ပဲခူးတိုင်းဒေသကြီးအတွင်းရှိ အကျုံးဝင်အာမခံအလုပ်သမား ၇၅,၀၂၆ ဦး၏ ကျန်းမာရေးစောင့်ရှောက်မှုအတွက် လူမှုဖူလုံရေးအဖွဲ့က ဆေးဖိုးအမှုတွဲ ၂,၁၈၅ တွဲအတွက် ကျပ် ၄၅၄ ဒသမ ၉၈၁ သန်း ထောက်ပံ့ပေးအပ်ခဲ့ကြောင်း သိရသည်။
၂၀၂၅ ခုနှစ် ဧပြီလမှ ၂၀၂၆ ခုနှစ် မတ်လအထိ ကာလအတွင်း အာမခံအလုပ်သမားများ၏ ကျန်းမာရေးစောင့်ရှောက်မှုအတွက် မြို့နယ်လူမှုဖူလုံရေးဆေးခန်း ၁၅ ခန်း၊ Fee for Service စာချုပ်ဆေးခန်း ၁၅ ခန်း၊ ဌာနကြီးဆေးခန်း ၅ ခန်းနှင့် ရွေ့လျားဆေးကုသယာဉ်များဖြင့် ဆေးကုသရေးဝန်ဆောင်မှုများ ဆောင်ရွက်ပေးခဲ့ကြောင်း သိရသည်။
ထို့ပြင် အလုပ်သမားဝန်ကြီးဌာန ပြည်ထောင်စုဝန်ကြီး ဦးခင်မောင်စိုးသည် ပဲခူးတိုင်းဒေသကြီးအတွင်းရှိ Myanstar Garment Co., Ltd.၊ Suitstar Garment Co., Ltd. နှင့် Sudey Industrial Myanmar Co., Ltd. အထည်ချုပ်စက်ရုံများသို့ သွားရောက်၍ အလုပ်သမားများ၏ လုပ်ငန်းခွင်ဆောင်ရွက်နေမှုအခြေအနေများ၊ အလုပ်သမားအခွင့်အရေးနှင့် ရပိုင်ခွင့်များ ဆောင်ရွက်ပေးထားမှုအခြေအနေများကို ကြည့်ရှုစစ်ဆေးခဲ့ကြောင်း သိရသည်။
ယင်းအပြင် လူမှုဖူလုံရေးအဖွဲ့၏ ရွေ့လျားဆေးကုသယာဉ်များဖြင့် အထည်ချုပ်စက်ရုံသုံးရုံရှိ အာမခံအလုပ်သမားများအား အလုပ်ခွင်အရောက် ကွင်းဆင်းကျန်းမာရေးစောင့်ရှောက်မှုနှင့် ဆေးကုသရေးဝန်ဆောင်မှုများ ဆောင်ရွက်ပေးလျက်ရှိကြောင်း သိရသည်။