တတိယအကြိမ် ပဲခူးတိုင်းဒေသကြီးလွှတ်တော် ဒုတိယပုံမှန်အစည်းအဝေး ဆဋ္ဌမနေ့ကို ယနေ့ (ဇွန် ၉ ရက်) နံနက် ၁၀ နာရီတွင် ကျင်းပခဲ့ရာ လျှပ်စစ်ကဏ္ဍနှင့် ပတ်သက်သည့် မေးခွန်း (၄) ခုကို လွှတ်တော်ကိုယ်စားလှယ်များက မေးမြန်းဆွေးနွေးခဲ့ကြကြောင်း သိရသည်။
ကဝမြို့နယ် အမှတ်(၂) လွှတ်တော်ကိုယ်စားလှယ် ဦးအောင်ညီညီစိုးက ကဝမြို့နယ်အတွင်း ဒေသခံပြည်သူများ လျှပ်စစ်မီး အဆင်ပြေချောမွေ့စွာ ရရှိနိုင်ရေး၊ လျှပ်စစ်ဓာတ်အား အချိန်မှန်ဖြန့်ဖြူးပေးနိုင်ရေးနှင့် မီးအားပြည့်ဝစွာ ရရှိနိုင်ရေးအတွက် မည်သည့်စီမံကိန်းများဖြင့် မည်သည့်အချိန်ကာလအတွင်း ဆောင်ရွက်ပေးနိုင်မည်ကို မေးမြန်းခဲ့သည်။
အုတ်ဖိုမြို့နယ် အမှတ်(၁) လွှတ်တော်ကိုယ်စားလှယ်က အုတ်ဖိုမြို့နယ်၊ မိုးညိုတန်းရပ်ကွက်ရှိ မြို့ပတ်လမ်း ပေ ၁,၆၀၀ အနက် သွယ်တန်းရန် ကျန်ရှိနေသည့် လမ်းပိုင်းပေ ၈၀၀ အတွက် ၄၀၀ ဗို့အားလိုင်း ထပ်မံသွယ်တန်းပေးရန် အစီအစဉ်ရှိ/မရှိနှင့် ရှိပါက မည်သည့်ဘဏ္ဍာရေးနှစ်တွင် ဆောင်ရွက်ပေးမည်ကို မေးမြန်းခဲ့ကြောင်း သိရသည်။
မိုးညိုမြို့နယ် အမှတ်(၁) လွှတ်တော်ကိုယ်စားလှယ် ဦးညွန့်မင်းစိုးက ပေါက်ကုန်းကျေးရွာ လျှပ်စစ်မီးရရှိရေးအတွက် မည်သို့ဆောင်ရွက်ပေးမည်ကို မေးမြန်းခဲ့သည်။
ထို့ပြင် သဲကုန်းမြို့နယ် အမှတ်(၂) လွှတ်တော်ကိုယ်စားလှယ်က အင်းပေါ်ငယ်အုပ်စုရှိ ရန္တကူး၊ သာလှပင်စည်နှင့် အင်းပေါ်ကြီးကျေးရွာများအတွက် 11KV ဓာတ်အားလိုင်းနှင့်အတူ 100KVA ထရန်စဖော်မာ တစ်လုံးစီ တပ်ဆင်ပေးရေး၊ ကြပ်ကြီးကုန်းကျေးရွာအတွက် 11KV ဓာတ်အားလိုင်းနှင့် 50KVA ထရန်စဖော်မာတစ်လုံး တပ်ဆင်ပေးရေး အစီအစဉ်ရှိ/မရှိကို မေးမြန်းခဲ့ကြောင်း သိရသည်။
အဆိုပါ မေးခွန်းများနှင့် စပ်လျဉ်း၍ ပဲခူးတိုင်းဒေသကြီးအစိုးရအဖွဲ့၊ လျှပ်စစ်၊ စွမ်းအင်၊ စက်မှုနှင့် လမ်းပန်းဆက်သွယ်ရေးဝန်ကြီးဌာန ဝန်ကြီး ဦးကျော်ထွဋ်က ပြန်လည်ဖြေကြားခဲ့ကြောင်း သိရသည်။