ရုရှားသမ္မတ ဗလာဒီမာပူတင်နှင့် ထရမ့်တို့၏ အလားအလာရှိသော တွေ့ဆုံမှုအတွက် ပြင်ဆင်မှုများလုပ်နေကြောင်း အမေရိကန် ရွေးကောက်ခံသမ္မတ ဒေါ်နယ်ထရမ့်က ရွေးချယ်ထားသော အမျိုးသားလုံခြုံရေးအကြံပေး မိုက်ဝေ့ါဇ်က ပြောကြားသည်။
“ပြင်ဆင်မှုတွေ လုပ်ဆောင်နေပါတယ်” ဟု ABC News နှင့် အင်တာဗျူးတွင် သူက ပြောကြားခဲ့ခြင်းဖြစ်သည်။
အမေရိကန် ရွေးကောက်ခံသမ္မတ ဒေါ်နယ်ထရမ့်နှင့် ရုရှားသမ္မတ ဗလာဒီမာပူတင်တို့အကြားဖုန်းဖြင့် ဆွေးနွေးမှုများ မကြာမီ ပြုလုပ်နိုင်မည်ဟု မျှော်လင့်ထားကြောင်းကိုလည်း အမျိုးသားလုံခြုံရေးအကြံပေးအဖြစ် ရွေးချယ်ခံထားရသူ မိုက်ဝေါ့ဇ်ကပြောသည်။
“ကျနော်တို့က အဲဒါအတွက် တိကျတဲ့မူဘောင်ကို မသတ်မှတ်ရသေးဘူး” ဟု ABC News နှင့် တွေ့ဆုံမေးမြန်းခန်းတွင် ဖြစ်နိုင်ချေရှိသော တွေ့ဆုံမှုနှင့်ပတ်သက်၍ မေးမြန်းသောအခါ သူက ပြောကြားခဲ့သည်။ “ဒါကို ကျွန်တော်တို့ လုပ်ဆောင်နေပေမယ့် လာမယ့်ရက်တွေနဲ့ ရက်သတ္တပတ်တွေမှာ အနည်းဆုံး အချင်းချင်း အပြန်အလှန်ဖုန်းခေါ်ဆိုဖို့ မျှော်လင့်ထားပါတယ်။ ဒါကြောင့် အဆင့်တစ်ဆင့် ဖြစ်မှာဖြစ်ပြီး အဲဒီကနေ ဆက်ပြီးဆောင်ရွက်သွားမှာပါ”ဟုလည်း သူကဆိုသည်။
ယူကရိန်းပဋိပက္ခကို အဆုံးသတ်ရန် လိုအပ်သဖြင့် ပူတင်နှင့် တွေ့ဆုံရန် ပြင်ဆင်မှုများ လုပ်ဆောင်နေကြောင်း ထရမ့်က ဇန်နဝါရီ ၁၀ ရက်နေ့က ပြောကြားခဲ့သည်။ ပူတင်၏ ပြန်ကြားရေးတာဝန်ခံ Dmitry Peskov ၏အဆိုအရမူ ရုရှားခေါင်းဆောင်သည် ကြိုတင်သတ်မှတ်ချက်မရှိဘဲ အမေရိကန်ခေါင်းဆောင်သစ် နှင့် တွေ့ဆုံရန် အသင့်ဖြစ်နေပြီဖြစ်ကြောင်း သိရသည်။