အားကစားနှင့် လူငယ်ရေးရာဝန်ကြီးဌာနနှင့် မြန်မာနိုင်ငံဘောလုံးအဖွဲ့ချုပ်တို့ အတူတကွ ပူးပေါင်းဆောင်ရွက်၍ နိုင်ငံ၏ ဘောလုံးလောကနှင့် ပြိုင်ပွဲများ ပိုမိုဖွံ့ဖြိုးစေရေး ကြိုးပမ်းကြရန် ပြည်ထောင်စုဝန်ကြီး Jeng Phang နော်တောင်က တိုက်တွန်းမှာကြားသည်။
ယမန်နေ့ ဖေဖော်ဝါရီ (၂၄)ရက် (၃၃) ကြိမ်မြောက် ဆီးဂိမ်းနှင့် နိုင်ငံတကာပြိုင်ပွဲများ အောင်မြင်ရေး၊ ဘောလုံးဖွံ့ဖြိုးရေး လုပ်ငန်းများအတွက် အားကစားနှင့် လူငယ်ရေးရာ ဝန်ကြီးဌာန ပြည်ထောင်စုဝန်ကြီးနှင့် မြန်မာနိုင်ငံဘောလုံးအဖွဲ့ချုပ် ဥက္ကဌ ဦးဇော်ဇော်နှင့် တာဝန်ရှိသူများ တွေဆုံစဉ် ထိုသို့ တိုက်တွန်းမှာကြားခဲ့ခြင်းဖြစ်သည်။
နည်းစနစ်နှင့် အားကစား ဥပဒေများကို ကစားသမားများ ပိုမိုသိရှိနားလည်၍ လိုက်နာကျင့်သုံးစေရေး၊ ကစားသမားကောင်းများ ဖြစ်စေရန် အားကစား ဆေးပညာ၊ အားကစား စိတ်ပညာ တို့အား စနစ်တကျ အသုံးချရေး၊ ဝန်ကြီးဌာန တာဝန်ရှိသူများနှင့် အဖွဲ့ချုပ်တာဝန်ရှိသူများအားလုံး မိသားစုသဖွယ် အပြန်အလှန် ယုံကြည်လေးစားမှုများဖြင့် လုပ်ငန်းများ လက်တွဲဆောင်ရွက်ရေး၊ ယမန်နေ့ ဆွေးနွေးခဲ့သည့် အကြောင်းအရာများအား ကောက်ရိုးမီးသဖွယ် မဖြစ်စေဘဲ စနစ်တကျ အာရုံစိုက်၍ အကောင်အထည်ဖော် ဆောင်ရွက်ရေး၊ ၂၀၂၅ ဆီးဂိမ်းစ်ပြိုင်ပွဲတွင် အောင်မြင်မှု ရရှိရေးအတွက် လက်တွဲညီစွာဖြင့် ကြိုးပမ်းဆောင်ရွက်ရေး တို့အား တိုက်တွန်းမှာကြားခဲ့သည်။
တွေ့ဆုံပွဲအတွင်း ပြည်ထောင်စုဝန်ကြီးနှင့်အဖွဲ့အား မြန်မာနိုင်ငံ ဘောလုံးအဖွဲ့ချုပ် ဥက္ကဋ္ဌ ဦးဇော်ဇော်က သုဝဏ္ဏကွင်း၊ ဖူဆယ်မိုးလုံလေလုံကွင်း၊ အာရှဘောလုံး အဖွဲ့ချုပ်နှင့် ဧရာဝတီ ဖောင်ဒေးရှင်းတို့က ပံ့ပိုးကူညီသည့် ဖူဆယ်လေ့ကျင့်ရေးကွင်း တည်ဆောက်ရေး စီမံကိန်း၊ ဧရာဝတီဖောင်ဒေးရှင်းက လှူဒါန်းသည့် မြက်ခင်းတု လေ့ကျင့်ရေးကွင်း နှစ်ကွင်းတည်ဆောက်နေမှု၊ အမျိုးသား ဘောလုံးအကယ်ဒမီတို့အား ရှင်းလင်းပြသခဲ့ကာ မြန်မာ့လက်ရွေးစင် ကစားသမားများ၊ အကယ်ဒမီ သင်တန်းသားများနှင့် တွေ့ဆုံမိတ်ဆက်ခဲ့ကြောင်း သိရသည်။
