တိုင်းရင်းသားစည်းလုံးညီညွတ်ရေးပါတီ အပါအဝင် နိုင်ငံရေးပါတီ (၃) ခုကို ပါတီမှတ်ပုံတင်ခွင့်ပြုကြောင်း ပြည်ထောင်စု ရွေးကောက်ပွဲ ကော်မရှင်က ထုတ်ပြန် ကြေညာထားသည်။
ယမန်နေ့ ဧပြီလ (၂၅)ရက် ညပိုင်းက ထုတ်ပြန်ကြေညာခဲ့ခြင်း ဖြစ်ပြီး ဖလုံ – စဝေါ ဒီမိုကရက်တစ်ပါတီ နှင့် ဒီမိုကရေစီပါတီသစ် (ကချင်) ပါတီတို့လည်း ပါဝင်ကြောင်း UEC ၏ ထုတ်ပြန်ချက်အရ သိရသည်။
အဆိုပါ ပါတီ (၃) ခုသည် နစက၏ နိုင်ငံရေးပါတီများ မှတ်ပုံတင်ခြင်း ဥပဒေ (၂၀၂၃) အရ နိုင်ငံရေးပါတိီအဖြစ် ဆက်လက်ရပ်တည်ရန် မှတ်ပုံတင် ပြန်လည်လျှောက်ထားခဲ့သည့် ပါတီများ ဖြစ်ပြီး UEC က စစ်ဆေးပြီး မှတ်ပုံတင် ခွင့်ပြုပေးခဲ့ခြင်း ဖြစ်သည်။
နစက၏ နိုင်ငံရေး ပါတီများ မှတ်ပုံတင်ခြင်း ဥပဒေ (၂၀၂၃) အရ နိုင်ငံရေးပါတီအဖြစ် ဆက်လက်ရပ်တည်ရန် မှတ်ပုံတင်လျှောက်ထားခဲ့သည့် ပါတီ( ၆၃) ပါတီ အနက် ပြည်ထောင်စု ရွေးကောက်ပွဲကော်မရှင်မှ စစ်ဆေးခွင့်ပြုပေးနေခြင်းဖြစ်သည်။
လက်ရှိတွင် ပါတီမှတ်ပုံတင် ခွင့်ပြုချက်ရရှိသည့် ပါတီ (၅) ခုအထိ ရှိလာပြီဖြစ်ပြီး အဆိုပါ ပါတီ (၅) ခုတွင် ပြည်ထောင်စု ကြံ့ခိုင်ရေးနှင့် ဖွံ့ဖျိုးရေး ပါတီလည်း အပါအဝင် ဖြစ်သည်။
UEC က ပြီးခဲ့သည့် မတ်လကုန်ပိုင်းက ထုတ်ပြန်သည့် စာရင်းဇယားများအရ မြန်မာနိုင်ငံတွင် ပါတီမှတ်ပုံတင် ပြန်လည်လျှောက်ထားခဲ့သည့် နိုင်ငံရေးပါတီ (၆၃) ပါတီရှိပြီး ယင်းထဲက (၁၃) ပါတီမှာ ပြည်ထောင်စုအဆင့် စည်းရုံးလှုပ်ရှားမည့်ပါတီများ ဖြစ်ကြောင်း သိရသည်။
ပြည်နယ်နှင့် တိုင်းအဆင့် လှုပ်ရှားမည့်ပါတီ (၅၀) ရှိပြီး မှတ်ပုံတင် ပြန်လည်လျှောက်ထားခြင်း မရှိသည့် ပါတီ (၄၀) ကို နိုင်ငံရေးပါတီအဖြစ်မှ ဖျက်သိမ်းကြောင်း UEC က ထုတ်ပြန်ကြေညာထားသည်။
ယင်းကဲ့သို့ ဖျက်သိမ်းခံရသည့် ပါတီများထဲတွင် ၂၀၁၅ အာဏာရပါတီ ဖြစ်သည့် NLD ပါတီနှင့် SNLD ပါတီ ၊ လူ့ဘောင်သစ် ပါတီတို့ကဲ့သို့သော အတိုက်အခံအင်အားကြီးပါတီများလည်း ပါဝင်နေခြင်း ဖြစ်သည်။
