မန္တလေးရှိ အရှေ့တောင်အာရှ၏ ပထမဆုံး အခမဲ့အမျိုးသမီးဘောလုံးအကယ်ဒမီတွင် ကျောင်းသူ ၅၁ ဦး လေ့ကျင့်သင်ကြားလျက်ရှိ

မန္တလေး၊ ဩဂုတ် ၁ အရှေ့တောင်အာရှ၏ ပထမဆုံး အခမဲ့အမျိုးသမီးဘောလုံးအကယ်ဒမီဖြစ်သည့် မြန်မာအမျိုးသမီးဘောလုံးအကယ်ဒမီ (မန္တလေး) တွင် နယ်ဒေသအသီးသီးမှ ရွေးချယ်ထားသည့် အသက် ၁၃ နှစ်မှ ၁၅ နှစ်အရွယ် ကျောင်းသူ ၅၁ ဦး လေ့ကျင့်သင်ကြားလျက်ရှိကြောင်း သိရသည်။ မြန်မာနိုင်ငံဘောလုံးအဖွဲ့ချုပ် (MFF) ဥက္ကဋ္ဌ ဦးဇော်ဇော်သည် အကယ်ဒမီသို့ သွားရောက်ကာ အဆောက်အအုံများ၊ လေ့ကျင့်ရေးကွင်းများကို ကြည့်ရှုစစ်ဆေးခဲ့ပြီး ကျောင်းသူများနှင့် တွေ့ဆုံအားပေးခဲ့သည်။ လက်ရှိတွင် ကျောင်းသူများကို မြန်မာ့လက်ရွေးစင်ဟောင်း ဒေါ်သန်းသန်းထွေးနှင့် နည်းပြအဖွဲ့က ဘောလုံးပညာရပ်များ သင်ကြားပေးလျက်ရှိပြီး ပညာရေးပိုင်းအတွက် Grade 8 နှင့် Grade 9 ကျောင်းသူများကို အားကစားနှင့် ကာယပညာသိပ္ပံ (မန္တလေး) တွင်၊ Grade 5 မှ Grade 7 ကျောင်းသူများကို ချမ်းမြသာစည်မြို့နယ်ရှိ အခြေခံပညာအထက်တန်းကျောင်းခွဲ (၁၃) တွင် ဆက်လက်သင်ကြားပေးလျက်ရှိကြောင်း သိရသည်။ တွေ့ဆုံစဉ် MFF ဥက္ကဋ္ဌ ဦးဇော်ဇော်က လာမည့် သုံးနှစ်အတွင်း အာရှ U-17 ခြေစစ်ပွဲများနှင့် အာဆီယံ U-16 ပြိုင်ပွဲများတွင် အောင်မြင်စွာ ယှဉ်ပြိုင်နိုင်ရေး၊ ထို့နောက် FIFA အမျိုးသမီး U-17 နှင့် U-20 ကမ္ဘာ့ဖလား ခြေစစ်ပွဲများအထိ တက်လှမ်းနိုင်ရေးကို ရည်မှန်းထားကြောင်း ပြောကြားပြီး ကျောင်းသူများအား စည်းကမ်းရှိရှိနှင့် အာရုံစိုက်လေ့ကျင့်ကြရန် တိုက်တွန်းခဲ့သည်။ ထို့ပြင် ကျောင်းသူများ၏ လေ့ကျင့်ရေးပိုမိုကောင်းမွန်စေရန် မန္တလေးဘောလုံးအကယ်ဒမီအတွင်းရှိ လေ့ကျင့်ရေးကွင်း နှစ်ကွင်းကို ဧရာဝတီဖောင်ဒေးရှင်းက ကျပ်သိန်း ၈,၀၀၀ ကျော် အကုန်အကျခံ၍ ပြုပြင်မွမ်းမံပေးလျက်ရှိကြောင်း သိရသည်။ မြန်မာအမျိုးသမီးဘောလုံးအကယ်ဒမီကို FIFA နှင့် ဧရာဝတီဖောင်ဒေးရှင်းတို့၏ ပံ့ပိုးကူညီမှုဖြင့် ဖွင့်လှစ်ထားခြင်းဖြစ်ပြီး အရှေ့တောင်အာရှတွင် အခမဲ့တက်ရောက်နိုင်သည့် ပထမဆုံး အမျိုးသမီးဘောလုံးအကယ်ဒမီအဖြစ် ရပ်တည်လျက်ရှိကြောင်း သိရသည်။