တရုတ်ဝန်ကြီးချုပ် လီကျင်းသည် တိဘက်ဒေသ Yarlung Tsangpo မြစ်အောက်ပိုင်းတွင် စုစုပေါင်း စီမံကိန်းရင်းနှီးမြှုပ်နှံမှု ယွမ် ၁ ဒဿမ ၂ ထရီလျံရှိ ဧရာမ ရေကာတာစီမံကိန်း တည်ဆောက်မှုကို စနေနေ့တွင် စတင်ပေးခဲ့ကြောင်း ရှင်းဟွာသတင်းဌာနက ဖော်ပြခဲ့သည်။
China Yajiang Group ဟုခေါ်ဆိုသည့် ကုမ္ပဏီသစ်တစ်ခုကိုလည်း စနေနေ့တွင် တရားဝင်ထုတ်ဖော်ပြသခဲ့သည်။ အဆိုပါ ကုမ္ပဏီသည် ကိုယ်ပိုင်အုပ်ချုပ်ခွင့်ရ တိဘက် အရှေ့တောင်ပိုင်း Nyingchi အနီး တည်ရှိသည့် ဆည်ငါးဆင့်ပါဝင်သော ရေအားလျှပ်စစ်စီမံကိန်းကို တာဝန်ယူတည်ဆောက်မည်ဖြစ်သည်ဟု ရှင်းဟွာက ဆိုသည်။
ထုတ်လုပ်သည့် ဓါတ်အားကို တိဘက်ပြင်ပတွင် အဓိကထားရောင်းချမည်ဖြစ်ကာ ဒေသတွင်း ဓါတ်အားလိုအပ်ချက်အတွက်လည်း အသုံးပြုမည်ဖြစ်ကြောင်း ရှင်းဟွာက ပြောဆိုခဲ့ပြီး ထုတ်လုပ်နိုင်စွမ်း အသေးစိတ်ကိုမူ ဖော်ပြခဲ့ခြင်းမရှိပေ။
စုစုပေါင်းရင်းနှီးမြှုပ်နှံမှုအရ ရေကာတာစီမံကိန်းသည် တည်ဆောက်ဖူးသမျှ အခြေခံအဆောက်အဦး စီမံကိန်းများတွင် ကုန်ကျစရိတ်အများဆုံးဖြစ်လာမည်ဖြစ်ကာ ပေကျင်း၏ စီးပွားရေးတိုးတက်မှု ပြန်လည်အားကောင်းရေး ကြိုးပမ်းမှုများကို အထောက်အကူပြုနိုင်သည်။
သို့သော်လည်း နှစ်နိုင်ငံ အငြင်းပွားဧရိယာ Arunachal Pradesh ကိုဖြတ်သန်း၍ အိန္ဒိယ၏ အဓိကမြစ်ကြောင်းများထဲမှ တစ်ခုဖြစ်သော ဗြဟ္မပုတ္တအတွင်း စီးဝင်သည့် Yarlung Tsangpo မြစ်ပေါ်တည်ဆောက်မည့် ယင်းရေကာတာသည်လည်း တရုတ်နှင့် အိန္ဒိယနှစ်နိုင်ငံအကြား တင်းမာမှုများ၏ အရင်းအမြစ်တစ်ခုဖြစ်လာနိုင်သည်။ ပေကျင်းကမူ မြစ်အောက်ပိုင်းဒေသများတွင် ဆိုးဝါးသော သက်ရောက်မှုများ ရှိလာမည်မဟုတ်ဟု ပြောဆိုထားသည်။
အဆိုပါ စီမံကိန်းတွင် တိဘက်မှ ဟောင်ကောင်သို့ ဓါတ်အားသွယ်တန်းပေးမည့် စီမံကိန်းလည်း ပါဝင်မည်ဖြစ်ကြောင်း နိုင်ငံတော် ဖွံ့ဖြိုးတိုးတက်ရေးနှင့် ပြုပြင်ပြောင်းလဲရေးကော်မရှင်က ယခုနှစ်အစောပိုင်းတွင် ပြောကြားခဲ့သည်။
လေ့လာမှုများအရ Yarlung Tsangpo မြစ်အောက်ပိုင်းရှိ ကြီးမားသော ချောက်ကြီးသည် လျှပ်စစ်ဓါတ်အား ၇၀ ဂီဂါဝပ် ထုတ်လုပ်နိုင်သည့် အလားအလာရှိပြီး ကမ္ဘာပေါ်တွင် အကြီးဆုံးဖြစ်သည့် မြစ်ကျဉ်းသုံးသွယ်ရေကာတာ၏ ထုတ်လုပ်နိုင်စွမ်းထက် သုံးဆကျော်ရှိသည်။ Ref: ဘန်ကောက်ပို့စ်