင့် နယ်မြေလုံခြုံရေးလုပ်ငန်းများကို ပြင်းပြင်းထန်ထန် ဆက်လက်ဆောင်ရွက်လျက်ရှိကြောင်း သိရသည်။
ဂုတ်ထိပ်တံတားသည် တံတားအရှည်(၂၂၆၀)ပေ၊ ပင်လယ်ရေမျက်နှာပြင်မှ အမြင့်ပေ(၁၁၀၀)တွင်ရှိပြီး နှစ်ပေါင်း(၁၂၅)နှစ်သက်တမ်းရှိသည့် မီးရထား လမ်းတံတားတစ်ခုဖြစ်ကာ မြန်မာပြည်၏ အမြင့်ဆုံးနှင့် ကမ္ဘာပေါ်တွင် ဒုတိယအမြင့်ဆုံး တံတား၊ ကမ္ဘာ့အကြီးဆုံး မီးရထားသံလမ်းတံတားဟုမှတ် ကျောက်တင်ခံရသည်။
ယင်းတံတားကိုတည်ဆောက်သည့် နည်းပညာအဆင့်မြင့်မှုနှင့် သဘာဝပတ်ဝန်းကျင်လှပမှုတို့ကြောင့် ခေတ်အဆက်ဆက်ထင်ရှားကျော်ကြားခဲ့သော တံတားတစ်စင်းဖြစ်၍ ပြည်တွင်း/ပြည်ပ ခရီးသွားအများအပြားလာရောက်ကြည့်ရှုလေ့လာသော မြန်မာနိုင်ငံ၏ အထင်ကရအမှတ်အသားတစ်ခုဖြစ်ရာ ဂုတ်ထိပ်တံတားအား ခေတ်အဆက်ဆက်တွင် နိုင်ငံတော်အစိုးရနှင့် ဒေသခံပြည်သူများက လက်ဆင့်ကမ်းထိန်းသိမ်းစောင့်ရှောက်ခဲ့ပြီး ကမ္ဘာ့အံ့ဖွယ်စာရင်းများတွင်လည်း ပါဝင်ခဲ့သည်။