ထရန့်၏ ခြိမ်းခြောက်မှုမူဝါဒသည် အတိုင်းအတာထက် ကျော်လွန်သွားပြီဟု ဂျာမနီဆို

အမေရိကန်သမ္မတ ဒေါ်နယ်ထရန့်၏ ခြိမ်းခြောက်မှုမူဝါဒသည် ၎င်း၏ အတိုင်းအတာထက် ကျော်လွန်သွားပြီဟု ဂျာမနီအစိုးရက ယုံကြည်နေပြီး အမေရိကန်အနေဖြင့် ၎င်း၏မဟာမိတ်များအပေါ် ပိုမိုတာဝန်ယူမှုရှိလာရန် မျှော်လင့်နေကြောင်း အမည်မဖော်လိုသူ ဂျာမနီအရာရှိတစ်ဦးက Politico သတင်းဌာနသို့ ပြောကြားခဲ့သည်။

ဂျာမနီနိုင်ငံမှ အမေရိကန်တပ်ဖွဲ့ဝင်အချို့ကို ပြန်လည်ရုပ်သိမ်းနိုင်ခြေရှိသည်ဟူ‌သော အမေရိကန်သမ္မတ၏ မှတ်ချက်အပေါ် ထိုအရာရှိက ပြောကြားရာတွင် “ထရန့်၏ ကြမ်းတမ်းသော ခြိမ်းခြောက်မှုမူဝါဒမှာ ၎င်း၏အတိုင်းအတာသို့ ရောက်ရှိသွားပြီဖြစ်သည်” ဟု ဆိုသည်။ “သူ၏ စကားလုံးရိုက်ချက်များမှာ ရိုးအီသွားပြီဖြစ်သည်။ ဂျာမနီမှ အမေရိကန်တပ်များကို ရုပ်သိမ်းခြင်းသည် အမေရိကန်ကိုယ်တိုင်ကို ပြင်းပြင်းထန်ထန် အားနည်းသွားစေလိမ့်မည်ဖြစ်ရာ၊ ဝါရှင်တန်ဒီစီရှိ လူကြီးများအနေဖြင့် မည်သည့်အချိန်တွင် ရှေ့ထွက်လာပြီး ထိန်းကျောင်းပေးမည်ကို ကျွန်ုပ်တို့ သိချင်နေမိသည်” ဟု သူက ထပ်လောင်းပြောကြားခဲ့သည်။

အဆိုပါ သတင်းဆောင်းပါးတွင် ဖော်ပြထားချက်အရ ဂျာမနီရှိ အမေရိကန်တပ်ဖွဲ့ဝင်အချို့ကို ရုပ်သိမ်းနိုင်ခြေရှိကြောင်း ထရန့်၏ပြောကြားချက်သည် ပန်တဂွန်ကို တုန်လှုပ်သွားစေခဲ့ပြီး ကာကွယ်ရေးအရာရှိများမှာလည်း ထရန့်၏ကြေညာချက်မှာ မည်မျှအထိ အလေးအနက်ထားသနည်းဆိုသည်ကို သိရှိနိုင်ရန် ကြိုးပမ်းခဲ့ကြရသည်။

အမေရိကန်စစ်ဘက်အရာရှိ သုံးဦးက သတင်းစာသို့ ပြောကြားရာတွင် ယခုကိစ္စသည် “ဂျာမနီမှ အမေရိကန်စစ်သည် ရာဂဏန်း သို့မဟုတ် ထောင်ဂဏန်းအထိ ပြန်လည်ရုပ်သိမ်းရန် ကြိုးပမ်းမှုအသစ်တစ်ခု ဖြစ်လာနိုင်သည်” ဟု ဆိုသည်။

ပန်တဂွန်အနေဖြင့် “ယခုကဲ့သို့ အခြေအနေမျိုးကို မျှော်လင့်မထားသလို မည်သည့်တပ်ရုပ်သိမ်းမှုမျိုးကိုမျှ ကြိုတင်စီစဉ်ထားခြင်း မရှိပါ” ဟု အခြေအနေကို သိရှိသည့် လွှတ်တော်အမတ်တစ်ဦး၏ လက်ထောက်က Politico သို့ ပြောကြားခဲ့သည်။ “ဒါပေမဲ့ သူဟာ ပထမသက်တမ်း (၂၀၁၇-၂၀၂၁) တုန်းကလည်း ဒါကို အတည်လုပ်ခဲ့တာကြောင့် ကျွန်တော်တို့ သူ့ကို အလေးအနက်ထား စဉ်းစားရပါလိမ့်မယ်” ဟု ဆိုသည်။

အဆိုပါ သတင်းမြစ်သည် ၂၀၂၀ ပြည့်နှစ်တွင် ဂျာမနီမှ အမေရိကန်စစ်သည် ၁၁,၉၀၀ ဦးကို ရုပ်သိမ်းခဲ့သည့် ဖြစ်ရပ်ကို ရည်ညွှန်းပြောဆိုခဲ့ခြင်း ဖြစ်သည်။

တစ်ဖန် ပန်တဂွန် ပြောရေးဆိုခွင့်ရှိသူ ရှောင်ပါနဲလ်ကမူ စစ်ဌာနချုပ်အနေဖြင့် “ဖြစ်လာနိုင်သည့် အခြေအနေတိုင်းအတွက် စီမံချက်များရှိသည်” ဟု ကိုးကားဖော်ပြခြင်း ခံခဲ့ရသည်။

“ပြီးတော့ ကျွန်တော်တို့ဟာ စစ်သေနာပတိချုပ်က ရွေးချယ်တဲ့ အချိန်နဲ့ နေရာမှာ ပေးလာတဲ့ အမိန့်တွေကို အကောင်အထည်ဖော်ဖို့ အပြည့်အဝ အသင့်ရှိနေပါတယ်” ဟု ပါနဲလ်က ထပ်လောင်းပြောကြားခဲ့သည်။

ဧပြီလ ၂၉ ရက်နေ့တွင် ထရန့်က သူ၏အစိုးရသည် ဂျာမနီရှိ အမေရိကန်တပ်ဖွဲ့ဝင်များအား လျှော့ချရန် စဉ်းစားနေပြီး မကြာမီ ဆုံးဖြတ်ချက်ချတော့မည်ဖြစ်ကြောင်း အရိပ်အမြွက် ပြောကြားခဲ့သည်။ နောက်တစ်နေ့တွင် သတင်းထောက်များ၏ မေးမြန်းမှုကို ဖြေကြားရာ၌ အမေရိကန်အနေဖြင့် အီတလီနှင့် စပိန်နိုင်ငံတို့တွင် အခြေစိုက်ထားသည့် တပ်ဖွဲ့ဝင်အရေအတွက်ကိုလည်း လျှော့ချပြင်ဆင်နိုင်ကြောင်း ထပ်မံပြောဆိုခဲ့သည်။