တရုတ်လေယာဉ်တင်သင်္ဘော ထိုင်ဝမ်ရေလက်ကြားကို ဖြတ်သန်း

တရုတ်နိုင်ငံ၏ အသစ်လွင်ဆုံးနှင့် ခေတ်အမီဆုံး လေယာဉ်တင်သင်္ဘော ဖူကျန်းသည် အင်္ဂါနေ့က ထိုင်ဝမ်ရေလက်ကြားကို ဖြတ်သန်းခုတ်မောင်းခဲ့သည်ဟု ထိုင်ဝမ်ကာကွယ်ရေးဝန်ကြီးဌာနက ပြောကြားခဲ့သည်။ လေယာဉ်တင်သင်္ဘောသည် ပြီးခဲ့သည့်လတွင် တရားဝင်တပ်တော်ဝင်ခဲ့ပြီးနောက်ပိုင်း ရေလက်ကြားကို ပထမဆုံအကြိမ် ဖြတ်သန်းခဲ့ခြင်းဖြစ်သည်။

တရုတ်က ၎င်း၏ ပိုင်နက်နယ်မြေအဖြစ် ရှုမြင်သော ထိုင်ဝမ်သည် ကျွန်းတစ်ဝိုက်တွင် တရုတ်စစ်တပ်၏ စစ်ရေးလှုပ်ရှားမှုများကို နေ့စဉ်နီးပါး သတင်းထုတ်ပြန်လျက်ရှိသည်။ တရုတ်စစ်တပ်၏ အဆိုပါလှုပ်ရှားမှုများသည် ဒီမိုကရေစီနည်းကျရွေးကောက်ခံအစိုးရအပေါ် ဖိအားပေးသည့် အစီအမံတစ်ရပ်ဖြစ်သည်ဟု တိုင်ပေက ရှုမြင်သည်။

ယမန်နေ့က ဖူကျန်းသည် ရေလက်ကြားကို ဖြတ်သန်းသွားခဲ့ပြီး ၎င်းကို ထိုင်ဝမ်တပ်ဖွဲ့များက စောင့်ကြည့်နေခဲ့ကြောင်း ထိုင်ဝမ်ကာကွယ်ရေးဝန်ကြီးဌာနက ဗုဒ္ဓဟူးနေ့တွင် ပြောကြားခဲ့သည်။

ကုန်းပတ်ပေါ်တွင် လေယာဉ်များမပါဝင်သော လေယာဉ်တင်သင်္ဘော၏ အဖြူအမည်းပုံကို ဝန်ကြီးဌာနက ဖော်ပြခဲ့သည်။ အဆိုပါဓာတ်ပုံကို မည်သည့်နေရာတွင် ရိုက်ကူးခဲ့ကြောင်းနှင့် အခြားအသေးစိတ်အချက်အလက်များကိုမူ ဖော်ပြခဲ့ခြင်းမရှိပေ။

ယခုသတင်းနှင့်ပတ်သက်၍ မှတ်ချက်ပေးရန်တောင်းဆိုမှုကို တရုတ်ကာကွယ်ရေးဝန်ကြီးဌာနက လတ်တလောတွင် တုန့်ပြန်ခဲ့ခြင်းမရှိပေ။

သင်္ဘောသည် တရုတ်၏ အဓိကရေတပ်သင်္ဘောတည်ဆောက်ရေးစက်ရုံတည်ရှိရာ ရှန်ဟိုင်းရှိ ချန်ရှင်းကျွန်းသို့ ဦးတည်နေဖွယ်ရှိကြောင်း ထိုင်ဝမ်ကာကွယ်ရေးဝန်ကြီး ဝယ်လင်တန်ကူးက ပြောကြားခဲ့သည်။ ဝန်ကြီးဌာနအနေဖြင့် စစ်ရေးလှုပ်ရှားမှုဆောင်ရွက်ခြင်းကို မတွေ့ရှိကြောင်းလည်း ၎င်းက ပြောကြားခဲ့သည်။

Ref: တီဘီအက်စ်နူးစ်