ထိုင်းက အွန်လိုင်းငွေလိမ်ဂိုဏ်းများနှင့် ပတ်သက်၍ ပြစ်ဒဏ်များ တင်းကျပ်

ဘဏ်များ၊ ဖုန်းအော်ပရေတာများနှင့် ဆိုရှယ်မီဒီယာပိုင်ရှင်များအနေဖြင့် အွန်လိုင်းငွေလိမ်ဂိုဏ်းများကြောင့် ထိခိုက်နစ်နာရမှုများတွင် ၎င်းတို့၏ ပေါ့ဆမှု သို့မဟုတ် ထင်ရာစိုင်းမှုတို့ရှိခဲ့ကြောင်း စစ်ဆေးတွေ့ရှိခဲ့ပါက နစ်နာမှုများအတွက် တာဝန်ယူကြရမည်ဖြစ်သော ဥပဒေပြင်ဆင်ချက်ကို ထိုင်းအစိုးရက ထောက်ခံအတည်ပြုခဲ့ကြောင်း သိရသည်။

ဒစ်ဂျစ်တယ်စီးပွားရေးနှင့် လူမှုရေးရာဝန်ကြီးဌာနသည် နည်းပညာရာဇဝတ်မှု ဖြေရှင်းရေးအစီအမံများဆိုင်ရာ အရေးပေါ်ပြင်ဆင်ချက်အမိန့်ပုံစံဖြင့် ဥပဒေပြင်ဆင်မှုကို အဆိုပြုခဲ့သည်။ ယင်း ပြင်ဆင်အဆိုပြုချက်ကို အင်္ဂါနေ့တွင် အစိုးရအဖွဲ့က အတည်ပြုခဲ့သည်ဟု ဝန်ကြီး Prasert Jantararuangtong က ပြောကြားခဲ့သည်။

ဥပဒေပြင်ဆင်ချက်အရ ငွေကြေးအဖွဲ့အစည်းများ၊ တယ်လီကွန်းနှင့် ဆိုရှယ်မီဒီယာကုမ္ပဏီများသည် လိမ်လည်မှု တိုက်ဖျက်ရေး အစီအမံများကို ၎င်းတို့က လိုက်နာရန် ပျက်ကွက်ခြင်းကြောင့် ငွေကြေးထိခိုက်ဆုံးရှုံးမှုများ ပေါ်ပေါက်ခဲ့ကြောငါး စစ်ဆေးတွေ့ရှိပါက ပြစ်ဒဏ်ပေးခံရမည်ဖြစ်ကြောင်း ဝန်ကြီးက ပြောဆိုခဲ့သည်။ မည်ကဲ့သို့ဖြစ်ရပ်များအပေါ် တာဝန်ယူရမည်ဆိုသည့် အသေးစိတ်အချက်များကိုမူ သူက ပြောဆိုခြင်း မရှိပေ။

ဆက်သွယ်ရေးအော်ပရေတာများနှင့် အမျိုးသားအသံလွှင့်နှင့် ဆက်သွယ်ရေးကော်မရှင်တို့သည် လိမ်လည်သူများအသုံးပြုနေသည်ဟု သံသယရှိသော ဆင်းမ်ကတ်များကို ဆိုင်းငံ့ထားရမည်ဖြစ်သည်ဟုလည်း ပြင်ဆင်ချက်က ပြဌာန်းသည်။ ထို့အပြင် အာဏာပိုင်များသည် တရားရုံး၏ အမှုအခင်းလုပ်ထုံးလုပ်နည်းများ ပြီးပြတ်ချိန်ကို စောင့်စရာမလိုဘဲ လိမ်လည်ခိုးယူခံရသောငွေများကို အလိမ်ခံရသူများထံ ပြန်ပေးအပ်ခွင့်ပြုထားသည်။

ထို့အပြင် ခွင့်ပြုချက်မရှိဘဲ ကိုယ်ရေးကိုယ်တာအချက်အလက်များကို ထုတ်ဖော်မှုအတွက် အမြင့်ဆုံးပြစ်ဒဏ် ဒဏ်ငွေ ဘတ် ၅ သန်း သို့မဟုတ် ထောင်ဒဏ် ၅ နှစ် ချမှတ်နိုင်သကဲ့သို့ ပြစ်ဒဏ်နှစ်ရပ်လုံးကို ချမှတ်နိုင်သည်ဟုလည်း ဖော်ပြထားသည်။

Ref: ဘန်ကောက်ပို့စ်