ဗြိတိန်ဝန်ကြီးချုပ် ကီယာ စတားမားရဲ့ နိုင်ငံရေးအဖွဲ့ဟာ အောက်လွှတ်တော်အမတ် အန်ဒီ ဘန်ဟမ် ရဲ့ လူယုံတွေဆီကို တာဝန်တွေ စတင်လွှဲပြောင်းပေးနေပြီလို့ သတင်းရင်းမြစ်တွေကို ကိုးကားပြီး The Guardian သတင်းစာက ဖော်ပြထားပါတယ်။ ဒီလှုပ်ရှားမှုဟာ ဗြိတိန်နိုင်ငံမှာ အာဏာလွှဲပြောင်းမှုတစ်ခု မကြာခင် ဖြစ်လာတော့မယ်ဆိုတာကို ပြသနေတာပါ။
သတင်းစာရဲ့ အဆိုအရ လန်ကတ်စတာ နယ်စားမြေဆိုင်ရာ အဓိပတိ(Chancellor of the Duchy of Lancaster)ဖြစ်တဲ့ ဒါရင် ဂျုံးစ်ဟာ ဘန်ဟမ်အဖွဲ့ရဲ့ အဓိကလူတစ်ယောက်ဖြစ်တဲ့ ဗြိတိန်သယ်ယူပို့ဆောင်ရေးဝန်ကြီးဟောင်း လူဝစ် ဟိတ်ဂ် နဲ့ တွေ့ဆုံခဲ့ပြီးပြီလို့ သိရပါတယ်။ ဒါ့အပြင် ပြီးခဲ့တဲ့ ဇွန်လ ၂၀ ရက်နေ့က ဝန်ကြီးချုပ် စတားမားနဲ့ သူ့ရဲ့ အနီးကပ်အဖွဲ့ဝင်တွေဟာ ရာထူးက နုတ်ထွက်မယ့်အကြောင်း ကြေညာမယ့် မိန့်ခွန်းကို စတင်ရေးဆွဲနေကြပြီလို့လည်း သတင်းမှာ ဖော်ပြထားပါတယ်။ ဒါပေမဲ့ စတားမားအနေနဲ့ ဘန်ဟမ်နဲ့ စကားပြောချင်တယ်လို့ လူသိရှင်ကြား ပြောထားခဲ့ပေမယ့်လည်း၊ ဘန်ဟမ် အောက်လွှတ်တော် ကြားဖြတ်ရွေးကောက်ပွဲမှာ နိုင်ပြီးကတည်းက အခုထိ နှစ်ယောက်ကြား စကားမပြောရသေးဘူးလို့ သတင်းစာက ဆိုပါတယ်။
ဂရိတ်တား မန်ချက်စတာမြို့တော်ဝန်ဟောင်းလည်းဖြစ်၊ လေဘာပါတီဝင် နိုင်ငံရေးသမားတစ်ဦးလည်းဖြစ်တဲ့ ဘန်ဟမ်ဟာ ဇွန်လ ၁၈ ရက်နေ့က ကျင်းပခဲ့တဲ့ အောက်လွှတ်တော် ကြားဖြတ်ရွေးကောက်ပွဲမှာ အနိုင်ရရှိခဲ့ပြီးနောက်ပိုင်း၊ စတားမား ရာထူးက နုတ်ထွက်နိုင်ခြေရှိတယ်ဆိုတဲ့ သတင်းတွေ ပိုပြီးအရှိန်မြင့်လာခဲ့တာပါ။ ဒီနိုင်ပွဲကြောင့် ဘန်ဟမ်အတွက် လက်ရှိအာဏာရ လေဘာပါတီရဲ့ ခေါင်းဆောင်အဖြစ် စတားမားကို စိန်ခေါ်ဖို့ အခွင့်အရေး ရသွားခဲ့ပါတယ်။ ဝန်ကြီးချုပ် စတားမားဟာ လက်ရှိမှာ ပါတီတွင်းက လက်ဝဲအုပ်စုရဲ့ ထောက်ခံမှုတွေကို ဆုံးရှုံးနေရတာလည်း ဖြစ်ပါတယ်။
လေဘာပါတီရဲ့ စည်းမျဉ်းအရ အောက်လွှတ်တော်အမတ်အဖြစ် လက်ရှိတာဝန်ထမ်းဆောင်နေသူပဲ ပါတီခေါင်းဆောင် ဖြစ်ခွင့်ရှိတာပါ။ ဒါကြောင့်လည်း ဘန်ဟမ်ဟာ ပါတီခေါင်းဆောင်နေရာကို စိန်ခေါ်ဖို့နဲ့ ဝန်ကြီးချုပ်နေရာကို အစားထိုးဝင်ရောက်ဖို့အတွက် အောက်လွှတ်တော်မှာ အမတ်နေရာ အရင်ဆုံး ရအောင်ယူခဲ့ရတာ ဖြစ်ပါတယ်။ The Times သတင်းစာရဲ့ အဆိုအရ ဘန်ဟမ်ဟာ လေဘာပါတီ အောက်လွှတ်တော်အမတ်တွေရဲ့ ထောက်ခံမှုကို အနည်းဆုံး ထက်ဝက်ကျော် (အမတ် ၂၀၀ ကျော်) ရရှိထားတယ်လို့ သိရပါတယ်။
ရာထူးက နုတ်ထွက်နိုင်ခြေ
