ဖေဖော်ဝါရီ (၁) ရက်မှ (၈) ရက်အထိ နိုင်ငံရေးပါတီ တည်ထောင်ခွင့်နှင့် မှတ်ပုံတင်ခွင့်လျှောက်ထားသည့် ပါတီ (၃) ပါတီရှိကြောင်း UEC မှထုတ်ပြန်ကြေညာထားသည်။
အဆိုပါ ပါတီများမှာ ပြည်ထောင်စုကြံ့ခိုင်ရေးနှင့် ဖွံဖြိုးရေးပါတီ(USDP)၊ ဖက်ဒရယ်ဒီမိုကရက်တစ်ပါတီနှင့် မြန်မာပြည်သူ့ဒီမိုကရက်တစ်ပါတီ (MPD )ဖြစ်ကြောင်း သိရသည်။
ဖေဖော်ဝါရီ (၁) ရက်တွင် ပြည်ထောင်စုကြံ့ခိုင်ရေးနှင့် ဖွံဖြိုးရေးပါတီမှ ပထမဦးဆုံးလျှောက်ထားသည့်ပါတီဖြစ်ပြီး ဖေဖော်ဝါရီ (၇) ရက်တွင် ဖက်ဒရယ်ဒီမိုကရက်တစ်ပါတီနှင့် ဖေဖော်ဝါရီ (၈) ရက်တွင် မြန်မာပြည်သူ့ဒီမိုကရက်တစ်ပါတီ (MPD )တို့မှ လျှောက်ထားခြင်းဖြစ်ကြောင်း ထုတ်ပြန်ထားသည်။
နိုင်ငံရေးပါတီများမှတ်ပုံတင်ခြင်းဥပဒေပုဒ်မ (၂၅) အရ နိုင်ငံရေးပါတီအဖြစ် ဆက်လက်တည်ထောင်လိုသော ပြည်ထောင်စုကြံ့ခိုင်ရေးနှင့် ဖွံဖြိုးရေးပါတီသည် ဥပဒေ၊ နည်းဥပဒေများနှင့်အညီ နိုင်ငံရေးပါတီအဖြစ် ဆက်လက်တည်ထောင်ခွင့်နှင့် မှတ်ပုံတင်ခွင့်ကို UEC အနေဖြင့် မှတ်ပုံတင်ခွင့်ပြုနိုင်ရေး ဆက်လက်စိစစ်ဆောင်ရွက်နေပြီး အလားတူ နိုင်ငံရေးပါတီများမှတ်ပုံတင်ခြင်းဥပဒေ ပုဒ်မ (၃) အရ နိုင်ငံရေးပါတီတည်ထောင်လိုသော ဖက်ဒရယ်ဒီမိုကရက်တစ်ပါတီသည် ဥပဒေ၊ နည်းဥပဒေများနှင့်အညီ နိုင်ငံရေးပါတီ တည်ထောင်ခွင့်ကို ဖေဖော်ဝါရီ ၇ ရက်တွင် လာရောက်လျှောက်ထားခဲ့သဖြင့် တည်ထောင်ခွင့်ပြုနိုင်ရေးအတွက် ပြည်ထောင်စုရွေးကောက်ပွဲကော်မရှင်က ဆက်လက်စိစစ် ဆောင်ရွက်လျက်ရှိကြောင်းထုတ်ပြန်ချက်အရ သိရသည်။
ဆက်လက်ပြီး နိုင်ငံရေးပါတီများမှတ်ပုံတင်ခြင်းဥပဒေ ပုဒ်မ (၂၅) အရ နိုင်ငံရေးပါတီအဖြစ် ဆက်လက်တည်ထောင်လိုသော မြန်မာပြည်သူ့ဒီမိုကရက်တစ်ပါတီ (MPD ) သည် ဥပဒေ၊ နည်းဥပဒေများနှင့်အညီ နိုင်ငံရေးပါတီအဖြစ် ဆက်လက်တည်ထောင်ခွင့်နှင့် မှတ်ပုံတင်ခွင့်လာရောက်လျှောက်ထားခဲ့သဖြင့် မှတ်ပုံတင်ခွင့်ပြုနိုင်ရေး ပြည်ထောင်စုရွေးကောက်ပွဲကော်မရှင်က ဆက်လက်စိစစ်ဆောင်ရွက်လျက်ရှိကြောင်း သိရသည်။
ပြီးခဲ့သည့် ဇန်နဝါရီလ (၂၆) ရက်က အသစ်ပြဌာန်းလိုက်သည့် နိုင်ငံရေးပါတီများ မှတ်ပုံတင်ခြင်း ဥပဒေအသစ်အရ ယခင်ရှိပြီးသား နိုင်ငံရေးပါတီများအနေဖြင့် ရက်ပေါင်း (၆၀) အတွင်း ပါတီမှတ်ပုံတင်ပြန်လည်လျှောက်ထားရမည်ဖြစ်ပြီး ပြန်လည်မလျှောက်ထားပါက နိုင်ငံရေးပါတီအဖြစ်မှ အလိုအလျှောက်ပျက်ပြယ်မည်ဖြစ်ကြောင်း ထည့်သွင်းပြဌာန်းထားခြင်း ဖြစ်သည်။
အဆိုပါ ပြဌာန်းချက်အရ နိုင်ငံရေးပါတီအချို့မှာ မှတ်ပုံတင် ပြန်လည်လျှောက်ထားရန် ပြင်ဆင်နေပြီး ယင်းအထဲတွင် ပါတီမှတ်ပုံတင် ဖျက်သိမ်းခံထားရသည့် ယခင် နှင်းဆီပါတီ ၊ ရှမ်းတိုင်းရင်းသားများ ဒီမိုကရက်တစ်ပါတီနှင့် တိုင်းရင်းသားပါတီအချို့နှင့် ပြည်မပါတီအချို့လည်း ပါဝင်နေကြောင်း နိုင်ငံရေး အသိုင်းအဝိုင်းမှ စုံစမ်းသိရသည်။
အသစ်ထုတ်ပြန်လိုက်သည့် နိုင်ငံရေးပါတီများမှတ်ပုံတင်ခြင်းဥပဒေတွင် ပြည်ထောင်စုတစ်ဝန်းလုံးစည်းရုံးမည့် ပါတီကြီးတွေအနေဖြင့် ပါတီရန်ပုံငွေ ကျပ်သိန်း ၁၀၀၀ ကို မြန်မာ့စီးပွားရေးဘဏ်တွင် ငွေစာရင်းဖွင့်ထားသည့် အထောက်အထားပြသရမည်ဖြစ်ပြီး ပြည်ထောင်စုတစ်ဝန်းလုံး စည်းလုံးမည့် ပါတီဆိုပါက အနည်းဆုံးမဲဆန္ဒနယ်အားလုံး၏ ထက်ဝက်တွင် ဝင်ပြိုင်ရမည်ဖြစ်ကြောင်း ဖော်ပြထားသည်။
ယင်းအပြင် ရွေးကောက်ပွဲကျင်းပပြီးနောက်ပိုင်းမှ ဖွဲစည်းခွင့်ရသည့် နိုင်ငံရေးပါတီများကိုလည်း ယင်းနောက်တွင် ကျင်းပသည့် ကြားဖြတ်ရွေးကောက်ပွဲ၌ ဝင်ရောက်ယှဉ်ပြိုင်ခွင့်ပြုမည်မဟုတ်ကြောင်းလည်း ထည့်သွင်း ပြဋ္ဌာန်းထားသည်။