နောင်ချိုမြို့အား ထိန်းချုပ်သိမ်းပိုက်နိုင်ခဲ့သည့် တိုက်ပွဲများအတွင်းပါဝင်တိုက်ခိုက်ခဲ့သော တပ်မ တော်သားများ အောင်ပွဲရ အရာရှိ၊ စစ်သည်များအား ဂုဏ်ပြုခြင်းအခမ်းအနားကို ယနေ့ ဇူလိုင် ၂၁ ရက်တွင် နောင်ချိုမြို့ မြို့နယ်ခန်းမ၌ ကျင်းပပြုလုပ်ရာ
နစက ဒု-ဥက္ကဋ္ဌ၊ ဒု-ဗိုလ်ချုပ်မှူးကြီးစိုးဝင်းမှ နောင်ချိုမြို့သို့သွားရောက်ပြီး တက်ရောက်ခဲ့သည်။
တပ်မတော်၏ဂုဏ်ကိုမြှင့်တင်နိုင်ခဲ့သည့် တိုက်ပွဲဝင် အရာရှိစစ်သည်များအား တပ်မတော်ကိုယ်စား၊ တပ်မတော်ကာကွယ်ရေးဦးစီးချုပ် ကိုယ်စား မိမိအနေဖြင့် ကျေးဇူးတင်ဂုဏ်ယူဝမ်းမြောက်ကာ ရရှိထားသည့်အစဉ်အလာကောင်းများကို ဆက်လက်ထိန်းသိမ်းစောင့်ရှောက်သွားကြရန် မှာကြားသည်။
” အကြမ်းဖက်အဖွဲ့တွေကြောင့် ယာယီနေရပ်စွန့်ခွာနေရတဲ့ ဒေသခံတိုင်းရင်းသားတွေအနေနဲ့ တပ်မတော်ကို မည်မျှယုံကြည် အားကိုးတာကို အားလုံးအသိဘဲဖြစ်ပါတယ်။ ဒါ့ကြောင့် လုံခြုံရေးတပ်ဖွဲ့ဝင်တွေအနေနဲ့ ဒေသခံပြည်သူတွေစိတ်အေးချမ်းသာစွာနဲ့ နေထိုင်စားသောက်နိုင်ရေး၊ လူမှုစီးပွားဘဝဖွံ့ဖြိုးတိုးတက်ရေးလုပ်ငန်းတွေဆောင်ရွက်နိုင်ဖို့ နယ်မြေလုံခြုံရေးနဲ့ နယ်မြေစိုးမိုးရေးလုပ်ငန်းတွေကို အရှိန်အဟုန်နဲ့ ဆက်လက်ဆောင်ရွက်ရပါမယ်”ဟု ဒု-ဗိုလ်ချုပ်မှူးကြီးစိုးဝင်းက ပြောသည်။
ထို့နောက် ဒု-ဗိုလ်ချုပ်မှူးကြီးစိုးဝင်းနှင့် ကာကွယ်ရေးဦးစီးချုပ်ရုံး(ကြည်း)မှ ဒု-ဗိုလ်ချုပ်ကြီးနိုင်နိုင်ဦးတို့က စစ်မြေပြင်တွင် စွမ်းစွမ်းတမံထမ်းဆောင်ခဲ့မှုကြောင့် စစ်မြေပြင်တစ်ဆင့်မြင့်ရာထူးတိုးမြှင့်ခြင်းခံရသည့်စစ်သည်များအား အဆင့်တံဆိပ်များ တပ်ဆင်ပေးခဲ့ကြပြီး အရာရှိ၊ စစ်သည်များအတွက် စားသောက်ဖွယ်ရာများကို ပေးအပ်ခဲ့ကြသည်။