ကြာသပတေးနေ့တွင် ဘန်ကောက်မြို့၏ အပူညွှန်းကိန်းသည် ယခုရာသီတွင် ပထမဆုံးအကြိမ်အဖြစ် အလွန်အမင်းအန္တရာယ်ရှိသောဇုန်သို့ ဝင်ရောက်ခဲ့ပြီး အပူချိန် ၅၂ ဒီဂရီဆဲလ်စီးယပ်စ်ထက်မြင့်မားခြင်း သို့မဟုတ် ယင်းပမာဏနှင့် ညီမျှသော အပူဒ-ဏ်ကိုခံစားရသကဲ့သို့ဖြစ်ကြောင်း မြို့တော်အုပ်ချုပ်ရေးအဖွဲ့က သတိပေးခဲ့သည်။
ဘန်ကောက်မြို့တော်အုပ်ချုပ်ရေးအဖွဲ့(BMA) က နံနက် ၇ နာရီခွဲတွင် ယင်းသို့ သတိပေးချက်ထုတ်ပြန်ခဲ့ကာ နေ့လည်ပိုင်းအချိန်များတွင် ပြင်ပလှုပ်ရှားသွားလာမှုများကို ရှောင်ရှားကြရန် လူထုကို တိုက်တွန်းခဲ့သည်။
ခံနိုင်ရည်အားနည်းသော အုပ်စုဝင်များအနေဖြင့် မိမိကိုယ်ကိုယ် အထူးဂရုစိုက်သင့်ကြောင်းလည်း BMA က ပြောကြားခဲ့သည်။
ထိုအုပ်စုဝင်များထဲတွင် အသက် ၅ နှစ်အောက် ကလေးငယ်များ၊ အသက် ၆၀ နှင့်အထက် သက်ကြီးရွယ်အိုများ၊ ကိုယ်ဝန်ဆောင်အမျိုးသမီးများ၊ နာတာရှည်ရောဂါရှိသူများ၊ အဝလွန်သူများ၊ အရက်သောက်သုံးသူများ၊ ပြင်ပအလုပ်သမားများ၊ ပြင်ပလေ့ကျင့်ခန်းလုပ်သူများနှင့် ခရီးသွားများ ပါဝင်သည်။
ကြာသပတေးနေ့တွင် မြို့တော်၏ တရားဝင်အပူချိန်သည် ၃၅ ဒီဂရီဆဲလ်စီးယပ်စ်မှ ၃၈ ဒီဂရီဆဲလ်စီးယပ်စ်အကြား ရှိနိုင်ကြောင်းနှင့် မိုးကြိုးမုန်တိုင်းများဖြစ်နိုင်ခြေ ၂၀ ရာခိုင်နှုန်းဖြစ်ကြောင်း မိုးလေဝသဌာနက ခန့်မှန်းထားသည်။
ဧပြီ ၁ ရက်နေ့မှစ၍ မြို့တော်၏ အပူညွှန်းကိန်းသည် အန္တရာယ်ဇုန်တွင် ရှိနေခဲ့ပြီး လူခန္ဓာကိုယ် အမှန်တကယ်ခံစားရနိုင်သော အပူချိန်သည် ၄၂ ဒီဂရီဆဲလ်စီးယပ်စ်မှ ၅၁ ဒီဂရီဆဲလ်စီးယပ်စ်အတွင်းရှိသည့်အခြေအနေဖြစ်သည်။
ဘန်ကောက်မြို့တွင် အပူဒ-ဏ်ကို ကျော်လွှားရန်အတွက် မြို့တစ်ဝန်းတွင် အအေးပေးစင်တာများ ဒါဇင်နှစ်ချီ၍ ဖွင့်လှစ်ထားကြောင်း သိရသည်။
Ref: ဘန်ကောက်ပို့စ်