ပင်စင်ထုတ်ယူမှုဆိုင်ရာ လူပုဂ္ဂိုလ်စိစစ်မှုများကို တိကျမှန်ကန်စေရန်အတွက် မြန်မာ့စီးပွားရေးဘဏ်၏ Centralize e-pension စနစ်နှင့် လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန၏ e-ID စနစ်တို့ကို ချိတ်ဆက်ကာ UID နံပါတ်များ ထုတ်ပေးနေခြင်းလည်း ဖြစ်သည်။
ထိုသိူ့ထုတ်ပေးရာတွင် အထူးသဖြင့် အသက်အရွယ်ကြီးပြီဖြစ်သည့်အဖိုးအဖွားများ၊ သွားလာခက်ခဲသူများအတွက် အိမ်တိုင်ရာရောက် (Home Service) ဖြင့် UID လုပ်ငန်းကိုအဆင်ပြေဆုံးအောင် ဆောင်ရွက်ပေးနေကြောင်းလည်း သိရသည်။
ထို့အပြင် မြို့နယ်အလိုက် မြန်မာ့စီးပွားရေးဘဏ်များတွင် One-Stop Service ဖြင့် UID လျှောက်ထားမှုကို ဆောင်ရွက်ပေးနေကာ မြို့နယ်ဦးစီးမှူးရုံးမှ ဝန်ထမ်းများက သက်ဆိုင်ရာဘဏ်များတွင် တိုက်ရိုက်ဝင်ရောက်ကာ Biographic နှင့် Biometric အချက်အလက်များကိုကောက်ယူပြီး UID နံပါတ်များ ထုတ်ပေးနေကြောင်း သိရှိရသည်။
UID လျှောက်ထားရာတွင် မည်သည့်မြို့နယ်မှထုတ်ပေးသည့် နိုင်ငံသားစိစစ်ရေးကတ်ကိုင်ဆောင်ထားသည်ဖြစ်စေ၊ မည်သည့်မြို့နယ်၌မဆို နေထိုင်သူဖြစ်စေ လက်ရှိနေထိုင်ရာမြို့နယ်လဝကရုံးတွင် လျှောက်ထားနိုင်သည်ဟု ဆိုသည်။
လက်ရှိအချိန်အထိ၊ ဇူလိုင် ၂၄ ရက်နေ့အထိ မြန်မာ့စီးပွားရေးဘဏ် (၁၉၅) ခုတွင် နိုင်ငံ့ဝန်ထမ်း(အငြိမ်းစား) ကျား ၂၂,၉၆၂ ဦး၊ မ ၂၈,၆၉၈ ဦး စုစုပေါင်း ၅၁,၆၆၀ ဦးအား UID ထုတ်ပေးပြီးဖြစ်ကြောင်းလည်း သိရသည်။
UID ရရှိပြီးသူများအနေဖြင့် မိမိ၏ကိုယ်ရေးနှင့်ဇီဝဆိုင်ရာအချက်အလက်များကို e-ID စနစ်တွင် တိကျမှန်ကန်စွာ သိမ်းဆည်းထားသဖြင့် အခြားမသက်ဆိုင်သူများမှ ထိုအချက်အလက်များကို မတရားအသုံးပြုခြင်း၊ အတုအပပြုလုပ်ခြင်းများမှ ကာကွယ်နိုင်သည်ဟု ဆိုသည်။ ထို့အပြင် နောင်တွင် ထုတ်ပေးမည့် National ID ထုတ်ပေးရာတွင်လည်း UID ရရှိပြီးသူများကိုသာ ဆက်လက်ထုတ်ပေးမည်ဖြစ်ကြောင်း လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာနက ကြေညာထားသည်။
UID လျှောက်ထားလိုသူများအနေဖြင့် သတ်မှတ်ထားသည့် ပုံစံ (၁) ကိုဖြည့်စွက်ပြီး နိုင်ငံသားစိစစ်ရေးကတ်နှင့်အတူ မြို့နယ်လဝကရုံးသို့ သွားရောက်လျှောက်ထားနိုင်ပြီး၊ လုပ်ငန်းများကိုနေ့ချင်းပြီးအောင်မြင်စွာဆောင်ရွက်ပေးနေသည်။ လုပ်ငန်းအတွင်း အဆင်မပြေမှုများရှိပါက မြို့နယ်ဦးစီးမှူးများနှင့် တိုက်ရိုက် ဆက်သွယ်နိုင်ကြောင်းလည်း အသိပေးထားသည်။