ဂွမ်ရှီးကျွမ်း ကိုယ်ပိုင်အုပ်ချုပ်ခွင့်ရဒေသရှိ လင်ရှန်ခရိုင် (Lingshan County) သည် “တရုတ်နိုင်ငံ၏ လိုင်ချီးသီးဇာတိမြေ” အဖြစ် လူသိများပြီး လိုင်ချီးထွက်ရှိမှုအရ ဂွမ်ရှီးဒေသတွင် အဆင့် (၁)၊ တရုတ်နိုင်ငံတစ်ဝန်းတွင် အဆင့် (၂) နေရာ၌ ရပ်တည်နေသည့် အရေးပါသော လိုင်ချီးထုတ်လုပ်ရေးဒေသတစ်ခုဖြစ်ကြောင်း သိရပါတယ်။
လင်ရှန်လိုင်ချီးသည် အမျိုးသားအဆင့် ပထဝီဝင်ညွှန်းကိန်း ကာကွယ်မှုနှင့် စိုက်ပျိုးရေးထုတ်ကုန် ပထဝီဝင်ညွှန်းကိန်း အသိအမှတ်ပြုလက်မှတ်များ ရရှိထားသည့် ထင်ရှားသော ဒေသထွက်ကုန်တစ်မျိုးဖြစ်ပါတယ်။ ၂၀၂၅ ခုနှစ်အထိ လင်ရှန်ခရိုင်၏ လိုင်ချီးစိုက်ဧရိယာမှာ မူ (Mu) ၄၂၂,၆၀၀ ခန့်ရှိပြီး နှစ်စဉ်ထွက်ရှိမှုမှာ တန်ချိန် ၁၉၀,၀၀၀ ခန့် ရှိကြောင်း သိရပါတယ်။
နှစ်ပေါင်း ၂,၀၀၀ ကျော် လိုင်ချီးစိုက်ပျိုးမှုသမိုင်းရှိသည့် လင်ရှန်ခရိုင်တွင် လိုင်ချီးမျိုးစိတ် ၆၇ မျိုး စိုက်ပျိုးလျက်ရှိပြီး မကြာသေးမီနှစ်များအတွင်း Seedless Litchi အပါအဝင် မျိုးသစ် ၂၅ မျိုးကိုလည်း တိုးချဲ့စိုက်ပျိုးနိုင်ခဲ့ပါတယ်။
လက်ရှိတွင် လင်ရှန်ခရိုင်သည် စိုက်ပျိုးရေး၊ ထုတ်လုပ်ရေး၊ ခရီးသွားလုပ်ငန်းနှင့် ယဉ်ကျေးမှုကဏ္ဍများကို ပေါင်းစပ်ဖွံ့ဖြိုးစေသည့် စက်မှုကွင်းဆက်ပြည့်စုံသော လိုင်ချီးစီးပွားရေးအခြေခံဒေသတစ်ခုအဖြစ် ဖွံ့ဖြိုးတိုးတက်လျက်ရှိပါတယ်။
လိုင်ချီးပင်များ ပြည့်နှက်နေသည့် လင်ရှန်ခရိုင်သို့ ရောက်ရှိချိန်တွင် စိမ်းလန်းဝေဆာနေသော ဥယျာဉ်ကြီးများနှင့် အနီရောင်လိုင်ချီးသီးအုပ်များကို မြင်တွေ့ရခြင်းက စိတ်လှုပ်ရှားဖွယ်ကောင်းလှပါတယ်။ အရွယ်အစားနှင့် မျိုးကွဲအမျိုးမျိုးရှိသည့် လိုင်ချီးသီးများကို အနီးကပ်လေ့လာခွင့်ရခဲ့သကဲ့သို့ သစ်ပင်ပေါ်မှ တိုက်ရိုက်ခူးဆွတ်ပြီး လတ်ဆတ်စွာ မြည်းစမ်းခွင့်ရခဲ့ခြင်းမှာလည်း ထူးခြားသည့် အတွေ့အကြုံတစ်ခု ဖြစ်ခဲ့ပါတယ်။
သစ်ပင်ပေါ်မှ ခူးဆွတ်ပြီးစ လိုင်ချီးသီး၏ အရသာမှာ ထူးကဲစွာ ချိုမြပြီး သဘာဝရနံ့နှင့် လတ်ဆတ်မှုကို အပြည့်အဝ ခံစားရစေသည်။ လိုင်ချီးသီးများကို ကိုယ်တိုင်ခူးဆွတ်ကာ မြည်းစမ်းရသည့် လတ်ဆတ်ချိုမြသော အရသာသည် ရင်ထဲအထိ စွဲကျန်စေပါတယ်။
“လင်ရှန်ခရိုင်ကို ရောက်တဲ့အချိန်မှာ ပထမဆုံး သတိထားမိတာကတော့ လိုင်ချီးဥယျာဉ်ကြီးတွေပါပဲ။ အနီရောင်လိုင်ချီးသီးတွေ အုပ်လိုက်ကြီး သီးနေတာကို မြင်ရတာ အရမ်းပျော်ဖို့ကောင်းပါတယ်။အမှတ်တရ အဖြစ်ဆုံးကတော့ လိုင်ချီးသီးတွေကို သစ်ပင်ပေါ်ကနေ ကိုယ်တိုင်ခူးဆွတ်ပြီး မြည်းစမ်းခွင့်ရခဲ့တာပါ။ ကိုယ်တိုင်ခူးပြီး ချက်ချင်းမြည်းစမ်းလိုက်တဲ့အချိန်မှာတော့ လိုင်ချီးသီးရဲ့ လတ်ဆတ်မှု၊ ချိုမြမှုနဲ့ သဘာဝရနံ့တွေကို အပြည့်အဝခံစားရပါတယ်။ သစ်ပင်ပေါ်က ခူးဆွတ်ပြီးစ အသီးရဲ့ ချိုမြမှုက ပိုမိုပြည့်စုံပြီး ရင်ထဲအထိ စိမ့်ဝင်သွားသလို ခံစားရပါတယ်။”ဟု
လိုင်ချီးဥယျာဥ်အတွင်း လေ့လာခဲ့သူတစ်ဦးက ပြောပါတယ်။
လိုင်ချီးဥယျာဉ်အတွင်း လျှောက်လှမ်းရင်း အသီးများကို ကိုယ်တိုင်ခူးဆွတ်မြည်းစမ်းခဲ့ရခြင်းသည် လင်ရှန်ခရိုင်၏ လိုင်ချီးယဉ်ကျေးမှု၊ စိုက်ပျိုးရေးအမွေအနှစ်နှင့် ဒေသခံစီးပွားရေးဖွံ့ဖြိုးမှုကို ပိုမိုနီးကပ်စွာ ထိတွေ့ခံစားနိုင်သည့် အမှတ်တရကောင်းတစ်ခု ဖြစ်ခဲ့ရပါတယ်။