ထို့နောက် မြန်မာနိုင်ငံ ဘောလုံးအဖွဲ့ချုပ် ဥက္ကဋ္ဌ ဦးဇော်ဇော်က ပြည်ထောင်စုဝန်ကြီးနှင့်အဖွဲ့အား အရှေ့တောင်အာရှ အားကစားပွဲတော် (ဆီးဂိမ်းစ်)အောင်နိုင်ရေးအတွက် အသင်းများ ပြင်ဆင်ထားရှိမှု၊ မြန်မာ ယူ (၂၂) နည်းပြချုပ် ဂျပန်လက်ရွေးစင်ဟောင်း ခူရိုဆာကီ၊ မြန်မာ ယူ (၁၉) နည်းပြ ဆူအီကာ၊ အမျိုးသမီးအသင်းနည်းပြ ယူကီ၊ ဖူဆယ်နည်းပြ ထိုင်းလက်ရွေးစင်ဟောင်း ပတ္တရားတို့အား ငှားရမ်းခန့်အပ်ထားရှိမှု၊ သက်တမ်းအလိုက်အသင်းများ ဖွဲ့စည်းဆောင်ရွက်မှု၊ လူငယ်ဖွံ့ဖြိုးရေး လုပ်ငန်းများ၊ အမျိုးသမီး ဘောလုံးအကယ်ဒမီ အပါအဝင် အခြေခံအဆောက်အဦးများ တည်ဆောက်မှု၊ သက်တမ်းလိုက် ပြိုင်ပွဲများကျင်းပနေမှုနှင့် အဖွဲ့ချုပ် ငွေစာရင်း ရှင်းလင်းချက်များအား တင်ပြင်အစီရင်ခံခဲ့ကြကြောင်း သိရသည်။
ထို့ပြင် လိဂ်ကော်မတီ ဥက္ကဋ္ဌ ဦးဇော်မင်းသိန်းက ပြိုင်ပွဲ ကျင်းပရေး စီစဉ်ထားရှိမှုများ၊ ဘဏ္ဏာရေး၊ ကစားကွင်းနှင့် လိုအပ်ချက်များ၊ ပြင်ဆင်ဆောင်ရွက်ရန်များအား လည်းကောင်း၊ ဖူဆယ် လက်ရွေးစင် အသင်းများ ပြင်ဆင်လေ့ကျင့်မှု၊ ဖူဆယ်လိဂ် ပြိုင်ပွဲများ ကျင်းပနေမှုနှင့် စပ်လျဉ်း၍ ဖူဆယ်ကော်မတီ ဥက္ကဋ္ဌ ဦးဝင်းသော်က လည်းကောင်း ဆက်လက် အစီရင်ခံ တင်ပြခဲ့ကြသည်။
ယင်းနောက် တက်ရောက်လာသည့် အားကစားနှင့် ကာယပညာ ဦးစီးဌာန ညွှန်ကြားရေးမှူးချုပ် ဦးထွန်းမြင့်ဦးနှင့် တာဝန်ရှိသူများ၊ မြန်မာနိုင်ငံ ဘောလုံးအဖွဲ့ချုပ် တာဝန်ရှိသူများက ဘောလုံးအားကစား တိုးတက်ရေး အတွက် အတူတကွ လက်တွဲဆောင်ရွက်ရမည့် ကိစ္စရပ်များ၊ ပြိုင်ပွဲများ၊ ကစားကွင်းများနှင့် အထွေထွေကိစ္စရပ်များအား ဆွေးနွေးခဲ့ကြကြောင်း သိရသည်။