တရုတ်၏ နာမည်ကျော် နီရှင်းမြေအိုးယဉ်ကျေးမှုကို ထိတွေ့ခံစားနိုင်သည့် ချင်ကျိုး နီရှင်းမြေအိုးပြတိုက်

တရုတ်နိုင်ငံ၏ “နာမည်ကျော် မြေအိုးကြီးလေးမျိုး” အနက် တစ်ခုအဖြစ် သတ်မှတ်ခံထားရသည့် ချင်ကျိုး နီရှင်းမြေအိုး (Qinzhou Nixing Pottery) ယဉ်ကျေးမှုအမွေအနှစ်များကို စုစည်းပြသထားသည့် ချင်ကျိုး နီရှင်းမြေအိုးပြတိုက်သည် ဂွမ်ရှီးကျွမ်းကိုယ်ပိုင်အုပ်ချုပ်ခွင့်ရဒေသ၊ ချင်ကျိုးမြို့ရှိ အထင်ကရ ယဉ်ကျေးမှုလေ့လာရေးနေရာတစ်ခုအဖြစ် ရပ်တည်လျက်ရှိသည်။

ချင်ကျိုး Garden Expo Park အတွင်း တည်ရှိသည့် အဆိုပါပြတိုက်ကို ရိုးရာမြေအိုးပြုလုပ်ရာတွင် အသုံးပြုသည့် လက်ဖြင့်လှည့်ဆွဲပုံဖော်သည့် နည်းပညာကို အခြေခံကာ ထူးခြားဆန်းသစ်သည့် ဗိသုကာလက်ရာဖြင့် တည်ဆောက်ထားခြင်းဖြစ်သည်။

ပြတိုက်အတွင်းတွင် နီရှင်းမြေအိုး၏ သမိုင်းကြောင်း၊ ရိုးရာထုတ်လုပ်မှုနည်းစနစ်များ၊ ရှေးဟောင်းလက်မှုပညာ ခြောက်ရပ် (Six Arts of Ancient Methods) နှင့် ကျော်ကြားသော မြေအိုးပညာရှင်များ၏ လက်ရာမြောက်အနုပညာဖန်တီးမှုများကို စုံလင်စွာ လေ့လာနိုင်သည်။

ထူးခြားသည်မှာ နီရှင်းမြေအိုး ပြုလုပ်သည့် လုပ်ငန်းစဉ်များကို ကိုယ်တိုင် လက်တွေ့ပါဝင်ပြုလုပ်ခွင့် ရရှိခဲ့ခြင်းဖြစ်သည်။ မြေကြီးနှင့် ရေကို ပေါင်းစပ်ကာ ပုံသဏ္ဌာန်တစ်ခု ဖန်တီးရသည့် အခိုက်အတန့်တွင် သဘာဝ၏ အနုပညာဆန်မှုကို အနီးကပ်ထိတွေ့ခံစားနိုင်ခဲ့သလို စိတ်အေးချမ်းမှုနှင့် ပျော်ရွှင်မှုကိုလည်း တစ်ပြိုင်နက်တည်း ခံစားခဲ့ရသည်။

နီရှင်းမြေအိုးကို ကိုယ်တိုင်ပုံဖော်နေချိန်တွင် မြန်မာနိုင်ငံရှိ ရိုးရာအိုးလုပ်ငန်းများကို အမှတ်ရမိသည်။ မြေကြီးတစ်စကို လက်ဖြင့်ထိတွေ့ပုံဖော်ရသည့် ခံစားချက်၊ အိုးတစ်လုံးဖြစ်လာရန် စိတ်ရှည်သည်းခံစွာ ဖန်တီးရသည့် လုပ်ငန်းစဉ်များမှာ မြန်မာ့ရိုးရာအိုးလုပ်ငန်းနှင့် များစွာဆင်တူနေသည်။ ယင်းအတွေ့အကြုံက ရိုးရာလက်မှုပညာများသည် နိုင်ငံမတူသော်လည်း လူသားတို့၏ ဖန်တီးနိုင်စွမ်းနှင့် ယဉ်ကျေးမှုအမွေအနှစ်များကို ဆက်စပ်ပေးထားသည့် ဘုံတန်ဖိုးတစ်ခုဖြစ်ကြောင်း ပိုမိုနားလည်စေခဲ့သည်။

ရိုးရိုးမြေသားတစ်စကို လက်ရာမြောက်သော အနုပညာပစ္စည်းအဖြစ် ပြောင်းလဲနိုင်ရန် ခေတ်အဆက်ဆက် လက်မှုပညာရှင်များက စိုက်ထုတ်ခဲ့သည့် ကြိုးပမ်းအားထုတ်မှုများကို လေ့လာရချိန်တွင်လည်း အံ့အားသင့်လေးစားမိခဲ့ရသည်။

ရှေးဟောင်းခေတ်မှ ခေတ်ပြိုင်ကာလအထိ ဖန်တီးထားသည့် မြေအိုးလက်ရာများကို ကြည့်ရှုရင်း နီရှင်းမြေအိုးသည် အသုံးအဆောင်ပစ္စည်းတစ်ခုသာမက တရုတ်ပြည်၏ ယဉ်ကျေးမှုအမွေအနှစ်၊ အနုပညာနှင့် လက်မှုပညာသမိုင်းကို ကိုယ်စားပြုနေသည့် တန်ဖိုးကြီးအမွေအနှစ်တစ်ခုဖြစ်ကြောင်း ပိုမိုသဘောပေါက်စေခဲ့သည်။

ယဉ်ကျေးမှု၊ ပညာရေးနှင့် ခရီးသွားလုပ်ငန်းများ ပေါင်းစပ်ဖွံ့ဖြိုးနေသည့် ချင်ကျိုး နီရှင်းမြေအိုးပြတိုက်သည် တရုတ်ရိုးရာမြေအိုးအနုပညာ၏ ထူးခြားမှုများကို ကိုယ်တိုင်ထိတွေ့ခံစားနိုင်သည့် အမှတ်တရကောင်းများ ပေးစွမ်းနေသည့် ယဉ်ကျေးမှုလေ့လာရေးနေရာတစ်ခုဖြစ်သည်။