တရုတ်နိုင်ငံသို့ အလည်အပတ်မသွားရောက်မီတစ်ရက်အလိုတွင် ရုရှားသမ္မတ ဗလာဒီမာပူတင်က ကုန်သွယ်ရေးပိတ်ဆို့မှုများ၏ဒ-ဏ်နှင့် ယူကရိန်းစစ်ပွဲ ကုန်ကျစရိတ်များကြောင့် နိုင်ငံ၏ စီးပွားရေးဆုတ်ယုတ်ကျဆင်းနေမှုအတွက် ယူအက်စ်၏ ပိတ်ဆို့အရေးယူမှုများကို ရှုတ်ချခဲ့သည်။
ကမ္ဘာလုံးဆိုင်ရာ ကုန်သွယ်မှုတွင် ခွဲခြားဆက်ဆံသည့် ပိတ်ဆို့အရေးယူမှုများကို ရုရှားနှင့် တရုတ်နိုင်ငံတို့က ပူးတွဲဆန့်ကျင်ကြောင်း စနေနေ့တွင် ဖော်ပြခဲ့သည့် တရုတ်အစိုးရပိုင် ရှင်းဟွာသတင်းဌာနနှင့် စာဖြင့်အင်တာဗျူးတွင် ပူတင်က ဖြေကြားခဲ့သည်။
ခရမ္မလင်က မကြုံစဖူးဟု ခေါ်တွင်သော ခရီးစဉ်ဖြင့် ပူတင်သည် ရုရှား၏ အကြီးဆုံးကုန်သွယ်ဖက်ဖြစ်သော တရုတ်နိုင်ငံတွင် တနင်္ဂနွေနေ့မှ ဗုဒ္ဓဟူးနေ့အထိ လေးရက်ကြာခရီးရောက်ရှိနေမည်ဖြစ်သည်။
ရုရှားခေါင်းဆောင်သည် တရုတ်မြောက်ပိုင်း ဆိပ်ကမ်းမြို့ တီယန်ကျင်းတွင် ကျင်းပမည့် ရှန်ဟိုင်းပူးပေါင်းဆောင်ရွက်ရေးအဖွဲ့(SCO) ၏ နှစ်ရက်ကြာ ထိပ်သီးအစည်းအဝေးကို ပထမဦးစွာ တက်ရောက်မည်ဖြစ်သည်။ လုံခြုံရေးကို အဓိကရည်ရွယ်သော SCO ကို ၂၀၀၁ ခုနှစ်တွင် ဥရောပအာရှနိုင်ငံများက တည်ထောင်ခဲ့ပြီး ယခုအခါ အီရန်နှင့် အိန္ဒိယနိုင်ငံတို့ပါ ပါဝင်လာကာ အမြဲတမ်းအဖွဲ့ဝင် ၁၀ နိုင်ငံ ရှိလာပြီဖြစ်သည်။
အဆိုပါ အစည်းအဝေးအပြီးတွင် ပူတင်သည် တရုတ်သမ္မတ ရှီကျင့်ဖျင်နှင့် တွေ့ဆုံရန်နှင့် တရုတ်မြို့တော်တွင် ကျင်းပမည့် ဒုတိယကမ္ဘာစစ်ပြီးဆုံးခြင်း အထိမ်းအမှတ် စစ်ရေးပြအခမ်းအနားကို တက်ရောက်ရန် ပေကျင်းသို့ ဆက်လက်သွားရောက်မည်ဖြစ်သည်။
ရုရှားသည် ၂၀၂၂ ခုနှစ်တွင် ယူကရိန်းကို ကျူးကျော်ခဲ့ပြီးနောက် အနောက်၏ ပိတ်ဆို့အရေးယူမှုအများအပြားဖြင့် ရင်ဆိုင်ခဲ့ရသည်။ အမေရိကန်သမ္မတ ဒေါ်နယ်ထရမ့်ပ်က ငြိမ်းချမ်းရေးသဘောတူညီချက် ရရှိရန် ကြိုးပမ်းမှုတွင် ဖြစ်နိုင်ခြေရှိ မရှိအပေါ် မူတည်၍ ရုရှားအပေါ် ကြီးမားသော ပိတ်ဆို့အရေးယူမှုများ ချမှတ်နိုင်သည်ဟု ပြောကြားထားသည်။
“အနှစ်ချုပ်ပြောရရင် ကျွန်တော်တို့ နှစ်နိုင်ငံအကြား စီးပွားရေး ပူးပေါင်းဆောင်ရွက်မှု၊ ကုန်သွယ်ရေးနဲ့ စက်မှုလုပ်ငန်းပူးပေါင်းဆောင်ရွက်မှုတွေဟာ နယ်ပယ်ပေါင်းစုံမှာ တိုးတက်နေပါတယ်” ဟု တရုတ်နိုင်ငံနှင့် ပတ်သက်၍ ပူတင်က ပြောကြားခဲ့သည်။
“ကျွန်တော့်ရဲ့ လာမယ့်ခရီးစဉ်အတွင်းမှာ နှစ်နိုင်ငံ အကျိုးတူ ပူးပေါင်းဆောင်ရွက်မှုအတွက် နောက်ထပ်အလားအလာတွေနဲ့ ရုရှားနဲ့ တရုတ်ပြည်သူတွေရဲ့ အကျိုးစီးပွားအတွက် အရှိန်အဟုန်မြှင့်လုပ်ဆောင်မယ့် ခြေလှမ်းသစ်တွေကို သေချာပေါက်ဆွေးနွေးသွားမှာပါ” ဟု ၎င်းက ပြောကြားခဲ့သည်။
Ref: အင်န်ဒီတီဗီ