ရန်ကုန်မြို့တွင် ညနေပိုင်း ညဦးပိုင်းများ၌ YBSကားများ နည်းပါးသွားသောကြောင့် ကြားကားများကို ခရီးသွားများ စီးလာကြရသည်။
“ခုနစ်နာရီနောက်ပိုင်းဆို လိုင်းကားမသေချာတော့ဘူး၊ ညနေ ၅ နာရီခွဲလောက်ဆိုရင် ကြားကားတောင် မြို့ထဲကစီးရင် နေရာမရဘူး၊ ကားလည်းတွယ်စီးတဲ့သူတွေရောအပြည့်နဲ့ ဖင်ထောင်နေတာ”ဟု ခရီးသည်တစ်ဦးက ပြောသည်။
ထို့အပြင် လိုင်းပြေးဆွဲနေသော YBS ယာဉ်ကြီးအများစုမှာ ရုံးတက်ချိန်နှင့် ရုံးဆင်းချိန်များတွင် တက်မရအောင် ကားကျပ်သည့် အခြေအနေများကြောင့် ခရီးသည်များသည် ကြားကားများကိုလည်း စီးနင်းလာရသည်။
“၁၂ ကတော့ ရှစ်နာရီခွဲအထိရှိတယ်၊ ကျန်တဲ့ YBS လိုင်းကားတွေလည်း အဲလောက်အချိန်ထိတော့ရှိစေချင်တယ်” ဟု စီးနင်းသွားလာနေသူတစ်ဦးကလည်း ပြောသည်။
ကြားကားအဖြစ်ပြေးဆွဲသော လိုက်ထရပ်ယာဉ်များသည် ရန်ကုန်မြို့အလယ်ကိုဖြတ်၍ သာကေတနှင့် သခင်မြပန်းခြံကြားပြေးဆွဲပေးနေပြီး ခရီးသွားများလည်း အားထားစီးနင်းနေကြသည်။
ကြားကားများကို ခရီးတိုအတက်အဆင်းအတွက် တစ်ဦးလျှင် ၃၀၀ ကျပ်၊ ရန်ကုန်မြို့တွင်းမှ သာကေတ အထိ ၅၀၀ ကျပ်ကောက်ခံသည်ဟု ဆိုသည်။
သို့သော်လည်း ယာဉ်မောင်းများသည် အချင်းချင်းပြိုင်မောင်းခြင်း၊ စည်းကမ်းမဲ့မောင်းနှင်မှုများလည်း ရှိနေဆဲ ဖြစ်သည်။
ရန်ကုန်မြို့တွင်းပြေးဆွဲနေသော YBS ယာဉ်လိုင်းများသည် ယာဉ်စီးရေ (၃,၅၀၀)ကျော်ဖြင့် ခရီးသည် (၁၄)သိန်းကျော်ကို နေ့စဉ်ပို့ဆောင်ပေးလျက်ရှိကြောင်း YRTC ၏ အချက်အလက်များအရ သိရသည်။
YBS ယာဉ်လိုင်းများ ကားရှားပါးမှုသည် YBS ယာဉ်များတွင် ဂက်စ်ဖြည့်သွင်းမှုအပေါ်မူတည်၍ ဂက်စ်ဆိုင်တွင်ယာဉ်များအချိန်ကြာမြင့်အောင် စောင့်ဆိုင်းရသော အခြေအနေမျိုးကြုံသည့်ရက်တွင် ယာဉ်လိုင်းအတွင်းယာဉ်တစ်စီးနှင့်တစ်စီး အချိန်ကွာခြားလေ့ ရှိကြောင်းလည်း ယာဉ်မောင်းများက ပြောသည်။