ဗီယက်နမ်နှင့် ကုန်သွယ်ရေးသဘောတူညီမှုရပြီ- ထရမ့်ပ်

နှစ်နိုင်ငံအကြား သံတမန်ရေး အကြိတ်အနယ် ဆွေးနွေးညှိနှိုင်းမှုများ ကိုသီတင်းပတ်နှင့်ချီ၍ ပြုလုပ်အပြီးတွင် ဗီယက်နမ်နှင့် ကုန်သွယ်ရေးသဘောတူညီမှု ရရှိခဲ့ပြီဟု အမေရိကန်သမ္မတ ဒေါ်နယ်ထရမ့်ပ်က ကြေညာခဲ့သည်။ လာမည့်သီတင်းပတ်တွင် ဗီယက်နမ်သွင်းကုန်များအပေါ် အခွန်ကောက်ခံမှု ပိုမြင့်လာစေမည့် စည်းကြပ်ခွန်အသစ်ဆိုင်ရာ နောက်ဆုံးသတ်မှတ်ရက်မတိုင်မီ ထရမ့်ပ်၏ ကြေညာချက်ထွက် ပေါ်လာခြင်းဖြစ်သည်။

အမေရိကသို့ တင်သွင်းသည့် ဗီယက်နမ်ကုန်ပစ္စည်းများကို အခွန် ၂၀ ရာခိုင်နှုန်း ကောက်ခံမည်ဖြစ်သော်လည်း နိုင်ငံအတွင်း ဖြတ်သန်းသယ်ဆောင်သည်ဟု ယူဆသည့် မည်သည့်ကုန်ပစ္စည်းမဆိုအပေါ် ၄၀ ရာခိုင်နှုန်း အခွန်စည်းကြပ်မည်ဖြစ်ကြောင်း ထရမ့်ပ်က ဗုဒ္ဓဟူးနေ့တွင် ဆိုရှယ်မီဒီယာပို့စ်တစ်ခု၌ ပြောကြားခဲ့သည်။ အမေရိက၏ သွင်းကုန်များကိုအခွန်စည်းကြပ်မှုမှန်သမျှလျှော့ချပေးရန် ဟနွိုင်က သဘောတူခဲ့သည်ဟုလည်း ထရမ့်ပ်က ပြောကြားခဲ့သည်။

“တနည်းအားဖြင့်တော့ သူတို့ဈေးကွက်ကို အမေရိကအတွက် ဖွင့်ပေးလိုက်တာပါ။ ဆိုလိုတာက ငါတို့ ထုတ်ကုန်တွေကို ဗီယက်နမ်ဆီ အကောက်ခွန်မဲ့ ရောင်းချနိုင်ပါလိမ့်မယ်” ဟု ထရုဆိုရှယ်မီဒီယာတွင် ထရမ့်ပ်က ရေးသားခဲ့သည်။

ကွန်မြူနစ်ပါတီ အကြီးအကဲ တိုလမ်နှင့် ဆွေးနွေးမှုများလုပ်ခဲ့ပြီးနောက် သဘောတူညီချက် ရရှိခဲ့သည်ဟု သမ္မတက ပြောကြားခဲ့သည်။

ဗုဒ္ဓဟူးနေ့က ခေါင်းဆောင်များ၏ ဖုန်းပြောဆိုမှုတွင် နှစ်နိုင်ငံ ကုန်သွယ်ရေးဆက်ဆံရေးကို ထိခိုက်စေသော ပြဿနာကို ဖြေရှင်းရာတွင် ဆက်လက်ပူးပေါင်းဆောင်ရွက်သွားရန် ထရမ့်ပ်က ကတိပြုခဲ့သည်ဟု ဗီယက်နမ်နိုင်ငံခြားရေးဝန်ကြီးဌာန၏ သတင်းထုတ်ပြန်ချက်တွင် ပြောကြားခဲ့သည်။

ဗီယက်နမ်ကို ဈေးကွက်တစ်ခုအဖြစ် အမေရိက,က အသိအမှတ်ပြုရန်နှင့် နည်းပညာမြင့်ထုတ်ကုန်အချို့အပေါ် ပို့ကုန်ကန့်သတ်ချက်များကို ဖယ်ရှားပေးရန် တိုလမ်က အဆိုပြုခဲ့သည်ဟုလည်း ဆက်လက် ပြောကြားခဲ့သည်။

ကုန်သွယ်ရေးမိတ်ဖက်များသည် အခွန်စည်းကြပ်မှု နောက်ဆုံးသတ်မှတ်ရက်ဖြစ်သော ဇူလိုင်လ ၉ ရက် နေ့မတိုင်မီ အမေရိကနှင့် အပြီးသတ် သဘောတူညီချက်များကို ရရှိရန် အပြိုင်ကြိုးပမ်းနေကြပြီး ဗီယက်နမ်နှင့် သဘောတူညီချက်ရခဲ့ခြင်းသည် ဗြိတိန်၊ တရုတ်တို့ပြီးလျှင် တတိယမြောက် ကုန်သွယ်ရေးသဘောတူညီချက် ဖြစ်လာမည်ဖြစ်သည်။

Ref: ဘန်ကောက်ပို့စ်