ပြည်သူများ အခြေခံကျန်းမာရေးကောင်းမွန်ပြီး သက်ရှည်ကျန်းမာကြံ့ခိုင်ရေးတို့နှင့်ပတ်သက်၍ ဇန်နဝါရီ ၂၀ ရက်က နေပြည်တော်၌ပြုလုပ်သည့် (၅၃)ကြိမ်မြောက် မြန်မာနိုင်ငံကျန်းမာရေးဆိုင်ရာ သုတေသနညီလာခံ ဖွင့်ပွဲအခမ်းအနားသို့ နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ဗီဒီယိုမိန့်ခွန်းပေးပို့ပြီးပြောကြားခဲ့ခြင်းဖြစ်သည်။
မြန်မာနိုင်ငံသားများအခြေခံကျန်းမာရေး ကောင်းမွန်ပြီး သက်ရှည်ကျန်းမာကြံ့ခိုင်ကြရန် လိုအပ်ပြီး ထိုသို့ နေထိုင်နိုင်ရန် အာဟာရပြည့်ဝပြီး ကျန်းမာရေးနှင့်ညီညွတ်သည့် အစားအစာများ ရွေးချယ်စားသုံးနိုင်ရေး၊ ကျန်းမာရေးနှင့်ညီညွတ်အောင် နေထိုင်ပြုမူရေးတို့အတွက် လက်တွေ့အသုံးချကျန်းမာရေးသုတေသနများကို တိုးမြှင့်ဆောင်ရွက်၍ တွေ့ရှိချက်များအား ပြည်သူများသိရှိစေရန် ကျယ်ကျယ်ပြန့်ပြန့် ထုတ်ပြန်အသိပညာပေးရမည်ဟု မှာကြားသည်။
ကျန်းမာရေးဆိုင်ရာ သုတေသနညီလာခံများမှပေါ်ထွက်လာသည့် ခိုင်မာတိကျသောရလဒ်
အခြေပြုသုတေသနတွေ့ရှိချက်များသည် နိုင်ငံအတွက်ခေတ်နှင့်အညီသင့်တော်သော ကျန်းမာရေး ဆိုင်ရာမူဝါဒများချမှတ်ရန်၊ ကျန်းမာရေးလုပ်ငန်းများ ပိုမိုထိရောက်အကျိုးရှိအောင်ဆောင်ရွက်နိုင်ရန်၊ လူတိုင်းလက်လှမ်းမီသည့် အရည်အသွေးပြည့် ကျန်းမာရေးစောင့်ရှောက်မှုရရှိရန် လုပ်ငန်းစဉ်များဖော်ဆောင်ရာ၌ များစွာအထောက်အကူဖြစ်စေသည်ဟု ပြောသည်။
” အခုချိန်မှာ ထပ်မံဦးမော့လာနိုင်တဲ့ မကူးစက်တတ်တဲ့ရောဂါတွေကိုထိန်းချုပ်နိုင်ဖို့ရည်ရွယ်ပြီး ကမ္ဘာ့ကျန်းမာရေးအဖွဲ့(WHO)နဲ့ ကျန်းမာရေးဝန်ကြီးဌာန၊ ပြည်သူ့ကျန်းမာရေးဦးစီးဌာန၊ ကုသရေးဦးစီးဌာန၊ ကျန်းမာရေးလူ့စွမ်းအားအရင်းအမြစ်ဦးစီးဌာနနဲ့ ဆေးသုတေသနဦးစီးဌာနတို့ပူးပေါင်းပြီး မြန်မာနိုင်ငံရှိ မကူးစက်တတ်တဲ့ရောဂါတွေရဲ့ဖြစ်ပွားနိုင်ခြေကို “စစ်တမ်းကောက်လေ့လာခြင်းသုတေသန – ၂၀၂၄” ကို (STEP SURVEY)နဲ့ ဆောင်ရွက်နေပါတယ်”ဟု နစက ဥက္ကဋ္ဌက ပြောသည်။
ထို့ပြင် တိုင်းရင်းဆေးပညာ၏ လက်တွေ့အသုံးချသုတေသနများမှတစ်ဆင့် ပြည်သူများလက်တွေ့အကျိုးရှိစေရေးနှင့် မြန်မာနိုင်ငံ၏တိုင်းရင်းဆေးပညာရပ်၊ တိုင်းရင်းဆေးဝါးထုတ်ကုန်များ နိုင်ငံတကာသို့ ထိုးဖောက်နိုင်ရန် တိကျခိုင်မာသောသုတေသနပြုထားသည့် အချက်အလက်များပိုမိုရရှိနိုင်ရန် တိုင်းရင်းဆေးပညာရှင်ကြီးများနှင့်တိုင်းရင်းဆေးပညာဦးစီးဌာနတို့ပူးပေါင်းဆောင်ရွက်ရမည်ဟု နစက ဥက္ကဋ္ဌက မှာကြားခဲ့သည်။
အဆိုပါ (၅၃)ကြိမ်မြောက် မြန်မာနိုင်ငံကျန်းမာရေးဆိုင်ရာ သုတေသနညီလာခံတွင် အခြေခံသုတေသနစာတမ်း၊ အသုံးချသုတေသနစာတမ်း၊ လူမှုရေးနှင့် ကျန်းမာရေးစနစ်သုတေသနစာတမ်းအမျိုးအစားများခွဲခြား၍ သုတေသနစာတမ်း(၅၄)စောင်နှင့် ပိုစတာ(၄၃)စောင်ကို ဖတ်ကြားပြသသွားမည်ဖြစ်သည်။