Meta ၏ စီအီးအိုဖြစ်သူ မာ့ခ်ဇူကာဘတ် သည် Instagram ကို လူငယ်များစွဲလမ်းစေရန် ရည်ရွယ်ချက်ရှိရှိ ဒီဇိုင်းထုတ်ထားခြင်း ရှိ၊ မရှိနှင့် ပတ်သက်၍ လော့စ်အိန်ဂျလိစ် တရားရုံးတွင် ဗုဒ္ဓဟူးနေ့က ပြင်းပြင်းထန်ထန် မေးမြန်းစစ်ဆေးခြင်း ခံခဲ့ရသည်။
ဆိုရှယ်မီဒီယာများသည် ကလေးသူငယ်များ၏ စိတ်ကျန်းမာရေးကို ထိခိုက်စေသည်ဟူသော နှစ်ပေါင်းများစွာ ကြာမြင့်နေပြီဖြစ်သည့် စွပ်စွဲချက်များနှင့် ပတ်သက်၍ ဂျူရီအဖွဲ့ရှေ့တွင် ပထမဆုံးအကြိမ် ထွက်ဆိုရာ၌ Meta စီအီးအိုက သူသည် လူငယ်အသုံးပြုသူများ၏ ဘေးကင်းလုံခြုံရေးကို “ကျိုးကြောင်းဆီလျော်သော နည်းလမ်းဖြင့်” ကိုင်တွယ်ဖြေရှင်းထားသည်ဟု ယုံကြည်ကြောင်း ပြောကြားခဲ့သည်။
သို့သော်လည်း ဆိုရှယ်မီဒီယာများကြောင့် ၎င်းတို့၏ သားသမီးများ ထိခိုက်ဒဏ်ရာရခြင်း သို့မဟုတ် သေဆုံးခြင်းများ ကြုံတွေ့ခဲ့ရသည်ဟု ဆိုကာ နိုင်ငံတစ်ဝန်းမှ လာရောက်ကြသည့် မိဘများကမူ တရားရုံးပြင်ပတွင် အခြားတစ်မျိုး ပုံဖော်ပြောဆိုခဲ့ကြသည်။ Meta ကုမ္ပဏီသည် အမြတ်အစွန်းအတွက် ၎င်းတို့၏ ကလေးသူငယ်များကို သားကောင်ဖြစ်အောင် ပြုလုပ်ကာ ခေါင်းပုံဖြတ်ခဲ့သည်ဟု သူတို့က ပြစ်တင်ပြောဆိုခဲ့ကြသည်။
ယခုတရားခွင်မှာ “Kaley” အမည်ရှိ အမျိုးသမီးငယ်က Meta နှင့် YouTube တို့သည် သူမအား ကလေးငယ်ဘဝကတည်းက စွဲလမ်းသွားအောင် ပြုလုပ်ရန် ဒီဇိုင်းထုတ်ထားသည်ဟု စွပ်စွဲထားခြင်း ဖြစ်သည်။ ဤအမှု၏ ရလဒ်သည် အလားတူ အခြားအမှုပေါင်း ရာနှင့်ချီအတွက် အဆုံးအဖြတ်ပေးနိုင်သည့် စံပြအမှု ဖြစ်လာနိုင်သည်။ အကယ်၍ ကုမ္ပဏီဖက်က အရေးနိမ့်ခဲ့လျှင် နစ်နာကြေးအဖြစ် ဒေါ်လာ ဘီလီယံနှင့်ချီ၍ ပေးလျော်ရနိုင်ပြီး လူအများစု၏ နေထိုင်မှုပုံစံကို ပုံဖော်ထားသည့် သူတို့၏ ဆိုရှယ်မီဒီယာများကိုလည်း မဖြစ်မနေ ပြောင်းလဲမှုများ ပြုလုပ်ရမည် ဖြစ်သည်။
ဇူကာဘတ် သည် ၅ နာရီကျော်ကြာ ထွက်ဆိုမှု ပြီးဆုံးပြီးနောက် တရားရုံး၏ နောက်ဖက်တံခါးမှ ပြန်လည်ထွက်ခွာသွားခဲ့သည်။