နိုင်ငံတကာစစ်ရေယာဉ်များတွေ့ဆုံပွဲ(IFR-2026)နှင့် နိုင်ငံပေါင်းစုံရေတပ်လေ့ကျင့်ခန်း(MILAN-2026)တို့ကို အိန္ဒိယနိုင်ငံ၊ Visakhapatnam မြို့၌ ဖေဖော်ဝါရီ ၁၅ ရက်မှ ၂၅ ရက်အထိကျင်းပခဲ့ရာ မြန်မာ့တပ်မတော် (ရေ)မှ အဖွဲ့ခေါင်းဆောင် ဗိုလ်မှူးချုပ်ကျော်စွာထက် ဦးဆောင်သော စစ်ရေယာဉ်(အောင်ဇေယျ)လည်း ပါဝင်တက်ရောက်ခဲ့သည်။
အဆိုပါ နိုင်ငံတကာစစ်ရေယာဉ်များတွေ့ဆုံပွဲ (IFR-2026)သို့ အိန္ဒိယသမ္မတ ဒရူပါဒီမာမူတက်ရောက်ခဲ့ပြီး မြန်မာ့တပ်မတော်(ရေ)မှအဖွဲ့ခေါင်းဆောင်အဖြစ် စစ်ဦးစီးအရာရှိချုပ်(ရေ) ဒု-ဗိုလ်ချုပ်ကြီးအေးမင်းထွေး ဦးဆောင်သောကိုယ်စားလှယ်အဖွဲ့တို့တက်ရောက်ခဲ့သည်။
တွေ့ဆုံပွဲသို့ နိုင်ငံပေါင်း(၇၄)နိုင်ငံမှ အဆင့်မြင့်ရေတပ်အရာရှိကြီးများ၊ နိုင်ငံတကာရေတပ်များ၊ ဒေသတွင်း ရေတပ်များနှင့်အိမ်နီးချင်းရေတပ်များမှ စစ်ရေယာဉ်များတက်ရောက်ခဲ့ကြပြီး တစ်ဆက်တစ်စပ်တည်းပြု လုပ်သည့် အိန္ဒိယသမုဒ္ဒရာရေတပ်ဆိုင်ရာ စာတမ်းဖတ်ပွဲနှင့် ဂိုအာပင်လယ်ရေကြောင်းဆိုင်ရာသီးသန့်ဆွေး နွေးပွဲများကိုလည်း တပ်မတော်(ရေ)မှ စစ်ဦးစီးအရာရှိချုပ်(ရေ)ဦးဆောင်သောကိုယ်စားလှယ်အဖွဲ့တက်ရောက်ခဲ့ကြသည်။
ထိုသို့ တက်ရောက်ခဲ့ပြီးနောက် ယနေ့ ဖေဖော်ဝါရီ ၂၈ ရက်နံနက်ပိုင်းတွင် ရန်ကုန်မြို့၊ အမှတ်(၄)ရေတပ်ဆိပ်ခံတံတား(သီလဝါ)သို့ပြန်လည်ရောက်ရှိလာရာ နယ်မြေခံရေတပ်ကွပ်ကဲမှုဌာနချုပ်မှူးနှင့် တပ်မတော်(ရေ) မှ အရာရှိ၊ စစ်သည်၊ မိသားစုများကကြိုဆိုခဲ့ကြသည်။
ဖရီဂိတ်စစ်ရေယာဉ်(အောင်ဇေယျ)သည် ဖေဖော်ဝါရီ ၁၈ ရက်တွင်ပြုလုပ်သော နိုင်ငံတကာစစ်ရေယာဉ်များတွေ့ဆုံပွဲ(IFR-2026)တွင်ပါဝင်ဆောင်ရွက်ခြင်း၊ ဖေ ဖော်ဝါရီ ၁၉ ရက်မှ ၂၅ ရက်အထိကျင်းပသော နိုင်ငံပေါင်းစုံရေတပ်လေ့ကျင့်ခန်း(MILAN-2026)၏ ဖွင့်ပွဲအခမ်းအနားတက်ရောက်ခြင်း၊ ဆိပ်ကမ်းအခြေပြုစဉ် International Maritime Seminar သို့ နိုင်ငံပေါင်း(၇၄) နိုင်ငံနှင့်အတူတက်ရောက်ခြင်းတို့ကို ပြုလုပ်ခဲ့ကြသည်။
ထို့ပြင် စစ်ရေယာဉ်များပေါ်သို့ အပြန်အလှန်လေ့လာလည်ပတ်ခြင်း၊ ဘာသာရပ်ဆိုင်ရာကျွမ်းကျင်သူများ တွေ့ဆုံဆွေးနွေးပွဲတက်ရောက်ခြင်း၊ ရေအောက်နစ် မြုပ်မှုရှာဖွေရေးရေယာဉ်စနစ်သရုပ်ပြမှုအားလေ့လာခြင်း၊ မြို့တွင်းလေ့လာရေးခရီးသွားခြင်း၊ နိုင်ငံတကာတပ်ဖွဲ့ဝင်များနှင့်အတူ စစ်ရေးပြအခမ်းအနားတွင်ပါ ဝင်ဆောင်ရွက်ခြင်း၊ အရာရှိငယ်များ အပြန်အလှန်ပူး ပေါင်းဆောင်ရွက်ခြင်း၊ ချစ်ကြည်ရေးအားကစားပြိုင် ပွဲများ၌ ပါဝင်ဆင်နွှဲခြင်း၊ Agra မြို့နှင့် ဗုဒ္ဓဂါယာသို့ သွားရောက်ဖူးမြော်လေ့လာခြင်း၊ ညစာစားပွဲအခမ်းအ နားတွင် ရိုးရာယဉ်ကျေးမှုအကပဒေသာများဖြင့် ကပြဖျော်ဖြေရာတွင် ပါဝင်ဆင်နွှဲခြင်း၊ နိုင်ငံတကာစစ်ရေယာဉ်များနှင့်ပူးပေါင်း၍ ပင်လယ်ပြင်လက်တွေ့လေ့ ကျင့်ခန်းများတွင် ပါဝင်လေ့ကျင့်ခြင်းများကိုလည်း ပြုလုပ်ခဲ့ကြသည်။
စစ်ရေယာဉ်(အောင်ဇေယျ)၏ ရန်ကုန်-အိန္ဒိယ-ရန်ကုန် ခရီးစဉ်နှင့် ပင်လယ်ပြင်လက်တွေ့လေ့ကျင့်ခန်းများတွင်မောင်းနှင်ခဲ့သည့် စုစုပေါင်းရေမိုင်မှာ(၂,၃၇၇ ဒသ မ ၄)မိုင်ရှိခဲ့သည်။