ထိုင်းနိုင်ငံအတွင်းကို မြန်မာအလုပ်သမားတွေ တရားမဝင် ခေါ်သွင်းလာတဲ့ လော်ရီကားတစ်စီး တနင်္လာနေ့(ဧပြီ ၁) က နယ်စပ်ပြည်နယ် ဆန်ခလာဘူရီမှာ တိမ်းမှောက်မှုဖြစ်ခဲ့တာကြောင့် မြန်မာခရီးသည် ၁၄ ဦး ဒဏ်ရာရခဲ့တယ်လို့ သိရပါတယ်။
ဆန်ခလာဘူရီခရိုင် အမှတ် ၃၂၃ လမ်းမပေါ်မှာ တောင်ကုန်းတစ်ခုကနေ အရှိန်နဲ့ဆင်းလာတဲ့ ကားဟာ လမ်းကွေ့တစ်ခုအရောက်မှာ ဒရိုင်ဘာက အရှိန်မထိန်းနိုင်ဖြစ်သွားခဲ့တာဖြစ်ကြောင်း ဆန်ခလာဘူရီပြည်နယ် ရဲမှူး Decharit Pholkamol က ပြောဆိုပါတယ်။ ကားဟာ လမ်းဘေးကို တိမ်းမှောက်သွားခဲ့ပြီး ယာဉ်မောင်းဖြစ်သူကတော့ အခင်းဖြစ်နေရာကနေ ထွက်ပြေးသွားခဲ့တယ်လို့ သိရပါတယ်။
အဆိုပါကားပေါ်မှာ မြန်မာခရီးသည် ၂၉ ဦးပါဝင်ခဲ့ပြီး ၎င်းတို့ထဲက ၁၄ ဦးဒဏ်ရာရခဲ့ရာမှာ ၅ ဦးက ဒဏ်ရာပြင်းထန်ခဲ့တယ်လို့လည်း ရဲမှူး Decharit က ပြောဆိုပါတယ်။
ယင်းမြန်မာနိုင်ငံသားတွေဟာ တနင်္ဂနွေနေ့ညပိုင်းက နယ်စပ်ကို ခြေလျင်ဖြတ်ပြီး ထိုင်းနိုင်ငံအတွင်းကို ဝင်ရောက်လာတာဖြစ်ကြောင်းနဲ့ ယင်းနောက် ၎င်းတို့ကို ကားနဲ့ လာရောက်ခေါ်ဆောင်ပြီး ရည်ရွယ်ရာခရီးဆက်ခဲ့ကြတာဖြစ်ကြောင်း ၎င်းက ဆက်လက်ပြောဆိုပြီး ဘယ်အရပ်ဆီသွားရောက်နေတာလဲဆိုတာကိုတော့ တိကျစွာ ပြောဆိုခဲ့ခြင်း မရှိပါဘူး။
ယခုဖြစ်စဉ်ပါ မြန်မာနိုင်ငံသားအားလုံးကို မြန်မာနိုင်ငံဘက် ပြန်ပို့သွားမှာဖြစ်တယ်လို့လည်း ၎င်းက ပြောဆိုပါတယ်။
မြန်မာဘက်မှာ ဖြစ်နေတဲ့ တိုက်ပွဲတွေကြောင့် ထိုင်းဘက်ကို အလုပ်အကိုင်ရှာဖွေဖို့အတွက် မြန်မာနိုင်ငံသားတွေ ပိုမိုဝင်ရောက်လာဖွယ်ရှိတာကြောင့် ထိုင်းနယ်စပ် လုံခြုံရေးအာဏာပိုင်တေါက သတိပေးတပ်လှန့်မှုတွေလုပ်ထားကြောင်း သိရပါတယ်။
Ref: ဘန်ကောက်ပို့စ်