သတင်းရင်းမြစ်တွေကို ကိုးကားပြီး The Observer အပတ်စဉ်သတင်းစာက တနင်္ဂနွေနေ့မှာ ဖော်ပြခဲ့တာကတော့ စတားမားဟာ အစောဆုံဆိုရင် ဇွန်လ ၂၂ ရက်နေ့မှာပဲ ရာထူးက နုတ်ထွက်ကြောင်း ကြေညာနိုင်တယ်လို့ ဆိုပါတယ်။ တကယ်လို့ အဲဒီလိုမကြေညာရင် ဇွန်လ ၂၃ ရက်နေ့မှာ ကျင်းပမယ့် အစိုးရအဖွဲ့ အစည်းအဝေးမှာ ရာထူးက ဆင်းပေးဖို့ လူသိရှင်ကြား တောင်းဆိုတာတွေကို ရင်ဆိုင်ရနိုင်တယ်လို့ သတင်းစာက ဖော်ပြပါတယ်။
စတားမားဟာ အာဏာလွှဲပြောင်းမှုကို စနစ်တကျ ဖြစ်စေချင်တဲ့အတွက် သူ ဘယ်တော့ ရာထူးက ထွက်မလဲဆိုတဲ့ အချိန်ဇယားကို ချမှတ်ပေးဖို့ ရည်ရွယ်ထားတယ်လို့ The Observer က ပြောပါတယ်။ သူဟာ စက်တင်ဘာလ လေဘာပါတီ ညီလာခံ မတိုင်ခင်မှာ ရာထူးကနေ တရားဝင် နှုတ်ထွက်သွားဖို့ ရှိနေပါတယ်။ ဒီလို အချိန်ဇယားမျိုးက ဘန်ဟမ်အတွက် သူ့ရဲ့ နိုင်ငံရေးအဖွဲ့ကို အသေအချာ ဖွဲ့စည်းဖို့နဲ့ အမှတ် ၁၀ ဒေါင်းနင်းလမ်း(ဝန်ကြီးချုပ်အိမ်တော်) ကို ပြောင်းရွှေ့ဖို့ ပြင်ဆင်ဖို့ အချိန်ရစေတာကြောင့် သူ့အတွက် ပိုအဆင်ပြေစေတယ်လို့ The Guardian က ထောက်ပြထားပါတယ်။
ဗြိတိန်ရဲ့ နိုင်ငံရေးအကျပ်အတည်းဟာ မေလ ၇ ရက်နေ့က ကျင်းပခဲ့တဲ့ ဒေသန္တရရွေးကောက်ပွဲတွေအပြီးမှာ ပိုပြီး ပြင်းထန်လာခဲ့တာပါ။ အဲဒီရွေးကောက်ပွဲမှာ လေဘာပါတီဟာ ဝေလပြည်နယ်ကိုယ်ပိုင်ဥပဒေပြုလွှတ်တော် (Welsh Parliament) ရဲ့ ထိန်းချုပ်ခွင့်ကို ပထမဆုံးအကြိမ် ဆုံးရှုံးခဲ့ရပါတယ်။ အင်္ဂလန်တစ်ဝန်းလုံးမှာလည်း အရင်ကထက်စာရင် ဥပဒေပြုလွှတ်တော်အသီးသီးမှာ လေဘာပါတီရဲ့ ကိုယ်စားလှယ်နေရာ ၁,၄၀၀ ကျော်အထိ လျော့နည်းသွားခဲ့ပါတယ်။ အဲဒီတုန်းက စတားမားက ရွေးကောက်ပွဲ ရှုံးနိမ့်မှုအတွက် တတာဝန်ယူခဲ့ပေမယ့် လေဘာပါတီခေါင်းဆောင် ဒါမှမဟုတ် ဝန်ကြီးချုပ်ရာထူးကနေ နှုတ်ထွက်ဖို့ကိုတော့ ငြင်းဆန်ခဲ့ပါတယ်။
လက်ရှိမှာ လေဘာပါတီ အောက်လွှတ်တော်အမတ် ၁၀၀ ဝန်းကျင်လောက်က စတားမား ရာထူးက ထွက်ပေးဖို့ လူသိရှင်ကြား တောင်းဆိုထားကြပါတယ်။ The Guardian ရဲ့ အဆိုအရ ဩဇာညောင်းတဲ့ အစိုးရအဖွဲ့ဝင် ဝန်ကြီးအတော်များများကလည်း ပြီးခဲ့တဲ့ သီတင်းပတ်ကုန်က သီးသန့်စကားပြောဆိုမှုတွေမှာ ရာထူးက ဆင်းပေးဖို့ စတားမားကို တိုက်တွန်းခဲ့ကြတယ်လို့ သိရပါတယ်။ ဝန်ကြီးချုပ်ဟာ ပြီးခဲ့တဲ့ သီတင်းပတ်ကုန်ရက်တွေကို သူ့ရဲ့ ဇနီးဖြစ်သူ ဗစ်တိုးရီးယား၊ ပြီးတော့ အနီးကပ်အကြံပေးတွေနဲ့အတူ ကျေးလက်စံအိမ်မှာ ဖြတ်သန်းရင်း နောက်ထပ် ဘာဆက်လုပ်မလဲဆိုတာကို အသေအချာ စဉ်းစားတွေးတောနေခဲ့တာ ဖြစ်ပါတယ်။