တောင်ကိုရီးယားသမ္မတ၏ စစ်အုပ်ချုပ်ရေးကြေညာမှုအပြီး တိုင်းပြည်တွင် မငြိမ်မသက်မှုများပေါ်ပေါက်လာရခြင်းကြောင့် ယင်းအမိန့်ကို ရုတ်တရက်ထုတ်ပြန်ကြေညာလိုက်ခြင်းနှင့်ပတ်သက်၍ သမ္မတ ယွန်ဆွန်ယိုအား စုံစမ်းစစ်ဆေးမှုများစတင်ဆောင်ရွက်နေပြီဖြစ်ကြောင်း တောင်ကိုရီးယား အကြီးတန်းရဲအရာရှိတစ်ဦးက ယနေ့ ဒီဇင်ဘာ ၅ ရက်တွင် ပြောကြားလိုက်သည်။
တောင်ကိုရီးယားနိုင်ငံ အမျိုးသားရဲတပ်ဖွဲ့၏ အမျိုးသားစုံစမ်းထောက်လှမ်းရေးဌာနချုပ်အကြီးအကဲ ဝူးဂျွန်ဆူးက “အဲဒီအမှုကိုစုံစမ်းစစ်ဆေးဖို့ တာဝန်အသီးသီးပေးအပ်လိုက်ပြီးပါပြီ”ဟု လွှတ်တော်အမတ်များအား ပြောကြားလိုက်ခြင်းဖြစ်သည်။
တောင်ကိုရီးယား သမ္မတ ယွန်ဆွတ်ယိုသည် အင်္ဂါနေ့ညက နိုင်ငံတွင် အရေးပေါ် စစ်အုပ်ချုပ်ရေးကို ရုပ်မြင်သံကြားမှတဆင့် ရုတ်တရက် ကြေညာခဲ့ပြီး၊ “မြောက်ကိုရီးယား၏ ကွန်မြူနစ်အင်အားစုများထံမှ နိုင်ငံကို ကာကွယ်ရန်နှင့် နိုင်ငံတော်ဆန့်ကျင်နေသည့် အစိတ်အပိုင်းများကို ဖယ်ရှားပစ်ရန် ယခုဆောင်ရွက်မှုသည် လိုအပ်ကြောင်း” ကိုပါ ထည့်သွင်း ပြောဆိုခဲ့သည်။
ထိုသို့ကြေညာလိုက်ပြီးနောက် လူထုဆန္ဒပြမှုများပေါ်ပေါက်လာခဲ့ပြီးနောက်တွင် ပါလီမန်အမတ်များသည် အမျိုးသားလွှတ်တော်တွင် စုဝေးကာ သမ္မတ၏ ကြေညာချက်အပေါ် မဲခွဲဆုံးဖြတ်ခဲ့ကြသည်။
အဆိုပါ မဲခွဲဆုံးဖြတ်မှုအရ စစ်အုပ်ချုပ်ရေးအမိန့်ကို ပြန်လည်ရုပ်သိမ်းကြောင်း တောင်ကိုရီးယားသမ္မတက ဗုဒ္ဓဟူးနေ့အစောပိုင်းတွင် ထပ်မံကြေညာခဲ့ရပြန်သည်။
ထို့နောက် သမ္မတအား နှုတ်ထွက်ရန်တောင်းဆိုဆန္ဒပြမှုများပေါ်ပေါက်လာပြီး၊ တောင်ကိုရီးယားသမ္မတရုံး ဦးစီးအရာရှိချုပ်အပါအဝင် အကြီးတန်းအတွင်းဝန်များအားလုံးသည် ဒီဇင်ဘာ ၄ ရက်နေ့တွင် အစုလိုက်အပြုံလိုက်ရာထူးမှနှုတ်ထွက်စာ တင်ခဲ့ကြသည်။
အာဏာရပါတီ၏ အဓိကအတိုက်အခံပါတီဖြစ်သည့် ဒီမိုကရက်တစ်ပါတီကလည်း အရေးပေါ် စစ်အုပ်ချုပ်ရေးအမိန့်ကြောင့် မငြိမ်မသက်မှုများဖြစ်ခဲ့ရခြင်းနှင့်ပတ်သက်၍ စွပ်စွဲပြစ်တင်ကြောင်း အဆိုတင်သွင်းခဲ့ရာ ကာကွယ်ရေးဝန်ကြီး ကင်မ်ယိုဟန်သည်လည်း နိုင်ငံသားများကိုတောင်းပန်ခဲ့ပြီး ဒီဇင်ဘာ ၄ ရက်နေ့တွင်ပင် သမ္မတထံ နုတ်ထွက်စာ တင်ခဲ့ပြန်သည်။
သမ္မတယွန်ဆွတ်ယိုကို စွပ်စွဲပြစ်တင်ရန်အတွက် အတိုက်အခံပါတီ ခြောက်ခုက ယနေ့ ဒီဇင်ဘာ ၅ ရက်တွင် လွှတ်တော်အစည်းအဝေး၌ တင်ပြသွားမည်ဖြစ်ပြီး၊ သမ္မတအား စွပ်စွဲပြစ်တင်ရေးအတွက် လွှတ်တော်တွင် ဒီဇင်ဘာ ၆ ရက် သိုမဟုတ် ဒီဇင်ဘာ ၇ ရက်တွင် မဲခွဲဆုံးဖြတ်သွားမည်ဖြစ်သည်။