နန်စီ ထိုင်ဝမ်သွား ရောက်မှုသည်အချုပ်အခြာအာဏာကို ပြင်းပြင်းထန်ထန် ထိပါးခြင်းဖြစ်ဟု တရုတ် ပြော

နန်စီ ထိုင်ဝမ်သွား ရောက်မှုသည်အချုပ်အခြာအာဏာကို ပြင်းပြင်းထန်ထန် ထိပါးခြင်းဖြစ်ဟု တရုတ် ပြော

တိုင်ပေ၊ ဩဂုတ် ၂ ရက်

အမေရိကန်အောက်လွှတ်တော် ဥက္ကဌ နန်စီပေလိုသည် အာရှခရီးစဉ်အဖြစ် ထိုင်ဝမ်သို့ ဩဂုတ်လ ၂ ရက် အင်္ဂါနေ့ည တွင် ရောက်ရှိခဲ့ကြောင်း သိရသည်။

၎င်းခရီးစဉ်သည် နန်စီပေလိုစီအား ၂၅ နှစ်အတွင်း ထိုင်ဝမ်ကျွန်းပေါ်သို့ ပြန်လည် ခြေချေနိုင်ခဲ့သည့် အမေရိကန်၏ ရာထူးအမြင့်ဆုံး အရာရှိတစ်ဦး ဖြစ်လာစေသည်။

အသက် ၈၂ နှစ် ရှိပြီဖြစ်သော နန်စီ၏ ထိုင်ပေမြို့ ဆောင်းရှန်လေဆိပ်သို့ အမေရိကန်လေယာဉ်ဖြင့် ဆိုက်ရောက်လာမှုကို ထိုင်ဝမ်နိုင်ငံခြားရေးဝန်ကြီး ဂျိုးဇက်ဝူက ကြိုဆိုခဲ့သည်ဟု သိရသည်။

ပေလိုစီက ၎င်းကိုယ်စားလှယ်အဖွဲ၏ အဆိုပါခရီးစဉ်သည် ထိုင်ဝမ်၏ တက်ကြွသော ဒီမိုကရေစီကို ပံ့ပိုးပေးရန် အမေရိကန်က ကတိကဝတ်ပြုထားသည်ကို ယိမ်းယိုင်မှုမရှိဘဲ စောင့်ထိန်းခြင်းဖြစ်ကြောင်း တွစ်တာပေါ်တွင် ရေးသားခဲ့သည်။

ထိုင်ဝမ်၏ လက်ရှိအနေအထားကို ပြောင်းလဲရန် တစ်ဖက်သက်ကြိုးစားနေသည်များကို အမေရိကသည်ဆန့်ကျင်ကြောင်း ၎င်းက ဆက်လက် ရေးသားခဲ့သည်။

ကျွန်မတို့၏ ခရီးစဉ်သည် ထိုင်ဝမ်သို့ စေလွှတ်သည့် ကွန်ဂရက်လွှတ်တော် ကိုယ်စားလှယ်အဖွဲ့များစွာထဲမှ တစ်ခုဖြစ်ပြီး ၎င်းသည် ၁၉၇၉ ခုနှစ် ထိုင်ဝမ်ဆက်ဆံရေးအက်ဥပဒေ၊ အမေရိကန်-တရုတ် ပူးတွဲ တရားဝင်ကြေညာချက်နှင့် အာမခံချက်ခြောက်ချက် တို့မှ လမ်းညွှန်ထားသော အမေရိကန်မူဝါဒနှင့်မဆန့်ကျင်ကြောင်း ပေလိုစီ နှင့် လွှတ်တော် ကိုယ်စားလှယ်အဖွဲ့ဝင်များက ထုတ်ပြန်ချက်တွင် ဖော်ပြထားသည်။

အဆိုပါ ထိုင်ဝမ်ခရီးစဉ်သည် ၎င်းတို့ကိုယ်စားလှယ်အဖွဲ့က စီစဉ်ထားသော စင်ကာပူ၊ မလေးရှား၊ တောင်ကိုရီးယားနှင့် ဂျပန်တို့ပါ ပါဝင်သည့် အင်ဒို-ပစိဖိတ်ဒေသ ခရီးစဉ်၏ တစ်စိတ်တစ်ပိုင်းဖြစ်သည်ဟု ထုတ်ပြန်ချက်တွင် ဖော်ပြထားသည်။

၎င်းခရီးစဉ်သည် နှစ်ဦးနှစ်ဖက် လုံခြုံရေး၊ စီးပွားရေးပူးပေါင်းဆောင်ရွက်မှုနှင့် ဒီမိုကရေစီအုပ်ချုပ်ရေး တို့ကို အဓိကထားကာ ဆွေးနွေးရန်အတွက် ဖြစ်ကြောင်း သိရသည်။

ထိုင်ဝမ်ခေါင်းဆောင်များနှင့် ဆွေးနွေးမှုများတွင် လွတ်လပ်ပွင့်လင်းသော အင်ဒို-ပစိဖိတ်ဒေသတွင် ဆက်ဆံရေး တိုးမြှင့်ခြင်း၊ မိမိတို့၏ မိတ်ဖက်ဖြစ်သော ထိုင်ဝမ်အတွက် ထောက်ခံမှုကို ထပ်မံအတည်ပြုခြင်းနှင့် နှစ်ဦးနှစ်ဖက်၏ ဘုံအကျိုးစီးပွားများကို မြှင့်တင်ခြင်း စသည်ကိစ္စရပ်များအပေါ် အာရုံစိုက်သွားမည် ကြောင်း ပေလိုစီက တွစ်တာပေါ်တွင် ရေးသားခဲ့သည်။

နန်စီ၏ ခရီးစဉ်နှင့် ပတ်သက်၍ တရုတ်က ထိုင်ဝမ်ရှိ အမေရိက၏ အဆိုပါ လုပ်ရပ်သည် အလွန်အန္တရာယ်များကြောင်း ပြောကြားခဲ့သည်။

အဆိုပါ ခရီးစဉ်သည် ထိုင်ဝမ်ရေလက်ကြားတစ်လျှောက် ငြိမ်းချမ်းရေးနှင့် တည်ငြိမ်ရေးကို ဆိုးရွားစွာ ထိခိုက်စေပြီး တရုတ်နိုင်ငံ၏ အချုပ်အခြာအာဏာနှင့် နယ်မြေတည်တံ့ခိုင်မြဲမှုတို့ကို ပြင်းထန်စွာ ထိပါးခြင်းဖြစ်ကြောင်း ထုတ်ပြန်ချက်တွင် တရုတ်နိုင်ငံခြားရေး ဝန်ကြီးဌာနက ဖော်ပြထားသည်။

Source: CNA