ပါတီစုံဒီမိုကရေစီတွင် နိုင်ငံရေးပါတီများ၏ အခန်းကဏ္ဍမှာအရေးကြီးပြီး နိုင်ငံရေးပါတီများ အားမကောင်းပါက ပါတီစုံဒီမိုကရေစီရှင်သန်ဖွံ့ဖြိုးရန်မဖြစ်နိုင်သဖြင့် နိုင်ငံရေးပါတီများ အားကောင်းရန် ပြည်သူများကိုယ်တိုင် နိုင်ငံရေးပါတီများအပေါ်တွင် ယုံကြည်မှုရှိပြီး ပူးပေါင်းဆောင်ရွက်မှုရှိစေလိုသည်ဟု ဦးကိုကိုကြီးက ပြောကြားသည်။
ဇန်နဝါရီ ၂၃ ရက်နှင့် ၂၄ ရက်တို့က နေပြည်တော်၌ကျင်းပသည့် အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ (NSPNC)နှင့် နိုင်ငံရေးပါတီများအစုအဖွဲ့၏ အလုပ်အဖွဲ့တို့တွေ့ဆုံဆွေးနွေးပွဲအပြီးတွင် နိုင်ငံရေးပါတီများ အစုအဖွဲ့၏ အလုပ်အဖွဲ့ခေါင်းဆောင်ဖြစ်သည့် ပြည်သူ့ပါတီဥက္ကဋ္ဌ ဦးကိုကိုကြီးက မှတ်ချက်ပြု ပြောကြားခဲ့ခြင်းဖြစ်သည်။
NSPNC နှင့်တွေ့ဆုံဆွေးနွေးခဲ့မှုနှင့်ပတ်သက်၍ ဆွေးနွေးပြီးသဘောထားစုစည်းချက်အားလုံး(၄၃)ချက်ရှိကာ တစ်ထိုင်တည်းဆုံးဖြတ်၍ မရဘဲ ဆက်လက်ဆွေးနွေးရမည့် အချက်(၇) ချက်ရှိနေသဖြင့် ဆက်လက်ဆွေးနွေးနေဆဲဖြစ်သည်ဟု ပြောသည်။
ထို့ပြင် နိုင်ငံရေးပါတီများအစုအဖွဲ့မှ ပြင်ဆင်သင့်သည်ဟု ထပ်မံအဆိုပြုထားသောအချက်များကိုလည်း ဆက်လက်ဆွေးနွေးသွားမည်ဟု ဆိုသည်။
” ဒါကြောင့် နိုင်ငံရေးနည်းလမ်းနဲ့ ကြိုးပမ်းနေတာဟာ ရုတ်တရက်တော့ သိသာမြင်သာမဖြစ်ပေမယ့် ကျွန်တော်တို့အားလုံးပွင့်လင်းရင်းနှီးစွာနဲ့ အကျေအလည်ဆွေးနွေးညှိနှိုင်းနေကြပါတယ်။ ဒီဆွေးနွေးမှုတွေကတစ်ဆင့် တိုးတက်မှုတွေလည်းရရှိထားပါတယ်။ ဒီတိုးတက်မှုတွေကို ပြည်သူတွေသိရှိစေဖို့ အသိပေးခြင်းဖြစ်ပါတယ်” ဟု ဦးကိုကိုကြီးက ပြောသည်။
ထို့ပြင် နိုင်ငံတစ်နိုင်ငံတွင် အမြင့်ဆုံးဥပဒေမှာ ဖွဲ့စည်းပုံအခြေခံဥပဒေဖြစ်၍ ယင်း ဥပဒေ၏ သဘောတရားသည် ကျင့်သုံးရင်းနှင့် လိုအပ်ချက်များ၊ အားနည်းချက်များရှိပါက တဖြည်းဖြည်းပြင်ဆင်ကာ ကောင်းသထက်ကောင်းအောင် ကြိုးစားကြရခြင်းဖြစ်သည်ဟုလည်း ဦးကိုကိုကြီးက ပြောကြားခဲ့သည်။