တရုတ်နိုင်ငံ၏ အနောက်ပိုင်း ကုန်း-ရေကြောင်း ကုန်သွယ်ရေးစင်္ကြံသစ် (New Western Land-Sea Corridor) အတွက် အဓိကမဟာဗျူဟာစီမံကိန်းဖြစ်သည့် ပင်လုတူးမြောင်း (Pinglu Canal) စီမံကိန်းကို ၂၀၂၆ ခုနှစ် စက်တင်ဘာလတွင် အပြီးသတ်ဖွင့်လှစ်နိုင်ရန် ဆောင်ရွက်လျက်ရှိကြောင်း သိရသည်။
ပင်လုတူးမြောင်းသည် နန်နင်းမြို့ရှိ ရှီကျင်ရေလှောင်ကန်ဧရိယာမှ စတင်ကာ ချင်ကျိုးမြို့နှင့် ဘေ့ပူပင်လယ်ကွေ့ (Beibu Gulf) သို့ ဆက်သွယ်ဖောက်လုပ်ထားခြင်းဖြစ်ပြီး စုစုပေါင်းအရှည် ၁၃၄.၂ ကီလိုမီတာရှိသည်။ တူးမြောင်းကို တန်ချိန် ၅,၀၀၀ အထိရှိသော သင်္ဘောများ သွားလာနိုင်သည့် Class-I Inland Waterway စံချိန်စံညွှန်းဖြင့် တည်ဆောက်ထားကြောင်း သိရသည်။
စုစုပေါင်းရင်းနှီးမြှုပ်နှံမှု ယွမ် ၇၂.၇ ဘီလီယံခန့်ရှိသည့် အဆိုပါစီမံကိန်းတွင် ရေကြောင်းလမ်းကြောင်းဖောက်လုပ်ခြင်း၊ သင်္ဘောဆိပ်နှင့် ကုန်စည်ပို့ဆောင်ရေးအချက်အချာများ တည်ဆောက်ခြင်း၊ ရေအရင်းအမြစ်စီမံခန့်ခွဲရေး အဆောက်အအုံများ အဆင့်မြှင့်တင်ခြင်း၊ မြစ်ကူးတံတားများနှင့် ဆက်စပ်အခြေခံအဆောက်အအုံများ တည်ဆောက်ခြင်းတို့ ပါဝင်သည်။
ပင်လုတူးမြောင်း ပြီးစီးပါက ဂွမ်ရှီးဒေသနှင့် တရုတ်နိုင်ငံ အနောက်တောင်ပိုင်းဒေသများမှ အာဆီယံနိုင်ငံများသို့ သွားရောက်နိုင်မည့် အတိုဆုံးနှင့် ကုန်ကျစရိတ်အသက်သာဆုံး ရေကြောင်းကုန်သွယ်ရေးလမ်းကြောင်းတစ်ခု ဖြစ်လာမည်ဖြစ်ကြောင်း သိရသည်။ လက်ရှိ ကွမ်ကျိုးဆိပ်ကမ်းမှတစ်ဆင့် သွားလာနေသည့် လမ်းကြောင်းနှင့် နှိုင်းယှဉ်ပါက အတွင်းပိုင်းရေကြောင်းခရီးအကွာအဝေးကို ကီလိုမီတာ ၅၆၀ ကျော် လျှော့ချနိုင်မည်ဖြစ်ပြီး ကုန်စည်သယ်ယူပို့ဆောင်ရေး ကုန်ကျစရိတ်များကိုလည်း လျှော့ချပေးနိုင်မည်ဟု မျှော်မှန်းထားသည်။
စီမံကိန်းသည် အာဆီယံဒေသ၊ ဘေ့ပူပင်လယ်ကွေ့ စီးပွားရေးဇုန်၊ ချန်ဒူး-ချုံချင်း စီးပွားရေးစက်ဝိုင်းနှင့် ကွမ်တုံ-ဟောင်ကောင်-မကာအို မဟာပင်လယ်ကွေ့ဒေသတို့အကြား ကုန်သွယ်ရေးနှင့် ထောက်ပံ့ပို့ဆောင်ရေးကွင်းဆက်များကို ပိုမိုချိတ်ဆက်ပေးမည့် အရေးပါသော အခြေခံအဆောက်အအုံစီမံကိန်းတစ်ခုအဖြစ် သတ်မှတ်ခံထားရသည်။
မြန်မာနိုင်ငံအနေဖြင့်လည်း တရုတ်နိုင်ငံနှင့် အာဆီယံအကြား ကုန်သွယ်ရေးနှင့် ချိတ်ဆက်ဆောင်ရွက်မှုများတွင် အရေးပါသည့် ပထဝီဝင်အနေအထားကို ပိုင်ဆိုင်ထားသည့်အတွက် ပင်လုတူးမြောင်းစီမံကိန်းမှတစ်ဆင့် ဒေသတွင်း ကုန်စည်စီးဆင်းမှု၊ ထောက်ပံ့ပို့ဆောင်ရေးနှင့် နယ်စပ်ကုန်သွယ်ရေးလုပ်ငန်းများ ပိုမိုတိုးတက်လာနိုင်ကြောင်း သုံးသပ်မှုများ ထွက်ပေါ်လျက်ရှိသည်။
ထို့ပြင် တရုတ်နိုင်ငံ၏ အနောက်ပိုင်း ကုန်း-ရေကြောင်း ကုန်သွယ်ရေးစင်္ကြံသစ် အကောင်အထည်ဖော်မှု ပိုမိုထိရောက်လာခြင်းနှင့်အတူ မြန်မာနိုင်ငံအပါအဝင် အာဆီယံနိုင်ငံများနှင့် တရုတ်နိုင်ငံအကြား ကုန်သွယ်ရေး၊ ရင်းနှီးမြှုပ်နှံမှုနှင့် စီးပွားရေးပူးပေါင်းဆောင်ရွက်မှုများ ပိုမိုကျယ်ပြန့်လာမည်ဟု မျှော်မှန်းထားကြောင်း သိရသည်။
ပင်လုတူးမြောင်းစီမံကိန်း ပြီးစီးပါက ဂွမ်ရှီးဒေသ၏ တရုတ်-အာဆီယံ ပူးပေါင်းဆောင်ရွက်ရေး တံခါးပေါက်အဖြစ် အခန်းကဏ္ဍကို ပိုမိုခိုင်မာစေမည်ဖြစ်ပြီး ဒေသတွင်း ကုန်သွယ်ရေး၊ ရင်းနှီးမြှုပ်နှံမှုနှင့် စက်မှုဖွံ့ဖြိုးတိုးတက်မှုများကို အရှိန်အဟုန်ဖြင့် မြှင့်တင်ပေးနိုင်မည်ဖြစ်ကြောင်း သိရသည်။