နိုင်ငံခြားရင်းနှီးမြှုပ်နှံ သူများအတွက် အထူးအခွင့်အရေးများ ပံ့ပိုးပေးထားဟုဆို

နိုင်ငံခြားရင်းနှီးမြှုပ်နှံသူများအတွက် အထူးအခွင့်အရေးများ ပံ့ပိုးပေးထားကြောင်း မြန်မာကောင်စစ်ဝန်ချုပ်ရုံး၊ ချုံချင့်မြို့မှ ကောင်စစ်ဝန်ချုပ် ဦးကျော်ဇေယျာလင်းက ပြောကြားခဲ့သည်။

ချုံချင့်မြူနီစီပယ်မြို့၌ ကျင်းပပြုလုပ်ခဲ့သည့် နိုင်ငံတကာ စိုက်ပျိုးရေးဆိုင်ရာထုတ်ကုန်များ ကုန်သွယ်မှု ပူးပေါင်းဆောင်ရွက်ရေး စကားဝိုင်းဆွေးနွေးပွဲတွင် ထည့်သွင်းပြောကြားခဲ့ခြင်း ဖြစ်သည်။

အဆိုပါ စကားဝိုင်းဆွေးနွေးပွဲကို တရုတ်နိုင်ငံ၊ နိုင်ငံတကာကုန်သွယ်မှုမြှင့်တင်ရေး ကောင်စီ(ချုံချင့်)နှင့် ချုံချင့် စိုက်ပျိုးရေးဆိုင်ရာ ထုတ်ကုန်များအုပ်စုမှ ကြီးမှူးကျင်းပခဲ့ခြင်းဖြစ်သည်။

မြန်မာနိုင်ငံ၏ စိုက်ပျိုးရေးကဏ္ဍကို မြှင့်တင်ဆောင်ရွက်လျက်ရှိသည့် အခြေအနေ၊ နိုင်ငံခြားရင်းနှီးမြှုပ်နှံ သူများအတွက် အထူးအခွင့်အရေးများ ပံ့ပိုးပေးမှုအခြေအနေ၊ မြန်မာနှင့် ချုံချင့်အကြား စိုက်ပျိုးရေးဆိုင်ရာ ထုတ်ကုန်များ အပြန်အလှန် တင်ပို့/တင်သွင်းနိုင်မှု အခြေအနေ၊ စိုက်ပျိုးရေးကဏ္ဍ ပူးပေါင်းဆောင်ရွက်မှု မြှင့်တင်နိုင်ရေး၊ ချုံချင့်မြို့၏ စိုက်ပျိုးရေးဆိုင်ရာ ကျွမ်းကျင်သူများ မြန်မာနိုင်ငံသို့ စေလွှတ်နိုင်ရေးနှင့် ချုံချင့်၏ နည်းပညာဖြင့် မြန်မာ့စိုက်ပျိုးရေး ထွက်ကုန်များ အရည်အသွေးမြှင့်တင်နိုင်မှု အခြေအနေစသည်တို့ကိုချုံချင့်မြို့မှ ကောင်စစ်ဝန်ချုပ် ဦးကျော်ဇေယျာလင်းကပြောကြားခဲ့သည် ဆွေးနွေးခဲ့ကြောင်း သိရသည်။

အဆိုပါစကားဝိုင်းဆွေးနွေးပွဲကို “ကမ္ဘာကြီးကို ချိတ်ဆက်ပေးသော စိမ်းလန်းသော စိုက်ပျိုးရေး” ဟူသည့် ခေါင်းစဉ်ဖြင့် ကျင်းပခဲ့ပြီး ရပ်ဝန်းနှင့် ပိုးလမ်းမ စီမံကိန်းတစ်လျှောက် နိုင်ငံများနှင့် လယ်ယာထွက်ကုန်များ အပြန်အလှန် တင်ပို့/တင်သွင်းမှုအတွက် ချုံချင့်မြို့တွင် စင်္ကြံတစ်ခုထူထောင်ရန်၊ ချုံချင့်မြို့နှင့်အနီးတစ်ဝိုက် ဈေးကွက်များသို့ မြန်မာအပါအဝင် နိုင်ငံရပ်ခြားမှ အထူး စိုက်ပျိုးရေး ထုတ်ကုန်များ တိုးမြှင့်တင်သွင်းရန်နှင့် ချုံချင့်မြို့၏ စိုက်ပျိုးရေးထွက်ကုန် စျေးကွက် မြှင့်တင်ရန် ရည်ရွယ်ပြုလုပ်ခဲ့ခြင်းဖြစ်ကြောင်း သိရသည်။