ပြင်သစ်အစိုးရပြုတ်ကျပြီး နိုင်ငံရေး အကျပ်အတည်းဖြစ်‌နေ

ပြင်သစ်နိုင်ငံတွင် အစိုးရအပေါ် အယုံအကြည်မရှိအဆိုကို မဲခွဲဆုံးဖြတ်ကာ အစိုးရအဖွဲ့ကို ဖြုတ်ချခဲ့ပြီးနောက် နိုင်ငံရေးအကျပ်အတည်းသို့ ဆိုက်ရောက်ခဲ့သည်။။ လက်ယာယိမ်းဝန်ကြီးချုပ် မီရှယ် ဘာနီ‌ယေး၏ လူနည်စုညွန့်ပေါင်းအစိုးရသည် သုံးလအကြာတွင်ပင် အဆုံးသတ်ခဲ့ရသည်။

လက်ဝဲယိမ်းပါတီများ မဟာမိတ်အဖွဲ့က တင်သွင်းသော အယုံအကြည်မရှိအဆိုကို ရွှေ့ပြောင်းဝင်ရောက်မှု ကို ဆန့်ကျင်သော မရင်းလီပင်း၏ လက်ယာစွန်း National Rally ပါတီ အမတ်များက ထောက်ခံမဲပေးခဲ့သည်။ ဗုဒ္ဓဟူးနေ့ညပိုင်းက မဲပေးမှုတွင် စုစုပေါင်းအမတ်အရေအတွက် ၃၃၁ ဦးက ပြတ်သားသော အများစုမဲဖြင့် အစိုးရကို ဖြုတ်ချခဲ့သည်။

ကြာသပတေးနေ့နံနက်ပိုင်းတွင် ဝန်ကြီးချုပ်ရာထူးမှ နုတ်ထွက်ရမည်ဖြစ်သော ဘာနီယေးက ပြင်သစ်နိုင်ငံသည် မရေရာသည့်အခြေအနေသို့ ကျရောက်သွားလိမ့်မည်ဟု မဲပေးမှုမတိုင်မီတွင် သတိပေးခဲ့သည်။

မဲခွဲဆုံးဖြတ်မှုအပြီးတွင် သမ္မတ မက်ခရွန်သည် ကြာသပတေးနေ့ညနေပိုင်းတွင် ရုပ်သံမှတဆင့် နိုင်ငံတော်သို့ မိန့်ခွန်းပြောကြားမည်ဖြစ်သည်ဟု ၎င်း၏ ရုံးက ပြောကြားခဲ့သည်။

အစိုးရပြုတ်ကျခဲ့မှုသည် သမ္မတ အီမန်နျူလ် မက်ခရွန်အတွက် သူ၏ သမ္မတသက်တမ်းနှစ်ကြိမ်မြောက်တွင် အဆိုးဝါးဆုံး နိုင်ငံရေးအကျပ်အတည်းကို ရင်ဆိုင်ရစေခဲ့သည်။ အစိုးရ၏ လိုငွေပြမှု ကြီးထွားနေစဉ်တွင် ၂၀၂၅ ခုနှစ် ဘတ်ဂျက်အတွက် မည်သို့ဆုံးဖြတ်မည်နည်းဆိုသည်နှင့် မက်ခရွန်က မည်သူကို ဝန်ကြီးချုပ် ခန့်အပ်မည်နည်းဆိုသည်တို့နှင့် ပတ်သက်၍ မရေရာမှုများရှိနေခဲ့သည်။

ဗုဒ္ဓဟူးနေ့က မဲခွဲဆုံးဖြတ်မှုသည် ၁၉၆၂ ခုနှစ် သမ္မတ ချားလ်စ်ဒဂိုးလ်လက်ထက်တွင် ဂျော့ပွန်ပီဒူးအစိုး၇အဖွဲ့ကို ဖြုတ်ချနိုင်ခဲ့ပြီးနောက်ပိုင်း နိုင်ငံတွင် ပထမဆုံးအကြိမ် အယုံအကြည်မရှိအဆို မဲခွဲမှု အောင်မြင်ခဲ့ခြင်းဖြစ်သည်။ Ref: သည်ဂါဒီးယန်း