မြန်မာအက်ဂရိုအိတ်(စ)ချိန်း(စ)အများနှင့်သက်ဆိုင်သော ကုမ္ပဏီလီမိတက် – MAEX မှတာဝန်ယူတည်ဆောက်နေသည့် တညင်းကုန်းလက်ကားဈေးသစ်ကြီးတွင် ဆိုင်ခန်းပေါင်း ၆၀၀၀ ကျော်ဖွင့်လှစ်ထားပြီးဖြစ်ကြောင်း အဆိုပါကုမ္ပဏီမှ သိရသည်။
အဆိုပါ တညင်းကုန်းလက်ကားဈေးသစ်ကြီးကိုစီမံကိန်း အဆင့်လေးဆင့် ပိုင်းခြားပြီး တည်ဆောက်နေခြင်းဖြစ်ပြီး ပြီးခဲ့သည့် ၂၀၁၈ ခုနှစ်တွင်စတင်ဖွင့်လှစ်ခဲ့ခြင်းဖြစ်သည်။
” အခုကျွန်တော်တို့က ဈေးရုံအမှတ် ၁ သစ်သီးဝလံဈေးကို ဖွင့်လှစ်တာပေါ့။ အခုဆိုရင် ဈေးရုံပေါင်း လေးရုံလောက် ဖွင့်လှစ်ပြီးဖြစ်ပါတယ်။ ပြောရမယ်ဆိုရင် ရာခိုင်နှုန်း ၈၀ လောက်အထိ ဈေးသည်တွေကို ငှားရမ်းထားပြီးဖြစ်ပါတယ်။ ဒီနှစ်ကုန်မှာလည်း ဈေးရုံနှစ်ရုံကို ဖွင့်လှစ်ဖို့အတွက်လျာထားပါတယ်”ဟု တညင်းကုန်းလက်ကားဈေးကြီး၊ လုပ်ငန်းရေးရာဌာနမှ အထွေထွေမန်နေဂျာ ဦးရဲထွန်းက ပြောသည်။
တညင်းကုန်းအဆင့်မြင့်လက်ကားဈေးကို ၂၀၁၇ ခုနှစ်တွင် စတင်တည်ဆောက်ခြင်း ဖြစ်ပြီး ၂၀၁၈ ခုနှစ်တွင် ဈေးဆိုင်အဆင့် (၁) ဖွင့်လှစ်ခဲ့ကြောင်း၊ ဈေးသစ်တစ်ခုလုံး တည်ဆောက်မှု ၂၀၂၇ တွင် ပြီးစီးရန် စီစဉ်ထားကြောင်းလည်း သိရသည်။
ထို့ပြင် ဖွင့်လှစ်ထားပြီးဖြစ်သည့် တညင်းကုန်းလက်ကားဈေးကြီးအတွင်း တောင်သူများ ကုန်ဈေးလက်လီရောင်းသည့် ဈေးရုံအမှတ် (၂)တွင် ဆိုင်ခန်းပေါင်း ၃,၃၆၀ ခန်း၊ ကုန်မျိုးစုံနှင့်ကုန်ခြောက်များ ရောင်းချသည့် ဈေးရုံ (၃) တွင် ဆိုင်ခန်းပေါင်း ၁,၁၂၀၊ ရာသီပေါ်သီးနှံနှင့် သားငါးပစ္စည်းများ ရောင်းချသည့် ဈေးရုံ (၄)တွင် ဆိုင်ခန်းပေါင်း ၁,၄၀၀ ကျော်ဖွင့်လှစ်ပြီးဖြစ်ကြောင်း သိရသည်။
